(vovworld) – ຢູ່ນອກກອງປະຊຸມລັດຖະມົນຕີການຕ່າງປະເທດ ກຸ່ມບັນດາພື້ນຖານເສດຖະກິດພັດທະນາ ແລະ ຫາກໍ່ພົ້ນເດັ່ນແຖວໜ້າໂລກ (G20) ທີ່ພວມດຳເນີນຢູ່ນະຄອນ ບອນ, ປະເທດ ເຢັຍລະມັນ, ວັນທີ 17/2, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຫວຽດນາມ ຟ້າມບິ່ງມິງ ໄດ້ມີການພົບປະກັບທ່ານ ລັດຖະມົນຕີການຕ່າງປະເທດ ອາເມລິກາ Rex Tillerson. ນະທີ່ນີ້, ທ່ານຮອງນາຍົກລັດຖະມົນຕີ ຟ້າມບິ່ງມິງ ຢືນຢັນວ່າ ຫວຽດນາມຖືເປັນສຳຄັນ ແລະ ປາຖະໜາຢາກເພີ່ມທະວີການພົວພັນມິດຕະພາບ, ການຮ່ວມມື, ຄູ່ຮ່ວມມືຮອບດ້ານກັບ ອາເມລິກາບົນພື້ນຖານເຄົາລົບລະບອບການເມືອງຂອງກັນ, ຕອບສະໜອງຜົນປະໂຫຍດຂອງປະຊາຊົນສອງປະເທດ. ສອງຝ່າຍເຫັນດີເປັນເອກະສັນຄວນສືບຕໍ່ການແລກປ່ຽນຄະນະຜູ້ແທນ ແລະ ການພົບປະຂັ້ນສູງ. ລັດຖະມົນຕີການຕ່າງປະເທດ Rex Tillerson ສະແດງຄວາມປາຖະໜາຢາກມາຢ້ຽມຢາມ ຫວຽດນາມ ແລະ ເຂົ້າຮ່ວມການເຄື່ອນໄຫວຕ່າງໆໃນຂອບເຂດປີ APEC 2017 ຢູ່ ຫວຽດນາມ.
ຮອງນາຍົກລັດຖະມົນຕີ ຟ່າມບີ່ງມີງ ແລະ ລັດຖະມົນຕີການຕ່າງປະເທດ ອາເມລິກາ Rex Tillerson
|
ໃນການພົບປະກັບ ລັດຖະມົນຕີການຕ່າງປະເທດ ອັງກິດ Boris Johnson, ລັດຖະມົນຕີການຕ່າງປະເທດ ທັງສອງທ່ານເຫັນດີເປັນເອກະສັນເພີ່ມທະວີການແລກປ່ຽນຄະນະຜູ້ແທນຂັ້ນສູງ ແລະ ການຮ່ວມມືດ້ານເສດຖະກິດ, ການຄ້າ, ການລົງທຶນ, ການສຶກສາ, ການບຳລຸງສ້າງ, ການທ່ອງທ່ຽວ… ລະຫວ່າງສອງປະເທດ. ທ່ານ ລັດຖະມົນຕີ Boris Johnson ຢືນຢັນວ່າ, ອັງກິດຈະສືບຕໍ່ສະໜັບສະໜູນເພີ່ມທະວີການພົວພັນ, ຮ່ວມສຳພັນ ແລະ ຫັນການຄ້າເປັນເສລີລະຫວ່າງ ຫວຽດນາມກັບ ເອີລົບ.
ລັດຖະມົນຕີການຕ່າງປະເທດທັງສອງທ່ານເຫັນດີຕໍ່ຄວາມສຳຄັນຂອງເລື່ອງຮັກສາສັນຕິພາບ, ສະຖຽນລະພາບ, ຄວາມເສລີ, ຄວາມໝັ້ນຄົງ, ຄວາມປອດໄພໃນການເດີນທະເລ ແລະ ການບິນ, ຮັບປະກັບເຄົາລົບກົດໝາຍຢູ່ເຂດທະເລ ແລະ ມະຫາສະໝຸດ, ແກ້ໄຂການຂັດແຍ້ງກັນດ້ວຍສັນຕິພິທີ, ບົນພື້ນຖານກົດໝາຍສາກົນ, ໃນນັ້ນມີສົນທິສັນຍາກົດໝາຍວ່າດ້ວຍທະເລປີ 1982 ຂອງ ສະຫະປະຊາຊາດ
ທີ່ການພົບປະກັບ ລັດຖະມົນຕີການຕ່າງປະເທດ ບຣາຊິນ José Serra, ທ່ານຮອງນາຍົກລັດຖະມົນຕີ ຟ້າມບິ່ງມິງ ຖືເປັນສຳຄັນ ແລະ ປາຖະໜາຢາກຊຸກຍູ້ການພົວພັນມິດຕະພາບ, ການຮ່ວມມືຫຼາຍດ້ານກັບ ບຣາຊິນ. ສອງຝ່າຍເຫັນດີເປັນເອກະພາບທີ່ຖືວ່າ, ຄວນສືບຕໍ່ເພີ່ມທະວີການແລກປ່ຽນຄະນະຜູ້ແທນທຸກຂັ້ນ, ເພື່ອປັບປຸງການພົວພັນດ້ານການເມືອງລະຫວ່າງສອງປະເທດ; ປະຕິບັດຄາດໝາຍຍົກວົງເງິນການຄ້າສອງສົ້ນຂຶ້ນ 10 ຕື້ USD ໃນປີ 2020. ທ່ານຮອງນາຍົກລັດຖະມົນຕີ ຟ້າມບິ່ງມິງ ສະເໜີລັດຖະບານ ບຣາຊິນອອກຖະແຫຼງຮັບຮອງກົດລະບຽບເສດຖະກິດການຕະຫຼາດຂອງ ຫວຽດນາມ ໂດຍໄວ. ທັງສອງຝ່າຍຍັງແລກປ່ຽນບັນດາມາດຕະການເພີ່ມທະວີການສົມທົບ ແລະ ສະໜັບສະໜູນເຊິ່ງກັນ ແລະ ກັນຢູ່ບັນດາເວທີປາໄສຫຼາຍຝ່າຍ, ພິເສດແມ່ນ ສະຫະປະຊາຊາດ.