(vovworld) - ພັດທະນາການທ່ອງທ່ຽວປະຊາຄົມ ດ້ວຍການເສີມຂະຫຍາຍຄູນຄ່າວັດທະນະທຳທີ່ເປັນມູນເຊື້ອປະຈຳເຜົ່າ ແມ່ນວິທີເຊິ່ງຊາວເຜົ່າໄທ ຢູ່ບ້ານຫຸ້ມ, ຕາແສງຈ່ຽງຊົມ, ນະຄອນເຊີນລາ ພວມປະຕິບັດ. ຈຳນວນເງິນໄດ້ຮັບຈາກການເຮັດບໍລິການທ່ອງທ່ຽວແມ່ນບໍ່ທັນຫຼາຍ, ແຕ່ມັນໄດ້ເປີດທິດພັດທະນາໃໝ່ໃຫ້ບັນດາໝູ່ບ້ານຢູ່ເຂດພູສູງເຊີນລາ, ທາງທິດຕາເວັນຕົກສຽງເໜືອໃນການກໍ່ສ້າງຊົນນະບົດໃໝ່.
ຟ້ອນແຊຮັບໃຊ້ນັກທ່ອງທ່ຽວຂອງສາວເຜົ່າໄທຢູ່ເຊີນລາ
(ພາບ: ອິນເຕີແນດ)
ບ້ານຫຸ້ມ, ຕາແສງຈ່ຽງສົມ ຢູ່ຕິດກັບນະຄອນເຊີນລາ, ມີພົນລະເມືອງ 125 ຄອບຄົວ, ເຊິ່ງສ່ວນຫຼາຍແມ່ນຊາວເຜົ່າໄທ. ນັບແຕ່ປີ 2012, ເມື່ອແຂວງເຊີນລາ ເລືອກເຟັ້ນບ້ານຫຸ້ມ ເປັນບ້ານປະຕິບັດການທ່ອງທ່ຽວປະຊາຄົມທົດລອງ, ຊາວບ້ານຫຸ້ມ ໄດ້ຕັ້ງໜ້າຮ່ຳຮຽນວິທີເຮັດການບໍລິການທ່ອງທ່ຽວ, ເພື່ອສາມາດແນະນຳຄວາມງາມທີ່ເປັນມູນເຊື້ອຂອງຊາວເຜົ່າຕົນ ແລະ ເພີ່ມລາຍຮັບຕື່ມອີກໃຫ້ຊາວບ້ານ. ເລື່ອງພັດທະນາການທ່ອງທ່ຽວຢູ່ບ້ານຫຸ້ມ ໄດ້ຊ່ວຍໃຫ້ຊາວບ້ານຫຼົຸດພົ້ນອອກຈາກຄວາມທຸກຍາກເທື່ອລະກ້າວ, ສູ້ຊົນກໍ່ສ້າງຊົນນະບົດໃໝ່ໃຫ້ສຳເລັດ. ໂດຍແມ່ນຊາວກະສີກອນ, ປະຈຸບັນເຮັດການບໍລິການທ່ອງທ່ຽວ, ຊາວບ້ານບໍ່ຊິນເຄີຍ ແລະ ເປັນຫ່ວງເປັນໃຍນຳວຽກງານນີ້ຫຼາຍ. ເອື້ອຍ ຫຼູ່ທິຈ້ຽນ, ສະມາຊິກສະມາຄົມແມ່ຍິງບ້ານຫຸ້ມ ຍັງຈື່ຈຳວ່າ:
“ໃນເບື້ອງຕົ້ນຂ້າພະເຈົ້າ ແລະ ເອື້ອຍນ້ອງໃນໝູ່ບ້ານເປັນຫ່ວງເປັນໃຍຫຼາຍ, ເພາະວ່າຜູ້ໃດກໍ່ຮູ້ວ່າເຮັດການບໍລິການທ່ອງທ່ຽວແມ່ນຍາກກວ່າເຮັດວຽກງານກະສີກຳຫຼາຍ, ແຕ່ພາຍຫຼັງໄດ້ຮັບການແນະນຳກ່ຽວກັບວິທີສຳຜັດ, ໂຄສະນາວັດທະນະທຳທີ່ເປັນເອກະລັກສະເພາະຂອງເຜົ່າຕົນແລ້ວ, ພວກຂ້າພະເຈົ້າໄດ້ເຊື່ອໝັ້ນເຂົ້າຮ່ວມການເຮັດວຽກງານບໍລິການທ່ອງທ່ຽວ“.
ກອງສິລະປະໃນບ້ານຫຸ້ມ
(ພາບ: ອິນເຕີແນດ) ຊາວໄທ ມີວັດທະນະທຳປະຈຳເຜົ່າທີ່ເປັນເອກະລັກສະເພາະ, ນັບແຕ່ອາຫານການກິນ ຕະຫຼອດຮອດຮີດຄອງປະເພນີ, ການເຫລື້ອມໃສ, ງານບຸນ, ການລະຫຼິ້ນ... ຍ້ອນເຫດນັ້ນ, ຄະນະທ່ອງທ່ຽວປະຊາຄົມບ້ານຫຸ້ມ ຈຶ່ງກຳນົດທິດທາງທຳອິດໃນການພັດທະນາການທ່ອງທ່ຽວແມ່ນຂຸດຄົ້ນທ່າແຮງດ້ານວັດທະນະທຳທີ່ເປັນມູນເຊື້ອຂອງເຜົ່າຕົນ. ດັ່ງນັ້ນປະຈຸບັນ, ເມື່ອມາຢ້ຽມບ້ານຫຸ້ມ, ນັກທ່ອງທ່ຽວບໍ່ພຽງແຕ່ໄດ້ຮັບຊົມບັນດາລາຍການສະແດງສິລະປະ ດ້ວຍວາດຟ້ອນແຊ ເຊິ່ງແມ່ນວາດຟ້ອນພື້ນເມືອງຂອງເຜົ່າໄທ ໂດຍບັນດາສາວໄທ ທີ່ສວຍງາມສະແດງເທົ່ານັ້ນ, ຫາກຍັງໄດ້ເຂົ້າຮ່ວມການເຄື່ອນໄຫວປະຈຳວັນຂອງຊາວເຜົ່າໂດຍກົງອີກຄື: ເຮັດໄຮ່, ລົງຫ້ວຍຈັບປາ, ຕ່ຳຫຸກ, ແຕ່ງອາຫານທີ່ເປັນມູນເຊື້ອຂອງເຜົ່າໄທ... ທ່ານ ກວາງວັນໂຂ, ຮອງຫົວໜ້າຄະນະທ່ອງທ່ຽວບ້ານຫຸ້ມ, ໃຫ້ຮູ້ວ່າ:
“ສະເພາະອາຫານການກິນ, ບ້ານຫຸ້ມຂອງພວກຂ້າພະເຈົ້າກໍ່ມີອາຫານແຊບນົວຫຼາຍເຍື່ອງທີ່ໄດ້ຮັບຄວາມນິຍົມຈາກນັກທ່ອງທ່ຽວ. ພິເສດແມ່ນເຂົ້າໜຽວຫຼາຍສີ, ເຂົ້າຫຼາມ, ປາປິ້ງ, ແກງໜັງຄວາຍ... ນີ້ແມ່ນອາຫານທີ່ເປັນມູນເຊື້ອຂອງຊາວເຜົ່າໄທ ໃນເມື່ອກ່ອນ ແລະ ໃນປະຈຸບັນ“.
ປິ້ງປາ - ອາຫານພື້ນເມືອງຂອງເຜົ່າໄທ
(ພາບ: ອິນເຕີແນດ) ເພື່ອຊ່ວຍພໍ່ແມ່ປະຊາຊົນພັດທະນາການທ່ອງທ່ຽວ, ແຕ່ລະປີພະແນກ ວັດທະນະທຳກິລາ ແລະ ທ່ອງທ່ຽວ ແຂວງ ເຊີນລາ ໄດ້ຈັດຕັ້ງຊຸດເຝິກອົບຮົມກ່ຽວກັບທັກສະໃນການແນະນຳ, ໂຄສະນາວັດທະນະທຳ, ອາຫານການກິນຂອງຊົນເຜົ່າ; ແບ່ງປັນບົດຮຽນໃນການເຮັດບໍລິການທ່ອງທ່ຽວ... ທ່ານ ກວາງວັນຝ່ອງ, ເຈົ້າບ້ານໆຫຸ້ມ, ໃຫ້ຮູ້ວ່າ, ນັບແຕ່ເຮັດວຽກງານບໍລິການທ່ອງທ່ຽວ, ຊາວບ້ານໄດ້ມີການປ່ຽນແປງຫຼາຍຢ່າງກ່ຽວກັບຄວາມຮັບຮູ້, ທາງຄົມມະນາຄົມໃນບ້ານ ກໍ່ຄືສະພາບແວດລ້ອມໃນບ້ານ ຍາມໃດກໍ່ໄດ້ຮັບການຮັກສາຢ່າງສະອາດສວຍງາມ. ໂດຍກຳນົດໄດ້ວ່າ ທ່ອງທ່ຽວປະຊາຄົມແມ່ນວິທີກໍ່ສ້າງຊົນນະບົດໃໝ່, ປະກອບສ່ວນຍົກສູງຊີວິດທາງດ້ານວັດຖຸ ແລະ ຈິດໃຈໃຫ້ແກ່ຕົນ, ດັ່ງນັ້ນແຕ່ລະຄົນໃນບ້ານລ້ວນແຕ່ຕັ້ງໜ້າເຂົ້າຮ່ວມ, ນັບແຕ່ການໂຄສະນາ, ການຮຽນວິທີຖັກແສ່ວ, ຕ່ຳຫຸກຕະຫຼອດຮອດການຟ້ອນລຳທຳເພງພື້ນເມືອງຂອງເຜົ່າໄທ, ການຄົ້ນຫາ, ໂຄສະນາວັດທະນະທຳທີ່ເປັນເອກະລັກສະເພາະຂອງເຜົ່າຕົນ...ນອກຈາກປະກອບເຫື່ອແຮງເພື່ອກໍ່ສ້າງເຮືອນຮ້ານຂອງເຜົ່າໄທໃຫ້ເປັນບ່ອນເຄື່ອນໄຫວວັດທະນະທຳລວມ, ຮັກສາວັດຖຸເຄື່ອງຂອງທີ່ເປັນມູນເຊື້ອຂອງເຜົ່າໄທຄື: ຊຸດອາພອນ, ກີ່ຕ່ຳຫຸກ, ເຄື່ອງດົນຕີ, ເຄື່ອງມືຮັບໃຊ້ການອອກແຮງງານທຳການຜະລິດ...ແລ້ວ, ຫຼາຍຄອບຄົວໃນບ້ານຍັງລົງທຶນບຸລະນະເຮືອນຢູ່ເພື່ອເຮັດການບໍລິການຮັບໃຊ້ນັກທ່ອງທ່ຽວອີກ. ໃນຕໍ່ໜ້າ 100% ຈຳນວນຄອບຄົວໃນບ້ານຈະເຮັດວຽກງານບໍລິການທ່ອງທ່ຽວປະຊາຄົມ. ອ້າຍກວາງວັນຟ໋ອງ, ເຈົ້າບ້ານໆຫຸ່ມ, ໃຫ້ຮູ້ວ່າ:
“ເມື່ອແຂກມາຢ້ຽມຢາມບ້ານຫຸ່ມ ຈະນຳມາເຊິ່ງຜົນປະໂຫຍດທັງດ້ານວັດຖຸ ແລະ ຈິດໃຈໃຫ້ປະຊາຊົນ. ດັ່ງນັ້ນຄະນະທ່ອງທ່ຽວຂອງບ້ານກໍ່ໄດ້ປຶກສາຫາລືແລະ ເຫັນດີນຳກັນວ່າໃນທ້າຍປີ 2013 ແລະ ຕົ້ນປີ 2014 ຈະພະຍາຍາມໃຫ້ລູກຫຼານຮຽນຖັກແສ່ວ, ຕ່ຳຫຸກແພພື້ນເມືອງ, ຮຽນຂັບລຳ ແລະ ຟ້ອນແຊ... ເພື່ອຮັບໃຊ້ແຂກທ່ອງທ່ຽວ”.
ເຮືອນຮ້ານທີ່ສະອາດຂອງເຜົ່າໄທ
(ພາບ: ອິນເຕີແນດ)
ນັບແຕ່ປີ 2012 ມາຮອດປະຈຸບັນ, ບ້ານຫຸ້ມໄດ້ຮັບນັກທ່ອງທ່ຽວມາຢາມ 20 ກວ່າຄະນະ, ໃນນັ້ນມີຄະນະນັກທ່ອງທ່ຽວສາກົນທີ່ມາຈາກ ສເກົາຫຼີ, ຍີ່ປຸ່ນ, ອົດສະຕາລີ, ໂປໂລຍ... ເຖິງວ່າຈຳນວນເງິນທີ່ໄດ້ຮັບຈາກການເຮັດການບໍລິການທ່ອງທ່ຽວບໍ່ທັນຫຼາຍ, ແຕ່ການພັດທະນາການທ່ອງທ່ຽວຈາກບັນດາຄູນຄ່າວັດທະນະທຳທີ່ເປັນມູນເຊື້ອພວມແມ່ນທິດທາງກໍ່ສ້າງຊົນນະບົດໃໝ່ທີ່ເຕັມໄປດ້ວຍຄວາມສາມາດບົ່ມຊ້ອນຢູ່ບ້ານຫຸ້ມ, ກໍ່ຄືບັນດາໝູ່ບ້ານຢູ່ເຂດພູສູງໄຕບັກ (ທາງທິດຕາເວັນຕົກສ່ຽງເໜືອ).