(vovworld) – ໂດຍຕັ້ງຢູ່ທາງທິດຕາເວັນຕົກເມືອງຄ໋ວາຍເຈົາ, ບິ່ງມິງ ແມ່ນໜຶ່ງໃນບັນດາຕາແສງນຳໜ້າໃນຂະບວນການກໍ່ສ້າງຊົນນະບົດໃໝ່ຂອງແຂວງຮຶງອຽນ. ໂດຍໄດ້ຮັບການເລືອກເຟັ້ນແມ່ນ 1 ໃນ 2 ຕາແສງປະຕິບັດທົດລອງການກໍ່ສ້າງຊົນນະບົດໃໝ່ໃນໄລຍະ 2011 – 2013, ຕາມຄາດໝາຍທີ່ໄດ້ວາງອອກ, ໃນປີ 2013 ນີ້, ບິ່ງມິງ ຈະປະຕິບັດສຳເລັດໂຄງການກໍ່ສ້າງຊົນນະບົດໃໝ່ ດ້ວຍ 19 ມາດຖານ.
ທາງຄົມມະນາຄົມຊົນນະບົດຢູ່ຕາແສງບິ່ງມິງໄດ້ຮັບການກໍ່ສ້າງດ້ວຍເບຕົງ
(ພາບ: ອິນເຕີແນດ)
ເມື່ອໄປຕາແສງບິ່ງມິງ, ພວກເຮົາເຫັນວ່າຊີວິດການເປັນຢູ່ຂອງປະຊາຊົນຢູ່ທີ່ນີ້ມີການປ່ຽນແປງຫຼາຍຢ່າງ. ມາຮອດປະຈຸບັນ, ບິ່ງມິງ ໄດ້ວາງແຜນກຳນົດທີ່ດິນ ແລະ ໂຄງລ່າງທີ່ຈຳເປັນ ເພື່ອຮັບໃຊ້ໃຫ້ແກ່ການພັດທະນາການຜະລິດ, ໂຄງລ່າງເສດຖະກິດ - ສັງຄົມ, ໃນຕາແສງໄດ້ມີໄປສະນີ ໂທລະຄົມ, ອິນເຕີແນດແລ້ວ ແລະ ບໍ່ມີເຮືອນມຸ້ງຫຍ້າຝາດິນອີກ. ຕາແສງມີ 3 ບ້ານ ລ້ວນແຕ່ໄດ້ຮັບການຮັບຮອງວ່າແມ່ນບ້ານວັດທະນະທຳ. ໃນຫຼາຍປີຜ່ານມາວຽກງານຮັກສາຄວາມສະຫງົບ, ຄວາມເປັນລະບຽບຮຽບຮ້ອຍຍາມໃດກໍ່ຮັບປະກັນ… ດ້ວຍທິດນຳທີ່ວ່າ, ລັດ ແລະ ປະຊາຊົນພ້ອມກັນເຮັດ, ບັນດາບ້ານໃນຕາແສງ ໄດ້ກໍ່ສ້າງທາງເບຕົງກວ່າ 12 ກມ, ດ້ວຍຍອດມູນຄ່າເກືອບ 8 ຕື້ດົ່ງ, ໃນນັ້ນປະຊາຊົນປະກອບປະມານ 3 ຕື້ດົ່ງ, ມີຫຼາຍຄອບຄົວໄດ້ສະຫງວນທີ່ດິນເພື່ອເປີດກວ້າງທາງຄົມມະນາຄົມ. ທ່ານ ຫງວຽນວັນຈິ້ງ, ຢູ່ຕາແສງບິ່ງມິງ ໄດ້ສະຫງວນທີ່ດິນນັບສິບແມັດ ແລະ ບໍລິຈາກເງິນ 3 ລ້ານດົ່ງ ເພື່ອກໍ່ສ້າງທາງເບຕົງລະຫວ່າງບ້ານ. ທ່ານແບ່ງປັນວ່າ:
“ພວກຂ້າພະເຈົ້າຕອບສະໜອງຂະບວນການກໍ່ສ້າງຊົນນະບົດໃໝ່ ເພື່ອກໍສ້າງທາງຄົມມະນາຄົມໃຫ້ກວ້າງຂວາງ, ສວຍງາມກວ່າ ແລະ ສ້າງຄວາມສະດວກໃຫ້ແກ່ການໄປມາກວ່າ. ກ່ອນນີ້, ທາງຕາແສງໄດ້ກໍ່ສ້າງທາງກວ້າງ 1,5 – 2 ແມັດແລ້ວ, ແຕ່ປະຈຸບັນເສັ້ນທາງນີ້ໄດ້ຮັບການເປີດກວ້າງອອກ 3 ແມັດ. ໂດຍແມ່ນຊາວກະສີກອນຜູ້ໜຶ່ງໃນຕາແສງ, ພວກເຮົາຕ່າງກໍ່ສະໜັບສະໜູນຂະບວນການຕ່າງໆຂອງອຳນາດການປົກຄອງຕາແສງ“
ພ້ອມກັບການລົງທຶນກໍ່ສ້າງພື້ນຖານໂຄງລ່າງ, ທາງຕາແສງກໍ່ເອົາໃຈໃສ່ເຖິງການຍົກສູງຊີວິດທາງດ້ານວັດທະນະທຳ, ຈິດໃຈ, ສາທາລະນະສຸກ, ການສຶກສາ… ໃຫ້ແກ່ປະຊາຊົນ. ບັນດາຂະບວນການ “ທົ່ວປວງຊົນສາມັກຄີກໍ່ສ້າງຊີວິດທາງດ້ານວັດທະນະທຳໃນເຂດຊຸມຊົນ“, ຮູບແບບເຂດຊຸມຊົນ “ກົມກຽວປອງດອງ, ລົບລ້າງຄວາມອຶດຫີວ ຫຼຸດຜ່ອນຄວາມທຸກຍາກ ແລະ ປົກປັກຮັກສາສິ່ງແວດລ້ອມ“ ໄດ້ຮັບການສະໜັບສະໜູນ ແລະ ປະຕິບັດຈາກປະຊາຊົນ. ຕີລາຄາກ່ຽວກັບວຽກງານກໍ່ສ້າງຊົນນະບົດໃໝ່ຂອງຕາແສງບິ່ງມິງ, ທ່ານ ເລຈ້ອງບິ່ງ, ຮອງປະທານຄະນະກຳມະການປະຊາຊົນເມືອງ, ຮອງຫົວໜ້າຄະນະຊີ້ນຳການກໍ່ສ້າງຊົນນະບົດໃໝ່ຢູ່ເມືອງ ຄ໋ວາຍເຈົາ, ໃຫ້ຮູ້ວ່າ:
“ບັນລຸໄດ້ຜົນສຳເລັດຄືດັ່ງກ່າວ ແມ່ນຍ້ອນວ່າຄະນະຊີ້ນຳ, ຄະນະຄຸ້ມຄອງຕາແສງໄດ້ປະຕິບັດວຽກງານໂຄສະນາດີທີ່ສຸດ ເພື່ອໃຫ້ປະຊາຊົນເຂົ້າໃຈໄດ້ຈຸດປະສົງ, ຄວາມໝາຍຂອງການກໍ່ສ້າງຊົນນະບົດໃໝ່. ໃນຂະບວນການກໍ່ສ້າງພື້ນຖານໂຄງລ່າງ, ປະຊາຊົນຫຼາຍຄົນໄດ້ສະຫງວນທີ່ດິນຂອງຕົນເພື່ອກໍ່ສ້າງທາງຄົມມະນາຄົມ. ຕາມແຜນການແລ້ວ, ເຖິງປີ 2013, ຕາແສງບິ່ງມິງພະຍາຍາມປະຕິບັດໃຫ້ສຳເລັດການກໍ່ສ້າງຊົນນະບົດໃໝ່ໂດຍພື້ນຖານ“.
ໃນການພັດທະນາເສດຖະກິດ, ຊາວບິ່ງມິງມີໄຫວພິບໃນການຫັນປ່ຽນຜົນລະປູກ, ລ້ຽງສັດ, ຜະລິດປຸງແຕ່ງຜະລິດຕະພັນກະເສດ, ດຳເນີນທຸລະກິດ, ການບໍລິການ, ເສີມຂະຫຍາຍປະສິດທິຜົນຂອງທີ່ດິນ, ສຸມໃສ່ການກໍ່ສ້າງຕົ້ນໄມ້ໃຫ້ໝາກທີ່ມີມູນຄ່າເສດຖະກິດສູງ. ລາຍຮັບຂອງຫຼາຍຄອບຄົວໃນບໍລິເວນຕາແສງບັນລຸນັບຮ້ອຍລ້ານດົ່ງ/ປີ. ທ່ານຟ້າມວັນເຟືອງ, ປະທານສະມາຄົມຊາວກະສີກອນຕາແສງບິ່ງມິງ, ໃຫ້ຮູ້ວ່າ, ເພື່ອໄດ້ຮັບຜົນງານໃນວຽກງານກໍ່ສ້າງຊົນນະບົດໃໝ່, ແມ່ນຍ້ອນໄດ້ຮັບຄວາມເຫັນດີເຫັນພ້ອມ, ການສະໜັບສະໜູນຂອງປະຊາຊົນທຸກຄົນ.
“ໃນປີ 2013, ຕາແສງບິ່ງມິງ ສືບຕໍ່ປຸກລະດົມ, ໂຄສະນາ, ຂົນຂວາຍ, ປະກອບສ່ວນຕື່ນອີກ ເພື່ອກໍ່ສ້າງເສັ້ນທາງລະຫວ່າງຕາແສງຕາມມາດຖານແຫ່ງຊາດກ່ຽວກັບການກໍ່ສ້າງຊົນນະບົດໃໝ່ ແນໃສ່ປະຕິບັດສຳເລັດ 19 ມາດຖານທີ່ໄດ້ວາງອອກ. ຂ້າພະເຈົ້າເຊື່ອໝັ້ນວ່າ, ດ້ວຍຄວາມຕັດສິນໃຈສູງຂອງທຸກຂະແໜງ, ທຸກຂັ້ນ, ທັງຕາແສງຈະປະຕິບັດສຳເລັດ 5 ມາດຖານທີ່ຍັງເຫຼືອຢ່າງແນ່ນອນ“
ປະຈຸບັນ, ການນຳຕາແສງບິ່ງມິງ ພວມສຸມໃສ່ຊີ້ນຳ ແລະ ແນະນຳໃຫ້ພໍ່ແມ່ປະຊາຊົນປະຕິບັດໃຫ້ສຳເລັດ 5 ມາດຖານທີ່ຍັງເຫຼືອ ເພື່ອສຳເລັດໂຄງການແຫ່ງຊາດກ່ຽວກັບການກໍ່ສ້າງຊົນນະບົດໃໝ່. ໃນນັ້ນສຸມໃສ່ການກໍ່ສ້າງພື້ນຖານໂຄງລ່າງຄົມມະນາຄົມ, ຊົນລະປະທານ, ຫໍວັດທະນະທຳ, ປັບປຸງສິ່ງແວດລ້ອມ ແລະ ຍົກສູງລາຍຮັບໃຫ້ແກ່ປະຊາຊົນ. ຕາແສງບິ່ງມິງ ພວມສືບຕໍ່ໂຄສະນາ ເພື່ອໃຫ້ປະຊາຊົນທຸກຄົນເຂົ້າໃຈແຈ້ງຈຸດປະສົງ, ຄວາມໝາຍ, ສະຕິຄວາມຮັບຜິດຊອບ, ປະກອບສ່ວນເຂົ້າໃນການກໍ່ສ້າງຊົນນະບົດໃໝ່… ດ້ວຍຄວາມມານະພະຍາຍາມ, ຄວາມຕັດສິນໃຈຂອງຄະນະພັກ, ອຳນາດການປົກຄອງ ແລະ ປະຊາຊົນ, ຕາແສງບິ່ງມິງພວມມີບາດກ້າວພັດທະນາຢ່າງໝັ້ນຄົງ ແລະ ຈະ ປະຕິບັດສຳເລັດບັນດາມາດຖານກ່ຽວກັບການກໍ່ສ້າງຊົນນະບົດໃໝ່ໃນປີ 2013 ຢ່າງແນ່ນອນ.