(vovworld) - ວັນທີ 27/11, ທີ່ການຕ້ອນຮັບທ່ານນາງຮອງປະທານາທິບໍດີບຸນກາຣີ Margarita Popova ພວມຢ້ຽມຢາມຫວຽດນາມ ຢ່າງເປັນທາງການ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ຢືນຢັນວ່າ, ຍາມໃດຫວຽດນາມ ກໍຖືເປັນສຳຄັນການພົວພັນມິດຕະພາບທີ່ເປັນມູນເຊື້ອກັບບຸນກາຣີ ໃນວິວັດການປະຕິບັດນະໂຍບາຍຫັນການພົວພັນທາງການທູດ ເປັນຫຼາຍຝ່າຍ, ຫຼາຍຮູບຫຼາຍແບບ. ຍາມໃດຫວຽດນາມ ກໍຈົດຈຳການສະໜັບສະໜູນ ແລະ ການຊ່ວຍເຫຼືອອັນຍິ່ງໃຫຍ່, ມີປະສິດທິຜົນຂອງປະຊາຊົນ ແລະ ລັດຖະບານບຸນກາຣີ ສຳລັບພາລະກິດສ້າງສາ ແລະ ປົກປັກຮັກສາປະເທດຊາດຂອງຫວຽດນາມ. ທ່ານປະທານສະພາແຫ່ງຊາດ ເຊື່ອໝັ້ນວ່າ, 2 ປະເທດຈະສືບຕໍ່ຮ່ວມມືຢ່າງເລິກເຊິງ, ກວ້າງແຂວງໃນທຸກຂົງເຂດ ເພື່ອນຳການພົວພັນຮ່ວມມືໃຫ້ຂຶ້ນສູ່ລະດັບສູງໃໝ່, ຕອບສະໜອງຄວາມມຸ່ງມາດປາດຖະໜາຂອງປະຊາຊົນ 2 ປະເທດ.
ກ່່າວຄຳເຫັນທີ່ການຕ້ອນຮັບທ່ານນາງຮອງປະທານາທິບໍດີບຸນກາຣີ Margarita Popova, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ຕີລາຄາສູງໝາກຜົນການເຈລະຈາລະຫວ່າງທ່ານນາງຮອງປະທານາທິບໍດີບຸນກາຣີ ແລະ ທ່ານນາງຮອງປະທານປະເທດ ຫງວຽນທິຢວານ; ພ້ອມທັງສະເໜີໃຫ້ 2 ຝ່າຍ ຕ້ອງສືບຕໍ່ສົມທົບກັນຢ່າງແໜ້ນແຟ້ນ, ຜັນຂະຫຍາຍບັນດາເນື້ອໃນຮ່ວມມືເຊິ່ງການນຳຂັ້ນສູງ 2 ປະເທດໄດ້ຕົກລົງຢ່າງແທດຈິງ ແລະ ມີປະສິດທິຜົນ, ນຳການພົວພັນລະຫວ່າງ 2 ປະເທດໃຫ້ພັດທະນາຂຶ້ນສູ່ລະດັບສູງໃໝ່.