(vovworld) – ຕອນເຊົ້າວັນທີ 14/8, ຢູ່ ຮ່າໂນ້ຍ, ທ່ານດິງເທ໋ຮິງ, ເລຂາສູນກາງພັກ, ຫົວໜ້າຄະນະສຶກສາສູນກາງ, ພ້ອມກັບຄະນະປະຕິບັດງານຂອງກົມການເມືອງ ດຳເນີນການກວດກາການປະຕິບັດມະຕິສູນກາງຄັ້ງທີ 4 (ຊຸດທີ 11) “ບາງບັນຫາຮີບດ່ວນກ່ຽວກັບການກໍ່ສ້າງພັກໃນປະຈຸບັນ” ແລະ ຄຳສັ່ງເລກທີ 03 ຂອງກົມການເມືອງກ່ຽວກັບການສືບຕໍ່ຍູ້ແຮງການຮຳ່ຮຽນ ແລະ ປະຕິບັດຕາມແບບຢ່າງຄຸນສົມບັດປະທານ ໂຮ່ຈີມິນ ຢູ່ ກະຊວງວັດທະນະທຳ, ກິລາ ແລະ ທ່ອງທ່ຽວ. ກ່າວຄຳເຫັນທີ່ການເຮັດວຽກ, ທ່ານດິງເທ໋ຮິງ ຢືນຢັນວ່າ: ມະຕິສູນກາງຄັ້ງທີ 4 ທີ່ໄດ້ຮັບການຜັນຂະຫຍາຍປະຕິບັດໃນ 1 ປີກວ່າທີ່ຜ່ານມາໄດ້ປະກອບສ່ວນສະກັດກັ້ນ, ຍູ້ບັນດາບັນຫາຮີບດ່ວນທີ່ສຸດໃນວຽກງານກໍ່ສ້າງພັກປະຈຸບັນນີ້ໃຫ້ຖອຍໄປ. ນັ້ນແມ່ນສະພາບການເສື່ອມທາດເສຍຄຸນກ່ຽວກັບແນວຄິດການເມືອງ, ຄຸນສົມບັດ ແບບແຜນດຳລົງຊີວິດໃນໝູ່ພະນັກງານ, ສະມາຊິກພັກຈຳນວນໜຶ່ງ, ແກ້ໄຂຈຳກັດຂໍ້ຂາດຕົກບົກຜ່ອງເພື່ອກໍ່ສ້າງຖັນແຖວພະນັກງານ... ທ່ານດິງເທ໋ຮິງ ເນັ້ນໜັກວ່າ:
“ປະຕິບັດແຜນນະໂຍບາຍຂອງສູນກາງ, ກົມການເມືອງໃນປີ 2013 ຈະຈັດຕັ້ງບັນດາຄະນະກວດກາຢູ່ຄະນະພັກແຂວງ, ຄະນະພັກຂຶ້ນກັບສູນກາງ, ຄະນະເລຂາພັກຂອງອົງການສູນກາງ. ຜ່ານນັ້ນ, ຮັບຟັງບັນດາສະຫາຍສະເໜີຕໍ່ກົມການເມືອງ, ຄະນະເລຂາມາດຕະການປະຕິບັດມະຕິສູນກາງຄັ້ງທີ 4 ແລະ ຄຳສັ່ງເລກທີ 3 ຂອງກົມການເມືອງ ເຮັດໃຫ້ມະຕິຂອງສູນກາງ, ຄຳສັ່ງຂອງກົມການເມືອງບັນລຸປະສິດທິຜົນໃນຕົວຈິງ, ປະກອບສ່ວນສ້າງພັກເຮົາໃຫ້ປອດໄສ, ໝັ້ນຄົງເຂັ້ມແຂງຢ່າງແທ້ຈິງ, ປັບປຸງຄວາມໄວ້ເນື້ອເຊື່ອໃຈຂອງປະຊາຊົນເພື່ອໃຫ້ພັກກອມມູນິດ ຫວຽດນາມ ປະຕິບັດພາລະກິດສ້າງສາ ແລະ ປົກປັກຮັກສາປະເທດຊາດຢ່າງມີໄຊ.”
ແລະກໍ່ໃນວັນດຽວກັນ, ທ່ານຮອງນາຍົກລັດຖະມົນຕີ ຫງວຽນຊວນຟຸກ ມີການເຮັດວຽກກັບຄະນະເລຂາພັກ ຄະນະຊົນເຜົ່າກ່ຽວກັບເລື່ອງປະຕິບັດມະຕິສູນກາງຄັ້ງທີ 4 ແລະ ຄຳສັ່ງເລກທີ 03 ຂອງກົມການເມືອງ.