(vovworld) - ດ້ວຍທິດນຳທີ່ວ່າ “ເຂົ້າແຕ່ລະບ້ານ, ມາແຕ່ລະຄອບຄົວ“, ປະຈຸບັນເມືອງ 5 ນະຄອນໂຮ່ຈີມິນ, ໄດ້ປະຕິບັດສຳເລັດຈຸດໝາຍຫຼຸດຜ່ອນຄວາມທຸກຍາກໄລຍະ 2014-2015 ກ່ອນກຳນົດເວລາ 1 ປີ ເມື່ອທຽບໃສ່ຈຸດໝາຍທີ່ນະຄອນໄດ້ວາງອອກ. ຢູ່ທີ່ນີ້, ບັນດາຕາແສງ, ບັນດາເຂດຊຸມຊົນ ໄດ້ຜັນຂະຫຍາຍບັນດາວິທີເຮັດ, ຮູບແບບທີ່ດີ, ເພື່ອແນໃສ່ຊ່ວຍເຫຼືອປະຊາຊົນໃຫ້ຫຼຸດພົ້ນອອກຈາກຄວາມທຸກຍາກ, ຍົກສູງຄຸນນະພາບຊີວິດການເປັນຢູ່.
ພາບປະກອບ
ສຳລັບບັນດາຄອບຄົວທຸກຍາກຢູ່ເມືອງ 5, ນະຄອນໂຮ່ຈີມິນແລ້ວ, ບັນດາສະມາຊິກໃນໜ່ວຍຄຸ້ມຄອງວຽກງານຫຼຸດຜ່ອນຄວາມທຸກຍາກດ້ວຍ ຕົນເອງຢູ່ຄຸ້ມບ້ານຕ່າງໆມີຄວາມໃກ້ຊິດຄືດັ່ງຍາດຕິພີ່ນ້ອງໃນຄອບຄົວຂອງເຂົາເຈົ້າ. ໜ່ວຍຄຸ້ມຄອງດ້ວຍຕົນເອງນີ້ ໂດຍຄະນະຫຼຸດຜ່ອນຄວາມທຸກຍາກເມືອງ 5, ນະຄອນໂຮ່ຈີມິນ, ສ້າງຕັ້ງຂຶ້ນ, ເພື່ອໜູນຊ່ວຍໃຫ້ບັນດາຄອບຄົວທຸກຍາກໃນເມືອງຢ່າງທັນການ. ບັນດາສະມາຊິກໄດ້ເຮັດວຽກຕາມທິດນຳ “ເຂົ້າແຕ່ລະບ້ານ, ມາແຕ່ລະຄອບຄົວ“ ເພື່ອກຳແໜ້ນ ສະພາບການຄອບຄົວທຸກຍາກ ແນໃສ່ສະເໜີການເບິ່ງແຍງຊ່ວຍເຫຼືອໃຫ້ເຂົາເຈົ້າຢ່າງລະອຽດ. ຄຽງຂ້າງນັ້ນ, ບັນດາໜ່ວຍຄຸ້ມຄອງດ້ວຍຕົນເອງຍັງຈັດຕັ້ງການເຄື່ອນໄຫວວົງຄະນາຍາດເປັນປະຈຳ ເພື່ອໃຫ້ບັນດາສະມາຊິກແບ່ງປັນບົດຮຽນ, ວິທີທຳມາຫາກິນທີ່ດີເພື່ອພ້ອມກັນຜ່ານຜ່າຄວາມທຸກຍາກ, ຈາກນັ້ນຮັດແໜ້ນສາຍພົວພັນຊ່ວຍເຫຼືອເຊິ່ງກັນ ແລະ ກັນໃນໝູ່ປະຊາຊົນ. ປ້າ ຫງວຽນທູ໋ຍເຟື້ອງ, ຫົວໜ້າໜ່ວຍຄຸ້ມຄອງວຽກງານຫຼຸດຜ່ອນຄວາມທຸກຍາກເລກ 1, ຕາແສງ 6 ໃຫ້ຮູ້ວ່າ:
“ເມື່ອເຫັນຄອບຄົວທຸກຍາກມີຄວາມຕ້ອງການອັນໃດ, ພວກຂ້າພະເຈົ້າກໍ່ຮຽກຮ້ອງການຊ່ວຍເຫຼືອຈາກບັນດາຄອບຄົວທີ່ມີເງື່ອນໄຂທາງດ້ານເສດຖະກິດໃນຄຸ້ມບ້ານ. ຖ້າຫາກວ່າໃນຄຸ້ມບ້ານບໍ່ສາມາດແກ້ໄຂໄດ້, ພວກຂ້າພະເຈົ້າຈະສະເໜີຕໍ່ຂັ້ນເທິງໃຫ້ມີທິດແກ້ໄຂເພື່ອໜູນຊ່ວຍສ້າງວຽກເຮັດງານທຳຢູ່ກັບທີ່ໃຫ້ແກ່ເຂົາເຈົ້າ“.
ໂດຍຜ່ານກອງທຶນຕ່າງໆ, ໃນນັ້ນມີກອງທຶນລົບລ້າງຄວາມອຶດຫີວ ຫຼຸດຜ່ອນຄວາມທຸກຍາກ, ເມືອງ 5 ໄດ້ໃຫ້ 124 ຄອບຄົວທຸກຍາກກູ້ຢືມທຶນເກືອບ 1,7 ຕຶ້ດົ່ງ, ສ່ວນກອງທຶນເພື່ອຄົນທຸກຍາກຂອງທະນາຄານນະໂຍບາຍສັງຄົມ ກໍ່ໄດ້ໃຫ້ຄອບຄົວທຸກຍາກກູ້ຢືມທຶນ 2,3 ຕື້ດົ່ງເພື່ອດຳເນີນທຸລະກິດ.
ຄອບຄົວປ້າ ຫວໍທິຍື, ຢູ່ຕາແສງ 14, ແມ່ນໜຶ່ງໃນບັນດາຄອບຄົວທຸກຍາກໃນເມືອງໃຫ້ຮູ້ວ່າ, ການໃຊ້ສອຍ, ດຳເນີນຊີວິດທັງໝົດໃນຄອບຄົວລ້ວນແຕ່ອີງໃສ່ການເລາະຂາຍໝາກໄມ້ຂອງປ້າ. ລູກຂອງປ້າຕ້ອງປະຮຽນເພື່ອຊ່ວຍແມ່ຂາຍໝາກໄມ້. ນັບແຕ່ໄດ້ຮັບການໜູນຊ່ວຍຈາກຄະນະຫຼຸດຜ່ອນຄວາມທຸກຍາກເມືອງ 5, ປ້າ ຍື ໄດ້ມີທຶນກູ້ຢືມເພື່ອເປີດຮ້ານກາເຟນ້ອຍ, ແຕ່ລະເດືອນຫາເງິນໄດ້ແຕ່ 4 ລ້ານດົ່ງຂຶ້ນໄປ. ພວກລູກຂອງປ້າກໍ່ໄດ້ມີວຽກເຮັດງານທຳຢ່າງໝັ້ນຄົງ. ປ້າ ຫວໍທິຍື, ໃຫ້ຮູ້ວ່າ:
“ກ່ອນນີ້ຂ້າພະເຈົ້າຂາຍໝາກສີດາ, ໝາກກອບ, ເງິນຫາໄດ້ບໍ່ພໍຢູ່ບໍ່ພໍກິນ. ປະຈຸບັນຍ້ອນໄດ້ຮັບທຶນຈາກຄະນະລົບລ້າງຄວາມອຶດຫີວຫຼຸດຜ່ອນຄວາມທຸກຍາກ, ການທຳມາຫາກິນກໍ່ສະດວກສະບາຍກວ່າ. ໃນເບື້ອງຕົ້ນລາຍຮັບບໍ່ຫຼາຍ, ຕໍ່ມານັບມື້ນັບຫຼາຍຂຶ້ນ, ປະຈຸບັນຂ້າພະເຈົ້າສາມາດຊື້ເຮືອນໄດ້ແລ້ວ“.
ພາບປະກອບ ບໍ່ພຽງແຕ່ປ້າ ຫວໍທິຍື ເທົ່ານັ້ນ, ຫາກມີຫຼາຍຄົນຢູ່ເມືອງ 5 ກໍ່ໄດ້ຮັບການໜູນຊ່ວຍທຶນເພື່ອທຳມາຫາກິນ, ໃນນັ້ນມີບາງຄົນຊີວິດໄດ້ດີພໍສົມຄວນ. ບໍ່ພຽງແຕ່ໜູນຊ່ວຍທຶນກູ້ຢືມໃຫ້ແກ່ປະຊາຊົນເທົ່ານັ້ນ. ຄະນະຫຼຸດຜ່ອນຄວາມທຸກຍາກເມືອງ 5 ຍັງມີການສົມທົບກັນຢ່າງແໜ້ນແຟ້ນກັບບັນດາຄອບຄົວທຸກຍາກເພື່ອແນະນຳວິທີພັດທະນາເສດຖະກິດ, ເພື່ອເພີ່ມລາຍຮັບເປັນປົກກະຕິ ແລະ ຍາວນານ. ຄະນະຫຼຸດຜ່ອນຄວາມທຸກຍາກ ໄດ້ເປັນເຈົ້າການຮ່ວມສຳພັນກັບບັນດາວິສາຫະກິດ, ຮາກຖານຜະລິດດຳເນີນທຸລະກິດ ເພື່ອແນະນຳວຽກເຮັດງານທຳໃຫ້ຄົນງານທີ່ທຸກຍາກ, ແກ້ໄຂສະພາບຫວ່າງງານຢູ່ທ້ອງຖີ່ນ. ສຳລັບບັນດາຄອບຄົວທຸກຍາກເປັນພິເສດ, ຜູ້ບໍ່ມີສຸຂະພາບ, ບໍ່ມີຄວາມສາມາດຫຼຸດພົ້ນອອກຈາກຄວາມທຸກຍາກ, ທາງເມືອງໄດ້ໜູນຊ່ວຍດ້ວຍການຂົນຂວາຍຄອບຄົວທີ່ມີເງື່ອນໄຂເສດຖະກິດ, ບັນດາຫົວໜ່ວຍ, ອົງການອຸດໜູນຕ່າງໆ, ຫຼືແນະນຳວຽກງານທີ່ເໝາະສົມກັບສຸຂະພາບ… ແກ້ໄຂຄວາມຫຍຸ້ງຍາກ. ນັບແຕ່ຕົ້ນປີມາຮອດປະຈຸບັນ, ເມືອງ 5 ໄດ້ຂົນຂວາຍ 18 ຫົວໜ່ວຍອຸປະຖຳເປັນປະຈຳໃຫ້ແກ່ບັນດາຄອບຄົວທຸກຍາກ, ດ້ວຍຍອດຈຳນວນເງິນກວ່າ 1 ຕື້ດົ່ງ. ທ່ານ ດັ້ງກວາງມິງ, ຄອບຄົວຫຍຸ້ງຍາກພິເສດ ຢູ່ເມືອງ 14, ເລົ່າສູ່ຟັງວ່າ:
“ຂ້າພະເຈົ້າຂັບລົດຈັກຮັບຈ້າງ, ສ່ວນເມຍເປັນພະຍາດໂລກຈິດດັ່ງນັ້ນເຮັດວຽກບໍ່ໄດ້ຫຼາຍ. ແຕ່ລະເດືອນ, ຄະນະກຳມະການປະຊາຊົນເມືອງໄດ້ຊ່ວຍເລືອຄອບຄົວຂ້າພະເຈົ້າເງິນ 500.000 ດົ່ງ, ຜູ້ທີ່ມີເງື່ອນໄຂກໍ່ຊ່ວຍເຫຼືອ 200.000 ດົ່ງ. ນອກນັ້ນຄອບຄົວຂ້າພະເຈົ້າຍັງໄດ້ຊື້ບັດປະກັນສຸຂະພາບ, ແລະ ໄດ້ຮັບລົດຖີບ, ລູກທັງສອງກໍ່ມີທຶນສຶກສາ, ຜູ້ລະ 1,2 ລ້ານດົ່ງ/ເດືອນ.“
ພາບປະກອບ ປະຈຸບັນ, ໃນເມືອງ 5, ຍັງມີຄອບຄົວທຸກຍາກ 185 ຄອບຄົວ, ຫຼຸດຜ່ອນ 20% ເມື່ອທຽບໃສ່ຕົ້ນປີ. ທ່ານນາງຫ່ານແກ໋ງ, ຫົວໜ້າຫ້ອງການແຮງງານ ທະຫານເສຍອົງຄະ ແລະ ສັງຄົມເມືອງ 5, ໃຫ້ຮູ້ວ່າ, ໄລຍະຈະມາເຖິງ, ເມືອງສືບຕໍ່ຍົກສູງຄວາມຮູ້ ແລະ ປັບປຸງຄຸນນະພາບຊີວິດການເປັນຢູ່ໃຫ້ປະຊາຊົນ.
“ປະຈຸບັນເມືອງ 5 ຍັງມີບາງຄອບຄົວທຸກຍາກ, ດັ່ງນັ້ນພວກຂ້າພະເຈົ້າຈະສືບຕໍ່ໜູນຊ່ວຍ. ສຳລັບຜູ້ເຖົ້າແກ່ຢູ່ໂດດດຽວ, ບໍ່ມີລາຍຮັບ, ພວກຂ້າພະເຈົ້າຈະສືບຕໍ່ອຸປະກະລະເປັນປະຈຳ, ສ່ວນເດັກນ້ອຍແມ່ນໃຫ້ທຶນສຶກສາ. ສະເພາະນັກຮຽນເສັງເຂົ້າມະຫາວິທະຍາໄລ, ວິທະຍາໄລບໍ່ໄດ້, ພວກຂ້າພະເຈົ້າຈະແນະນຳໃຫ້ເຂົ້າໂຮງຮຽນເຕັກນິກຊັ້ນກາງຮຸ່ງເວືອງ“.
ດ້ວຍຄວາມມານະພະຍາຍາມຂອງຄະນະຫຼຸດຜ່ອນຄວາມທຸກຍາກເມືອງ 5 ແລະ ຄວາມສຸດຈິດສຸດໃຈຂອງບັນດາສະມາຊິກໃນໜ່ວຍຄຸ້ມຄອງວຽກງານຫຼຸດຜ່ອນຄວາມທຸກຍາກເມືອງ. ຮອດເດືອນ 7/2014, ເມືອງ 5 ໄດ້ກາຍເປັນຫົວໜ່ວຍທຳອິດຂອງນະຄອນໂຮ່ຈີມິນປະຕິບັດສຳເລັດຈຸດໝາຍຫຼຸດຜ່ອນຄວາມທຸກຍາກໄລຍະ 2014 – 2015, ກ່ອນກຳນົດເວລາ 1 ປີ. ບັນດາວິທີເຮັດທີ່ດີ, ຮູບແບບຫຼຸດຜ່ອນຄວາມທຸກຍາກຢ່າງມີປະສິດທິຜົນຂອງເມືອງ 5 ຈະສືບຕໍ່ໄດ້ຮັບການຂະຫຍາຍອອກຢ່າງກວ້າງຂວາງເຖິງ 23 ເມືອງຂອງນະຄອນໂຮ່ຈິມິນ.