(vovworld) - ພ້ອມກັບຊາວກະສີກອນ, ບັນດາວິສາຫະກິດ, ນັກທຸລະກິດ ກໍ່ມີບົດບາດສຳຄັນໃນການກໍ່ສ້າງຊົນນະບົດໃໝ່ຢູ່ຫວຽດນາມ. ນັບແຕ່ຫວຽດນາມ ຜັນຂະຫຍາຍການກໍ່ສ້າງຊົນນະບົດໃໝ່ມາຮອດປະຈຸບັນ, ບໍລິສັດໃຫຍ່ຫຸ້ນສ່ວນອຸປະກອນກະສີກຳເງ້ອານ, ຫົວໜ່ວຍວິລະຊົນແຮງງານ, ແມ່ນວິສາຫະກິດທີ່ມີຄວາມຕັ້ງໜ້າໃນການໜູນຊ່ວຍຊາວກະສີກອນກໍ່ສ້າງທົ່ງນາຂະໜາດໃຫຍ່, ນຳໃຊ້ວິທະຍາສາດເຕັກໂນໂລຢີເຂົ້າໃນການຜະລິດກະສີກຳ. ເຊີນທ່ານຮັບຟັງບົດຂຽນຂອງນັກຂ່າວ ທູຮວາ ທີ່ມີຫົວຂໍ້ວ່າ: ”ບໍລິສັດໃຫຍ່ຫຸ້ນສ່ວນອຸປະ ກອນກະສີກຳເງ້ອານ, ວິສາຫະກິດເຂົ້າຮ່ວມການກໍ່ສ້າງຊົນນະບົດໃໝ່”.
ສຳນັກງານບໍລິສັດໃຫຍ່ຫຸ້ນສ່ວນອຸປະກອນກະສີກຳເງ້ອານ
(ພາບ: ອິນເຕີແນດ) ບໍລິສັດໃຫຍ່ຫຸ້ນສ່ວນອຸປະກອນກະສີກຳເງ້ອານ ເຄື່ອນໄຫວໃນຂົງເຂດກະສີກຳນັບແຕ່ປີ 1960 ມາຮອດປະຈຸບັນ. ເມື່ອມີແຜນນະໂຍບາຍກໍ່ສ້າງຊົນນະບົດໃໝ່ກ່ອນນີ້ 5 ປີ, ທາງບໍລິສັດໃຫຍ່ໄດ້ຜັນຂະຫຍາຍນະໂຍບາຍກໍ່ສ້າງຊົນນະບົດໃໝ່ຢ່າງວ່ອງໄວ, ຜ່ານການລົງທຶນກໍ່ສ້າງທົ່ງນາຂະໜາດໃຫຍ່, ນຳໃຊ້ຝຸ່ນເຄມີ, ແນວພັນໃໝ່ ແລະ ຈຳໜ່າຍຜະລິດຕະພັນໃຫ້ແກ່ຊາວກະສີກອນ. ທ່ານ ເຈືອງວັນຮ່ຽນ, ຜູ້ອຳນວຍການໃຫຍ່ບໍລິສັດຫຸ້ນສ່ວນອຸປະກອນກະສີກຳເງ້ອານ, ໃຫ້ຮູ້ວ່າ:
”ມາຮອດປະຈຸບັນ, ທາງບໍລິສັດໃຫຍ່ໄດ້ຜັນຂະຫຍາຍການກໍ່ສ້າງທົ່ງນາຂະໜາດໃຫຍ່ຢູ່ເງ້ອານ, ຮ່າຕິງ, ບິ່ງດິ້ງ, ດັກລັກ, ຢາລາຍ ແລະ ນຳໃຊ້ຄວາມກ້າວໜ້າໃນການຜະລິດກະສີກຳຄື: ໃຊ້ຝຸ່ນ, ແນວພັນປູກປະເພດດຽວ, ດັ່ງນັ້ນ ການຜະລິດຂອງຊາວກະສີກອນຈຶ່ງບັນລຸປະສິດທິຜົນສູງ ແລະ ຮູບແບບການຜະລິດນີ້ໄດ້ຮັບການຕີລາຄາສູງຈາກທ້ອງຖີ່ນຕ່າງໆ”.
ທົ່ງນາຂະໜາດໃຫຍ່
(ພາບ: ອິນເຕີແນດ) ກ່ອນທີ່ກໍ່ສ້າງທົ່ງນາຂະໜາດໃຫຍ່, ຊາວກະສີກອນຢູ່ທ້ອງຖີ່ນເຫຼົ່ານັ້ນເຄີຍຜະລິດແບບກະແຈກກະຈາຍ, ບໍ່ມີຈຸດສຸມ. ໃນທົ່ງນາແຫ່ງໜຶ່ງເຂົາເຈົ້າປູກເຂົ້າຫຼາຍແນວ, ໃສ່ຝຸ່ນຫຼາຍປະເພດ, ດັ່ງນັ້ນຕົ້ນເຂົ້າຈຶ່ງຖືກສັດຕູພືດ. ເມື່ອກໍ່ສ້າງທົ່ງນາຂະໜາດໃຫຍ່, ນຳໃຊ້ວິທະຍາສາດເຕັກນິກທີ່ກ້າວໜ້າ, ນຳໃຊ້ຝຸ່ນ ແລະ ແນວພັນປະເພດດຽວ, ສະພາບສັດຕູພືດກໍ່ຫຼຸດລົງ, ສະມັດຕະພາບການຜະລິດເພີ່ມຂຶ້ນ ແລະ ການຈຳໜ່າຍຜະລິດຕະພັນກໍ່ສະດວກສະບາຍ. ເພື່ອບັນລຸໄດ້ຜົນງານຄືໃນປະຈຸບັນ, ທາງບໍລິສັດໃຫຍ່ຕ້ອງເດັດດຽວປະຕິບັດນະໂຍບາຍລົງທຶນເພື່ອຊາວກະສີກອນ. ທ່ານ ເຈືອງວັນຮ່ຽນ, ເນັ້ນໜັກວ່າ:
”ຢາກເຮັດໄດ້, ກ່ອນອື່ນໝົດວິສາຫະກິດຕ້ອງລົງທຶນ ແລະ ຕ້ອງຖືຜົນ ປະໂຫຍດຂອງຊາວກະສີກອນເປັນ ຕົ້ນ. ເມື່ອກໍ່ສ້າງທົ່ງນາຂະໜາດໃຫຍ່, ພວກເຮົາໄດ້ໃຫ້ຊາວກະສີກອນກູ້ຢືມຝຸ່ນ, ແນວພັນ, ຮັບປະກັນສະມັດຕະພາບ ແລະ ການຊື້ຜະລິດຕະພັນກໍ່ເພີ່ມຂຶ້ນແຕ່ 10-20% ມູນຄ່າຜະລິດຕະພັນ. ນອກນັ້ນ, ພວກເຮົາກໍ່ຕ້ອງຊອກຫາບັນດາຜະລິດຕະພັນ, ແນວພັນ, ຝຸ່ນທີ່ຮັບປະກັນຄຸນນະພາບສູງ, ແລະ ສ້າງເງື່ອນໄຂສະດວກໃຫ້ຊາວກະສີກອນຈຳ ໜ່າຍຜະລິດຕະພັນອີກ”.
ຈາກຄວາມຈິງ, ນັກທຸລະກິດຕັ້ງໜ້າເຂົ້າຮ່ວມການກໍ່ສ້າງຊົນນະບົດໃໝ່, ທ່ານ ເຈືອງວັນຮ່ຽນ, ວິລະຊົນແຮງ ງານໄລຍະປ່ຽນແປງໃໝ່, ຖືວ່າ, ບັນດານັກທຸລະກິດ, ວິສາຫະກິດແມ່ນກຳລັງສຳຄັນທີ່ຂາດບໍ່ໄດ້ໃນກິດຈະການ ກໍ່ສ້າງຊົນນະບົດໃໝ່.
”ຕ້ອງຢືນຢັນວ່າ, ຢາກກໍ່ສ້າງຊົນນະບົດໃໝ່ ແມ່ນຕ້ອງມີການເຂົ້າຮ່ວມຂອງບັນດາວິສາຫະກິດ. ຍ້ອນວ່າຊາວກະສີກອນບໍ່ມີທຶນ, ບໍ່ມີວິທະຍາສາດ, ເຕັກນິກເພື່ອຜັນຂະຫຍາຍ. ຢາກມີທຶນ, ມີວິທະຍາສາດເຕັກນິກ ແມ່ນຕ້ອງມີວິສາຫະກິດຈຶ່ງສາມາດຜັນຂະຫຍາຍໄດ້. ຜ່ານການກໍ່ສ້າງທົ່ງນາຂະໜາດໃຫຍ່, ພວກຂ້າພະເຈົ້າສາມາດຢືນຢັນວ່າ, ຢາກກໍ່ສ້າງຊົນນະບົດໃໝ່, ວິສາຫະກິດຕ້ອງນຳໜ້າຈຶ່ງນຳມາເຊິ່ງປະສິດທິຜົນໄດ້”.
ທົ່ງນາຂະໜາດໃຫຍ່ທີ່ໃຊ້ແນວພັນເຂົ້າ ແລະ ຝຸ່ນປະເພດດຽວ
(ພາບ: ອິນເຕີແນດ) ຈາກຜົນງານທີ່ໄດ້ຮັບໃນທົ່ງນາຂະໜາດໃຫຍ່, ບໍລິສັດໃຫຍ່ຫຸ້ນສ່ວນອຸປະກອນກະສີກຳເງ້ອານ ໄດ້ໜູນຊ່ວຍຊາວກະສີກອນຍົກສູງຄູນຄ່າໃນເນື້ອທີ່ປູກສາລີ, ມັນດ້າງ, ມັນຕົ້ນ, ອ້ອຍອີກດ້ວຍ.
ບໍ່ພຽງແຕ່ສະໜອງຝຸ່ນ, ແນວພັນປູກ ແລະ ບັນດາຜະລິດຕະພັນບໍລິການໃນຂົງເຂດກະສີກຳເທົ່ານັ້ນ, ບໍລິສັດໃຫຍ່ຫຸ້ນສ່ວນອຸປະກອນກະສີກຳເງ້ອານ ຍັງຕັ້ງໜ້າເຂົ້າຮ່ວມກິດຈະການກໍ່ສ້າງຊົນນະບົດໃໝ່ຢູ່ຫວຽດນາມ ດ້ວຍການສົມທົບກັບຊາວກະສີກອນກໍ່ສ້າງທົ່ງນາຂະໜາດໃຫຍ່, ໃນນັ້ນຕ້ອງຕັ້ງໜ້ານຳໃຊ້ຄວາມກ້າວໜ້າດ້ານວິທະຍາສາດເຕັກນິກ ເພື່ອຍົກສູງຄຸນຄ່າການຜະລິດໃນເນື້ອທີ່ປູກຝັງ. ການເຄື່ອນໄຫວຂອງບໍລິສັດໃຫຍ່ໄດ້ຮັບຖືວ່າແມ່ນຮູບແບບທີ່ດີເດັ່ນກ່ຽວກັບເລື່ອງວິສາຫະກິດເຂົ້າຮ່ວມກິດຈະການກໍ່ສ້າງຊົນນະບົດໃໝ່ຢ່າງມີປະສິດທິຜົນໃນປະຈຸບັນ.