(vovworld) - ໃນໄລຍະຜ່ານມາ, ຮູບແບບກູ້ຢືມທຶນຕາມໜ່ວຍຮ່ວມສຳພັນທຳການຜະລິດໂດຍສະມາຄົມຊາ ວກະສິກອນແຂວງ ໄຕນີງ ພ້ອມກັບທະນາຄານກະສິກຳ ແລະ ພັດທະນາຊົນນະບົດສາຂາ ໄຕນິງສົມທົບກັນຜັນຂະຫຍາຍໄດ້ຊ່ວຍເຫຼືອຊາວກະສິກອນນັບພັນ ຄອບຄົວພາຍໃນແຂວງ ຫລຸດຜົ້ນອອກຈາກຄວາມທຸກຍາກ ແລະ ສ້າງຄວາມຮັ່ງມີໄດ້. ຈາກຮູບແບບນີ້, ພໍ່ແມ່ປະຊາຊົນຊາວກະສິກອນສາມາດສຳພັດກັບແຫຼ່ງທຶນຈາກທະນາຄານຢ່າງ ສະດວກ ແລະ ວ່ອງໄວກ່ວາ, ການກູ້ຢືມໄດ້ຮັບການນຳໃຊ້ຢ່າງຖືກຕ້ອງຕາມຈຸດປະສົງ ແລະ ເປົ້າໝາຍ. ນີ້ກໍ່ແມ່ນແຫ່ງເພື່ອໃຫ້ພໍ່ແມ່ປະຊາຊົນຊາວກະສິກອນຝາກຄວາມໄວ້ ເນື້ອເຊື່ອໃຈ, ແບ່ງປັນບົດຮຽນໃນການຜະລິດ, ດຳເນີນທຸລະກິດ. ບົດຂຽນຂອງນັກຂ່າວ ງອກລວນ.
ທະນາຄານ Agribank ໃຫ້ຊາວກະສິກອນກູ້ຢືມທຶນ
(ພາບປະກອບ)
ຢູ່ບ້ານ ເຟືອກໂຮ້ຍ, ຕາແສງ ຊ໋ວຍດາ, ເມືອງ ເຢືອງມິງເຈົາ, ທ່ານ ຫວໍວັນແຕນ, ຫຼືເອີ້ນວ່າທ່ານ ນຳແຕນ ແມ່ນຜູ້ທີ່ມີຊື່ສຽງໃນການທຳມາຫາກິນເກັ່ງ, ແຕ່ລະປີສ້າງລາຍຮັບໄດ້ປະມານ 2 ຕື້ດົ່ງ. ເມື່ອດຳເນີນອາຊີບ, ທ່ານມີເນື້ອທີ່ດິນກະສິກຳ 1 ເຮັກຕາໂດຍພໍ່ແມ່ປະໄວ້ໃຫ້. ທ່ານ ນຳແຕນ ໃຫ້ຮູ້ວ່າ, ເມື່ອສ້າງຄວາມຮັ່ງມີໄດ້ຄືໃນປະຈຸບັນ, ສ່ວນໜຶ່ງແມ່ນອີງໃສ່ແຫຼ່ງທຶນກູ້ຢືມຈາກທະນາຄານ.
“ຖ້າວ່າປູກຕົ້ນຫຍັງ ແລະ ລ້ຽງສັດໂຕໃດກໍ່ຕ້ອງມີທີ່ດິນ. ຂ້າພະເຈົ້າເຄີຍປູກປ່າ ແລະ ປູກຕົ້ນໄມ້ມາຫຼາຍປີແລ້ວ. ໃນການຜະລິດກະສິກຳ, ຖ້າຫາກຂ້າພະເຈົ້າຂາດທຶນຮອນ, ເທົາໃດ ທະນາຄານກໍ່ຕອບສະໜອງໃຫ້ເທົ່ານັ້ນໃນທັນທີ. ດັ່ງນັ້ນວຽກງານຂອງຂ້າພະເຈົ້າຈຶ່ງພັດທະນາຢ່າງແຮງ.”
ທ່ານ ນຳແຕນ ແມ່ນໜຶ່ງໃນຈຳນວນເກືອບ 90.000 ຄອບຄົວສະມາຊິກຂອງໜ່ວຍຮ່ວມສຳພັນທຳການຜະລິດຢູ່ແຂວງ ໄຕນີງ ໄດ້ກູ້ຢືມທຶນຈາກທະນາຄານກະສິກຳ ແລະ ພັດທະນາຊົນນະບົດ ເພື່ອສ້າງເສດຖະກິດ. ຮູບແບບນີ້ໄດ້ຮັບຖືວ່າແມ່ນຂົວເຊື່ອມຕໍ່ລະຫວ່າງຊາວກະສິກອນ ກັບທະນາຄານກະສິກຳ ແລະ ພັດທະນາຊົນນະບົດ. ຈາກຮູບແບບນີ້, ພໍ່ແມ່ປະຊາຊົນຊາວກະສິກອນສາມາດສຳພັດກັບແຫຼ່ງທຶນຈາກທະນາຄານ ໄດ້ຢ່າງສະດວກ ແລະ ວ່ອງໄວກ່ວາ, ຊ່ວຍໃຫ້ເຂົ້າເຈົ້ານຳໃຊ້ທຶນກູ້ຢືມຖືກຕ້ອງຕາມຈຸດປະສົງ. ທ່ານ ຟ້າມວັນໄຕ໋, ຫົວໜ້າໜ່ວຍຮ່ວມສຳພັນທຳການຜະລິດຢູ່ບ້ານ ເຟືອກບີ່ງ 2, ຕາແສງ ຊ໋ວຍດາ, ເມືອງ ເຢືອງມິງເຈົາ, ໃຫ້ຮູ້ວ່າ: ປະຈຸບັນ, ໜ່ວຍຂອງທ່ານມີເກືອບ 50 ຄອບຄົວເຂົ້າຮ່ວມການກູ້ຢືມທຶນດ້ວຍຈຳນວນທຶນກູ້ຢືມແມ່ນເກືອບ 2 ຕື້ດົ່ງ. ມາຮອດປະຈຸບັນ, ບັນດາຄອບຄົວນີ້ລ້ວນແຕ່ມີເສດຖະກິດເປັນປົກກະຕິ, ລູກຫຼານຮຳ່ຮຽນນັບມື້ນັບດີກ່ວາເກົ່າ.
“ຖ້າຂ້າພະເຈົ້າທຳການຜະລິດໄດ້ດີ ຈະຊື້ທີ່ດິນຕື່ມອີກ, ຖ້າຂາດທຶນຂ້າພະເຈົ້າຈະ ກູ້ຢືມທະນາຄານຕື່ມອີກ. ປະຈຸບັນ, ຂ້າພະເຈົ້າມີທີ່ດິນປູກຕົ້ນໄມ້ກິນໝາກ 3 ເຮັກຕາ. ຕົວຢ່າງຄື ຖ້າຫາກບໍ່ທັນຮອດລະດູການໄດ້ເກັບກຽວໝາກໄມ້, ບໍ່ທັນມີເງິນໃຊ້ໜີ້ໃຫ້ທະນາຄານ, ທະນາຄານຈະຕໍ່ກຳນົດເວລາ ຕື່ມອີກເພື່ອສ້າງເງື່ອນໄຂໃຫ້ຂ້າພະເຈົ້າໃຊ້ໜີ້.”
ໃນວິວັດແຫ່ງການຜະລິດນັ້ນ, ຖ້າຫາກສະມາຊິກຂອງໜ່ວຍຮ່ວມສຳພັນທຳການຜະລິດກູ້ຢືມທຶນປະສົບກັບຄວາມສ່ຽງ ຈະຕິດຕໍ່ພົວພັນກັບທະນາຄານໃນທັນທີເພື່ອຊອກຫາວິທີແກ້ໄຂ. ທະນາຄານຈະພິຈາລະນາຕໍ່ກຳນົດເວລາກູ້ຢືມທຶນໃຫ້ແກ່ຊາວກະສິກອນ ເມື່ອການປູກຝັງຂອງເຂົາເຈົ້າປະສົບກັບໄພພິບັດທຳມະຊາດ ຫຼື ໂລກລະບາດ. ໃນການລ້ຽງສັດ, ຖ້າຫາກການໃຊ້ໜີ້ກ່ອນເວລາຂາຍສັດລ້ຽງໄດ້, ທະນາຄານກໍ່ພິຈາລະນາໜູນຊ່ວຍ, ຕໍ່ກຳນົດເວລາກູ້ຢືມທຶນເພື່ອໃຫ້ຊາວກະສິກອນອຸ່ນອ່ຽນໃຈລ້ຽງສັດ ແລະ ສ້າງລາຍຮັບ. ຈາກຮູບແບບກູ້ຢືມທຶນຕາມໜ່ວຍຮ່ວມສຳພັນ, ຄົວຄອບຊາວກະສິກອນຈາກການຜະລິດ, ລ້ຽງສັດແບບກະແຈກກະຈາຍບໍ່ມີລວມສູນ, ປະຈຸບັນໄດ້ພັດທະນາການຜະລິດດ້ວຍຂອບຂະໜາດໃຫຍ່ກ່ວາ. ທ່ານ ເຈີ່ນວັນເຮີ້ນ, ປະທານສະມາຄົມຊາວກະສິກອນ ແຂວງ ໄຕນີງ, ໃຫ້ຮູ້ວ່າ:
“ເມື່ອສ້າງສຳເລັດສຳເນົາເອກະສານໃນເວລາພຽງ 4 ວັນເທົ່ານັ້ນ, ຊ້າສຸດແມ່ນ 4 ວັນພໍ່ແມ່ປະຊາຊົນກໍ່ສາມາດກູ້ຢືມເງິນໄດ້. ນີ້ໄດ້ຮັບຖືວ່າແມ່ນການປະຕິຮູບລະບຽບການບໍລິຫານຢ່າງມີປະສິດທິຜົນ, ຊ່ວຍໃຫ້ພໍ່ແມ່ປະຊາຊົນຊາວກະສິກອນກູ້ຢືມເງິນ, ເພື່ອລົງທຶນທຳການຜະລິດຢ່າງທັນການ”
ຊາວກະສິກອນແຂວງ ໄຕນີງ
(ພາບປະກອບ)
ມາຮອດປະຈຸບັນ, ທະນາຄານກະສິກຳ ແລະ ພັດທະນາຊົນນະບົດ, ສາຂາແຂວງ ໄຕນີງ ໄດ້ໜູນຊ່ວຍໜ່ວຍຮ່ວມສຳພັນທຳການຜະລິດກ່ວາ 1.900 ໜ່ວຍກູ້ຢືມເງິນກ່ວາ 1.000 ຕື້ດົ່ງ. ທ່ານ ຫວໍຕື້ທ້ຽນ, ຜູ້ອຳນວຍການ Agribank ສາຂາ ໄຕນີງ, ໃຫ້ຮູ້ວ່າ: ໜ່ວຍກູ້ຢືມຮ່ວມສຳພັນທຳການຜະລິດຍັງແມ່ນບ່ອນທີ່ພໍ່ແມ່ປະຊາຊົນຊາວກະສິກອນຝາກຝັງຄວາມໄວ້ເນື້ອເຊື່ອໃຈ, ແບ່ງປັນບົດຮຽນໃນການຜະລິດດຳເນີນທຸລະກິດ. ເພື່ອຮ່ວມເດີນທາງພ້ອມກັບຊາວກະສິກອນ, ຍາມໃດທະນາຄານກໍ່ຮັກສາການພົວພັນຢ່າງແໜ້ນແຟ້ນກັບບັນດາອົງການຈັດຕັ້ງມະຫາຊົນ, ພິເສດແມ່ນສະມາຄົມຊາວກະສິກອນ.
“ພວກຂ້າພະເຈົ້າໄດ້ສົ່ງພະນັກງານເຂົ້າຮ່ວມບັນດາອົງການຈັດຕັ້ງມະຫາຊົນ, ຊຳ້ບໍ່ໜຳແມ່ນບັນດາອົງການສະມາຄົມອາຊີບຄື: ວິສາຫະກິດ, ສະມາຄົມວິສາຫະກິດ, ນັກທຸລກິດ. ເຂົ້າຮ່ວມບັນດາອົງການຄືແນວນັ້ນ, ພະນັກງານທະນາຄານຈະເຂົ້າໃຈໄດ້ ແລະ ກຳແໜ້ນສະພາບການຕົວຈິງ, ເຂົາເຈົ້າກໍຈະເຂົ້າໃຈອີກກ່ຽວກັບບັນດາການເຄື່ອນໄຫວຂອງທະນາຄານ. ຈາກນັ້ນ, ຜັນຂະຫຍາຍບັນດາການເຄື່ອນໄຫວຂອງທະນາຄານເຖິງປະຊາຊົນຢ່າງມີປະສິດທິຜົນ.”
ຜ່ານບັນດາໜ່ວຍຮ່ວມສຳພັນທຳການຜະລິດ, ປະຊາຊົນມີກາລະໂອກາດເພື່ອສະແດງຄວາມມຸ່ງມາດປາດຖະໜາ, ຄວາມຕ້ອງການດ້ານທຶນຮອນຂອງຕົນ. ດ້ວຍວິທີການໜູນຊ່ວຍທຶນຮອນໂດຍກົງໃຫ້ແກ່ພໍ່ແມ່ປະຊາຊົນຢ່າງມີໄຫວພິບ, ເໝາະສົມກັບທະນາຄານກະສິກຳ ແລະ ພັດທະນາຊົນນະລະບົດນັ້ນໄດ້ຊ່ວຍໃຫ້ປະຊາຊົນຫລຸດຜົ້ນອອກຈາກຄວາມທຸກຍາກ ແລະ ສ້າງຄວາມຮັ່ງມີສຳເລັດ.