(vovworld) - ຜ່ານ 5 ປີແຫ່ງການປະຕິບັດຂະບວນການ “ຜູ້ອາຍຸສູງທີ່ເປັນແບບຢ່າງ“. ຜູ້ອາຍຸສູງໃນທົ່ວປະເທດໄດ້ຂົນຂວາຍຄອບຄົວ, ລູກຫຼານ, ວົງຕະກຸນຂອງຕົນບໍລິຈາກເງິນໄດ້ 3.000 ຕື້ດົ່ງ, ທີ່ດິນ 5 ລ້ານຕາແມັດເພື່ອກໍ່ສ້າງທາງຄົມມະນາຄົມຊົນນະບົດ, ກໍ່ສ້າງບັນດາກິດຈະກຳສະຫວັດດີການ, ປະກອບສ່ວນຢ່າງແທດຈິງ, ພ້ອມກັບບັນດາຂະແໜງການຢູ່ທ້ອງຖີ່ນປະຕິບັດໂຄງການຈຸດໝາຍແຫ່ງຊາດກໍ່ສ້າງຊົນນະບົດໃໝ່ເປັນຢ່າງດີ.
ເຖິງວ່າອາຍຸສູງແລ້ວແຕ່ສະມາຊິກສະມາຄົມຜູ້ອາຍຸສູງຍັງຄົງເມົາມົວອອກແຮງງານທຳການຜະລິດ, ເປັນແບບຢ່າງໃຫ້ລູກຫຼານ
ທ່ານ ເຈິ່ນເທິດກົງ, ຢູ່ຕາແສງກິມລຽນ, ເມືອງນາມດ່ານ, ແຂວງເງ້ອານ, ເຊິ່ງແມ່ນບ້ານເກີດເມືອງນອນຂອງປະທານ ໂຮ່ຈິມິນ, ຍາມໃດກໍ່ເອກອ້າງທະນົງໃຈທີ່ເປັນແບບຢ່າງ, ບໍ່ພຽງແຕ່ພາຍໃນຄອບຄົວເທົ່ານັ້ນ, ຫາກໃນໝູ່ປະຊາຊົນຢູ່ບ້ານຂອງຕົນອີກດ້ວຍ. ເມື່ອເວົ້າເຖິງວຽກງານກໍ່ສ້າງຊົນນະບົດໃໝ່ຢູ່ທ້ອງຖີ່ນ, ທ່ານ ກົງ ໃຫ້ຮູ້ວ່າ: ເມື່ອໂຄງການໄດ້ຮັບການຜັນຂະຫຍາຍ, ຢູ່ບ້ານ 13. ບ່ອນທີ່ທ່ານອາໄສນັ້ນຜັນຂະຫຍາຍຊ້າກວ່າໝູ່ໃນຕາແສງກິມລຽນ. ທ່ານໄດ້ປຶກສາກັບບັນດາຜູ້ອາຍຸສູງໃນບ້ານຂົນຂວາຍລູກຫຼານເຂົ້າຮ່ວມ ດ້ວຍບັນດາວຽກງານທີ່ເໝາະສົມກັບເງື່ອນໄຂຂອງແຕ່ລະຄອບຄົວ. ຜົນມີຢູ່ວ່າ, ປີ 2014, ທາງຄົມມະນາຄົມ1.000 ແມັດໃນບ້ານໄດ້ຮັບການກໍ່ສ້າງດ້ວຍເບຕົງຢ່າງສະອາດ, ສວຍງາມ. ຈາກນັ້ນບັນດາກິດຈະກຳສະຫວັດດີການອື່ນໆຢູ່ທ້ອງຖີ່ນກໍ່ໄດ້ຮັບການຜັນຂະຫຍາຍ. ທ່ານ ເຈິ່ນເທິດກົງ ເວົ້າວ່າ:
“ໃນການຂົນຂວາຍ, ພວກຂ້າພະເຈົ້າແມ່ນຜູ້ອາຍຸສູງ, ຕ້ອງເປັນແບບຢ່າງທັງເວົ້າທັງເຮັດໃຫ້ໄດ້. ຄອບຄົວຂ້າພະເຈົ້າກໍ່ປະສົບກັບຄວາມຫຍຸ້ງຍາກ, ແຕ່ຂ້າພະເຈົ້າໄດ້ບໍລິຈາກເງິນກໍ່ສ້າງທາງເບຕົງກ່ອນໃຫ້ປີ 2015 ແມ່ນ 600 ພັນດົ່ງ ແລະ ປະກອບເງິນຕື່ມອີກ 200 ພັນດົ່ງໃຫ້ແກ່ການກໍ່ສ້າງຊົນນະບົດໃໝ່. ຜູ້ຮັ່ງມີປະກອບຫຼາຍ, ຜູ້ທຸກຍາດປະກອບໜ້ອຍ, ສ່ວນຜູ້ບໍ່ປະກອບເງິນ ກໍ່ປະກອບກຳລັງເຫື່ອແຮງ, ຫຼືປະກອບທີ່ດິນ. ການເປີດກວ້າງທາງຄົມມະນາຄົມ, ເຮັດໃຫ້ການໄປມາຄ້າຂາຍຂອງປະຊາຊົນສະດວກສະບາຍ ແລະ ສ້າງວຽກເຮັດງານທຳໃຫ້ຜູ້ອອກແຮງງານຕື່ມອີກ“.
ສຳລັບພໍ່ຕູ້ ຟ້ານເອິດ, ຢູ່ບ້ານຟູ໋ແທ່ງ, ຕາແສງຕິ້ງຈ່າ, ເມືອງເຊີນຕິ້ງ, ແຂວງກວາງຫງາຍ ແລ້ວ, ສວນ ແລະ ນາແມ່ນແຫຼ່ງລາຍຮັບຕົ້ນຕໍໃຫ້ແກ່ຄອບຄົວ. ແຕ່ເມື່ອຜັນຂະຫຍາຍໂຄງການກໍ່ສ້າງຊົນນະບົດໃໝ່, ພໍ່ຕູ້ໄດ້ປະກອບທີ່ດິນ 2.000 ກວ່າຕາແມັດເພື່ອກໍ່ສ້າງຫໍວັດທະນະທຳ ແລະ ກໍ່ສ້າງທາງຄົມມະນາຄົມຊົນນະບົດ. ພໍ່ຕູ້ ເອິດ ໃຫ້ຮູ້ວ່າ, ຜູ້ລະວຽກ, ຕ້ອງພ້ອມກັນປະກອບກຳລັງເຫື່ອແຮງ, ຂະບວນການກໍ່ສ້າງຊົນນະບົດໃໝ່ຈຶ່ງບັນລຸໄດ້ປະສິດທິຜົນ, ປະກອບສ່ວນຢ່າງແທດຈິງໃນການກໍ່ສ້າງບ້ານເມືອງ. ພໍ່ຕູ້ ຟານເອິດ, ໃຫ້ຮູ້ວ່າ:
“ຂ້າພະເຈົ້າປະກອບທີ່ດິນປູກຕົ້ນໄມ້ອຸດສາຫະກຳຂອງຕົນໃຫ້ແກ່ການກໍ່ສ້າງໂຮງຮຽນມັດທະຍົມ, ແລະ ປະກອບທີ່ດິນປູກພືດ ແລະ ປູກຫຍ້າໃຫ້ແກ່ການກໍ່ສ້າງຫໍວັດທະນະທຳ. ຂ້າພະເຈົ້າຄິດວ່າປະເທດພວກເຮົາໄດ້ຮັບເອກະລາດ, ເປັນເອກະພາບ, ພວກເຮົາຕ້ອງເຮັດແນວໃດເພື່ອປະກອບສ່ວນກໍ່ສ້າງບ້ານເມືອງໃຫ້ນັບມື້ນັບຮັ່ງມີ, ສວຍງາມກວ່າ“.
ນີ້ພຽງແຕ່ແມ່ນສອງໃນຈຳນວນຜູ້ອາຍຸສູງທີ່ເປັນແບບຢ່າງໃນການກໍ່ສ້າງຊົນນະບົດໃໝ່ນັບລ້ານຄົນເທົ່ານັ້ນ. ໃນ 5 ປີຜ່ານມາ, ໂດຍປະຕິບັດຂະບວນການ “ຜູ້ອາຍຸສູງທີ່ເປັນແບບຢ່າງ“, ຜູ້ອາຍຸສູງໃນທົ່ວປະເທດໄດ້ຂົນຂວາຍຄອບຄົວ, ລູກຫຼານ, ວົງຕະກຸນຂອງຕົນບໍລິຈາກເງິນໄດ້ 3.000 ຕື້ດົ່ງ, ທີ່ດິນ 5 ລ້ານຕາແມັດເພື່ອກໍ່ສ້າງທາງຄົມມະນາຄົມຊົນນະບົດ, ກໍ່ສ້າງບັນດາກິດຈະກຳສະຫວັດດີການ, ປະກອບສ່ວນຢ່າງແທດຈິງໃນການກໍ່ສ້າງຊົນນະບົດໃໝ່ຢູ່ຮາກຖານ. ທ່ານນາງ ກູ່ທິເຫົ້າ, ປະທານສະມາຄົມຜູ້ອາຍຸສູງຫວຽດນາມ ຢືນຢັນວ່າ, ຜູ້ອາຍຸສູງຍາມໃດກໍ່ເສີມຂະຫຍາຍບົດບາດຕັ້ງໜ້າສຳລັບຄອບຄົວ ແລະ ສັງຄົມໃນທຸກຂົງເຂດ. ດ້ວຍອິດທິພົນຂອງຕົນ, ບົດບາດຂອງສະມາຄົມຜູ້ອາຍຸສູງທຸກຂັ້ນຢູ່ທ້ອງຖີ່ນໃນການປະຕິບັດຂະບວນການຕ່າງໆເວົ້າລວມ ກໍ່ຄືໃນການກໍ່ສ້າງຊົນນະບົດໃໝ່ເວົ້າສະເພາະແມ່ນສຳຄັນທີ່ສຸດ. ທ່ານນາງ ກູ່ທິເຫົ້າ, ໃຫ້ຮູ້ວ່າ:
“ໄລຍະຈະມາເຖິງ, ສະມາຄົມສຸມໃສ່ເຂົ້າໃນການກໍ່ສ້າງອົງການໃຫ້ໝັ້ນຄົງ, ເຂັ້ມແຂງ, ຕອບສະໜອງການສົ່ງເສີມ ແລະ ເສີມຂະຫຍາຍບົດບາດຂອງຜູ້ອາຍຸສູງ. ພວກຂ້າພະເຈົ້າຈະປະຕິບັດແຜນງານເດືອນກະທຳເພື່ອຜູ້ອາຍຸສູງ, ນີ້ກໍ່ແມ່ນການສະແດງໃຫ້ເຫັນວຽກງານສັງຄົມໃນການເຄື່ອນໄຫວຂອງຕົນ. ບັນດາລາຍການເຊິ່ງສະມາຄົມຈະສືບຕໍ່ຍູ້ແຮງນັ້ນແມ່ນລາຍການຕາແຈ້ງໃຫ້ຄົນອາຍຸສູງ, ລາຍການຜູ້ອາຍຸສູງຮ່ວມແຮງຮ່ວມໃຈກໍ່ສ້າງຊົນນະບົດໃໝ່…“.
ໂຄງການຈຸດໝາຍແຫ່ງຊາດວ່າດ້ວຍການກໍ່ສ້າງຊົນນະບົດໃໝ່ ໄດ້ ແລະ ພວມເຮັດໃຫ້ໂສມໜ້າ ແລະ ຊີວິດຂອງປະຊາຊົນຢູ່ເຂດຊົນນະບົດຫວຽດນາມ ມີການປ່ຽນແປງຢ່າງຮອບດ້ານ. ການປ່ຽນແປງເຫຼ່ົານັ້ນແມ່ນມີການປະກອບສ່ວນຢ່າງຕັ້ງໜ້າຂອງຜູ້ອາຍຸສູງ, ດ້ວຍບັນດາວຽກງານລະອຽດ, ທີ່ໄດ້ຮັບການຮັບຮູ້ຈາກປະຊາຄົມ ແລະ ສົງຄົມ