(vovworld) - ໂດຍແມ່ນເມືອງຢູ່ເຂດພູສູງຂອງແຂວງຮ່າຢາງ, ເມືອງ ແມ່ວວາກ ເລີ່ມຕົ້ນການກໍ່ສ້າງຊົນນະບົດໃໝ່ດ້ວຍຄວາມຫຍຸ້ງຍາກ: ການທ້າທາຍຫຼາຍຢ່າງ, ເຖິງຢ່າງໃດກໍ່ຕາມ, ດ້ວຍຄວາມເຫັນດີເຫັນພ້ອມ, ຄວາມຕັດສິນໃຈຂອງການນຳ ແລະ ປະຊາຊົນ, ພ້ອມກັບບັນດາວິທີເຮັດຢ່າງເໝາະສົມ… ເມືອງສາມາດບັນລຸໄດ້ຜົນງານທີ່ໜ້າສົ່ງເສີມໃນເບື້ອງຕົນ, ສ້າງພື້ນຖານໃຫ້ແກ່ການກໍ່ສ້າງຊົນນະບົດໃໝ່.
ຊາວເຜົ່າແຂວງຮ່າຢາງຮ່ວມແຮງຮ່ວມໃຈກໍ່ສ້າງຊົນນະບົດໃໝ່
(ພາບ: ອິນເຕີແນດ)
ພວກເຮົາມາຕາແສງຕາລຸ່ງ, ເຊິ່ງແມ່ນຕາແສງທີ່ເປັນແບບຢ່າງກ່ຽວກັບການກໍ່ສ້າງຊົນນະບົດໃໝ່ຢູ່ເມືອງ ແມ່ວວາກ. ບົນເສັ້ນທາງເບຕົງກວ້າງຂວາງຕາມເນີນພູຫີນ. ເຖິງວ່າມື້ນີ້ບໍ່ແມ່ນມື້ຕະຫຼາດນັດກໍ່ຕາມ, ແຕ່ບົນເສັ້ນທາງພັດມີຄົນ ແລະ ລົດໄປມາຢ່າງຄຶກໂຄມໜ້າແໜ້ນ … ອ້າຍ ວື່ມີ໋ກ໋າຍ, ບ້ານ ຕາລຸ່ງບີ, ຕາແສງ ຕາຫຼຸງ, ໃຫ້ຮູ້ວ່າ: ເສັ້ນທາງເບຕົງລະຫວ່າງບ້ານໄດ້ກໍ່ສ້າງສຳເລັດກ່ອນນີ້ເກືອບ 3 ປີ. ນັບແຕ່ວັນມີເສັ້ນທາງ, ການໄປມາພົວພັນຄ້າຂາຍກໍ່ສະດວກສະບາຍ. ຈາກນັ້ນລາຍຮັບ ແລະ ຊີວິດການເປັນຢູ່ຂອງປະຊາຊົນກໍ່ໄດ້ຮັບການຍົກສູງຂຶ້ນ. ບ້ານຫາກໍ່ເປີດສະຫຼອງຫໍວັດທະນະທຳ, ນີ້ຈະແມ່ນແຫ່ງເພື່ອໃຫ້ພໍ່ແມ່ປະຊາຊົນດຳເນີນຊີວິດ, ແນະນຳວັດທະນະທຳທີ່ເປັນເອກະລັກສະເພາະຂອງປະຊາຊົນບັນດາເຜົ່າໃນທ້ອງຖີ່ນ. ນັບແຕ່ປະຕິບັດໂຄງການກໍ່ສ້າງຊົນນະບົດໃໝ່, ມາຮອດປະຈຸບັນ, ຕາແສງ ຕາຫຼຸງ ສາມາດບັນລຸໄດ້ 8/19 ມາດຖານ. ທ່ານ ຮົ່ວມີ໋ຊິງ, ຫົວໜ້າຄະນະຄຸ້ມຄອງກໍ່ສ້າງຊົນນະບົດໃໝ່ຕາແສງ ຕາຫຼຸງ, ໃຫ້ຮູ້ວ່າ: ປະຊາຊົນບັນດາເຜົ່າໃນຕາແສງ ສະໜັບສະໜູນການກໍສ້າງຊົນນະບົດໃໝ່ທີ່ສຸດ. ປະຈຸບັນ, ຕາແສງ ຕາຫຼຸງ ພວມຜັນຂະຫຍາຍຫຼາຍຮູບແບບເຊັ່ນ: ປູກຫຍ້າລ້ຽງງົວ, ປູກສາລີ; ລ້ຽງໝູ, ລ້ຽງນົກກາງແກ… ຊ່ວຍຍົກສູງຊີວິດການເປັນຢູ່ຂອງປະຊາຊົນຂຶ້ນຕື່ມ. ລາຍຮັບສະເລ່ຍຂອງປະຊາຊົນໃນປີ 2014 ບັນລຸກວ່າ 6 ລ້ານດົ່ງ/ຄົນ/ປີ ແລະ ປີ 2015 ຈະຍົກຂຶ້ນ 8 ລ້ານດົ່ງ. ຈາກນັ້ນປະຊາຊົນໄດ້ເຫັນດີສະໜັບສະໜູນການກໍ່ສ້າງຊົນນະບົດໃໝ່.
“ຄວາມສະດວກໃນການກໍ່ສ້າງຊົນນະບົດໃໝ່ ແມ່ນໄດ້ຮັບການສະໜັບສະໜູນຈາກປະຊາຊົນ. ດັ່ງນັ້ນການຜັນຂະຫຍາຍບໍ່ປະສົບກັບຄວາມຫຍຸ້ງຍາກປານໃດ. ດ້ວຍຄວາມເຫັນດີເຫັນພ້ອມ ແລະ ການສະໜັບສະໜູນຂອງປະຊາຊົນ, ການຂົນຂວາຍກໍ່ສ້າງຊົນນະບົດໃໝ່ ໄດ້ຮັບການຜັນຂະຫຍາຍຢ່າງໄວ. ມີຫຼາຍຄອບຄົວໄດ້ປະກອບວັດຖຸ, ແຮງງານ ຫຼືບໍລິຈາກທີ່ດິນເພື່ອກໍ່ສ້າງບັນດາກິດຈະກຳສະຫວັດດີໃຫ້ແກ່ປະຊາຄົມ. ເພື່ອບັນລຸໄດ້ຜົນງານຄືປະຈຸບັນ, ພວກຂ້າພະເຈົ້າໄດ້ຈັດການປະຊຸມຫຼາຍຄັ້ງເພື່ອແບ່ງງານຢ່າງລະອຽດໃຫ້ແຕ່ລະບ້ານ ແລະ ອະທິບາຍຢ່າງຈະແຈ້ງໃຫ້ປະຊາຊົນ“.
(ພາບປະກອບ)
ຜ່ານ 4 ປີແຫ່ງການຜັນຂະຫຍາຍການກໍ່ສ້າງຊົນນະບົດໃໝ່, ເມືອງແມ່ວວາກ ໄດ້ກໍ່ສ້າງສຳເລັດທາງເບຕົງທີ່ຍາວນັບສິບກິໂລແມດ; ພື້ນຖານດ້ານວັດຖຸ, ໂຄງລ່າງໄດ້ຮັບການລົງທຶນກໍ່ສ້າງໃໝ່. ມາຮອດປະຈຸບັນໄດ້ມີ 1 ຕາແສງບັນລຸໄດ້ 12 ມາດຖານ, 2 ຕາແສງບັນລຸໄດ້ 10 ມາດຖານ ແລະ 14 ຕາແສງບັນລຸໄດ້ 6 ມາດຖານກ່ຽວກັບການກໍ່ສ້າງຊົນນະບົດໃໝ່. ທ່ານ ເຫົ່າມິງເລີ້ຍ, ເລຂາຄະນະພັກເມືອງ ແມ່ວວາກ, ຫົວໜ້າຄະນະຊີ້ນຳກໍ່ສ້າງຊົນນະບົດໃໝ່ເມືອງ ແມ່ວວາກ, ໃຫ້ຮູ້ວ່າ: ການຜັນຂະຫຍາຍການກໍ່ສ້າງຊົນນະບົດໃໝ່ໃນເມືອງປະສົບກັບຄວາມຫຍຸ້ງຍາກຫຼາຍຢ່າງ, ນັ້ນແມ່ນເງື່ອນໄຂເສດຖະກິດ, ຊີວິດຂອງປະຊາຊົນຍັງປະສົບກັບຄວາມຫຍຸ້ງຍາກ; ພື້ນຖານໂຄງລ່າງຍັງອ່ອນດ້ອຍ ແລະ ຂາດເຂີນ, ນອກນັ້ນປະຊາຊົນຍັງບໍ່ທັນເຂົ້າໃຈແຈ້ງຜົນປະໂຫຍດຈາກການກໍ່ສ້າງຊົນນະບົດໃໝ່.
“ເມືອງ ແມ່ວວາກ ກຳນົດກໍ່ສ້າງຊົນນະບົດໃໝ່ ແມ່ນແຜນນະໂຍບາຍທີ່ຖືກຕ້ອງເພື່ອຊ່ວຍປະຊາຊົນລົບລ້າງຄວາມອຶດຫີວ, ຫຼຸດຜ່ອນຄວາມທຸກຍາກ, ຍົກສູງລາຍຮັບ ແລະ ເຮັດໃຫ້ໂສມໜ້າຊົນນະບົດມີການປ່ຽນແປງ, ພິເສດແມ່ນຢູ່ເຂດພູດອຍ. ເມືອງ, ບ້ານໄດ້ຕັ້ງໜ້າເຂົ້າຮ່ວມການໂຄສະນາ, ຂົນຂວາຍປະຊາຊົນເຂົ້າຮ່ວມການກໍ່ສ້າງຊົນນະບົດໃໝ່. ການນຳໃຊ້ບັນດາແຫຼ່ງກຳລັງຈາກງົບປະມານແຫ່ງລັດ, ແຫຼ່ງສັງຄົມໃນການກໍ່ສ້າງຊົນນະບົດໃໝ່ໄດ້ຮັບການຜັນຂະຫຍາຍຢ່າງຕັ້ງໜ້າ ແລະ ມີປະສິດທິຜົນ.“
(ພາບປະກອບ)
ການເຮັດວຽກງານໂຄສະນາເປັນຢ່າງດີ, ແລະ ຜ່ານການພົບປະ, ຮັບຟັງຄວາມເຫັນຈາກປະຊາຊົນ, ພະນັງານເມືອງ ແມ່ວວາກ ໄດ້ຮັບການສະໜັບສະໜູນ, ຄວາມເຫັນດີເຫັນພ້ອມຈາກປະຊາຊົນ. ຈາກນັ້ນ, ເມືອງໄດ້ຜັນຂະຫຍາຍສຳເລັດບັນດາໂຄງການພັດທະນາຜົນລະປູກ, ສັດລ້ຽງໃຫ້ແກ່ປະຊາຊົນ; ບັນດານະໂຍບາຍລົບລ້າງຄວາມອຶດຫີວ, ຫຼຸດຜ່ອນຄວາມທຸກຍາກ, ໜູນຊ່ວຍຄອບຄົວທຸກຍາກ ເພື່ອຍົກສູງຊີວິດການເປັນຢູ່ໃຫ້ແກ່ປະຊາຊົນ. ທ່ານ ເຫົ່າມິງເລີ້ຍ, ໃຫ້ຮູ້ວ່າ:
“ເພື່ອເຮັດໃຫ້ປະຊາຊົນເຂົ້າໃຈແຈ້ງກ່ຽວກັບຄວາມໝາຍຂອງການກໍ່ສ້າງຊົນນະບົດໃໝ່, ພະນັກງານເມືອງແຕ່ລະຄົນ ລ້ວນແຕ່ເຂົ້າໃຈແຈ້ງຄວາມໝາຍ, ເນື້ອໃນ ແລະ ບັນດາຄາດໝາຍຂອງລາຍການ. ຈາກນັ້ນຜ່ານພະນັກງານຕາແສງ, ບ້ານ ໂຄສະນາໃຫ້ປະຊາຊົນຊາບຊືມທັດສະນະ, ແຜນນະໂຍບາຍ, ຄວາມໝາຍຂອງລາຍການ. ເພື່ອກໍ່ສ້າງຊົນນະບົດໃໝ່, ການນຳຕ້ອງໄປກ່ອນ, ເປັນແບບຢ່າງ ເພື່ອໃຫ້ປະຊາຊົນປະຕິບັດຕາມ“
ບົນພື້ນຖານບັນດາຜົນງານທີ່ບັນລຸໄດ້, ເມືອງ ແມ່ວວາກ ໄດ້ວາງຄາດໝາຍສູ້ຊົນ, ແຕ່ລະຕາແສງຕ້ອງມີແຕ່ 1-2 ບ້ານບັນລຸມາດຖານຊົນນະບົດໃໝ່. ພ້ອມທັງສືບຕໍ່ຍູ້ແຮງວຽກງານໂຄສະນາ ເພື່ອໃຫ້ປະຊາຊົນບັນດາເຜົ່າເປັນຈຳນວນຫຼວງຫຼາຍເຂົ້າໃຈໄດ້ຄວາມໝາຍ, ຜົນປະໂຫຍດ ຂອງການກໍ່ສ້າງຊົນນະບົດໃໝ່, ຈາກນັ້ນກໍ່ສ້າງ, ພັດທະນາຊີວິດທາງດ້ານເສດຖະກິດ, ວັດທະນະທຳ, ສ້າງໂສມໜ້າໃໝ່ໃຫ້ເມືອງເຂດພູດອຍແມ່ວວາກ.