( vovworld ) - ເນື່ອງໃນອກາດສະເຫຼີມສະຫຼອງ 65 ປີແຫ່ງວັນທະຫານເສຍອົງຄະ ແລະ ນັກຮົບທີ່ເສຍສະຫຼະຊີວິດເພື່ອຊາດ (27/7), ວັນທີ 24/7, ທ່ານນາງຮອງປະທານປະເທດຫວຽດນາມ Nguyen Thi Doan ໄດ້ລົງຢ້ຽມຢາມ ແລະມອບຂອງຂວັນໃຫ້ແກ່ບັນດາເປົ້າໝາຍນະໂຍບາຍຢູ່ແຂວງນິງບິ່ງ. ທ່ານນາງຮອງປະທານປະເທດ Nguyen Thi Doan ໄດ້ລົງຢ້ຽມຢາມສູນປິ່ນປົວພະຍາດ ແລະ ບຳລຸງສຸຂະພາບທະຫານເສຍອົງຄະຢູ່ເມືອງ ຫຍໍກວານ, ແຂວງນິງບິ່ງ, ບ່ອນທີ່ພວມປິ່ນປົວໃຫ້ແກ່ຄົນເຈັບ 130 ຄົນ, ໃນນັ້ນມີທະຫານເສຍອົງຄະ ແລະ ເຈັບປ່ວຍໜັກຫຼາຍຄົນ. ທ່ານນາງຮອງປະທານປະເທດໄດ້ສະເໜີໃຫ້ບັນດາອົງການສຳນັກງານທີ່ມີໜ້າທີ່ຂອງແຂວງນິງບິ່ງ ຈົ່ງເອົາໃຈໃສ່ແກ້ໄຂບັນດາລະບອບນະໂຍບາຍໃຫ້ຜູ້ມີຄຸນງາມຄວາມດີເປັນປະຈຳ, ພ້ອມກັນນັ້ນກໍຊ່ວຍເຫຼືອລູກຫຼານບັນດາຄອບຄົວນະໂຍບາຍໄດ້ຮຽນວິຊາຊີບ ແລະ ມີວຽກເຮັດງານທຳເປັນປົກກະຕິ.
ແລະກໍ່ໃນຕອນເຊົ້າວັນດຽວກັນ, ທ່ານຮອງປະທານສະພາແຫ່ງຊາດ Uong Chu Luu ກໍລົງຢ້ຽມຢາມ ແລະ ມອບຂອງຂວັນໃຫ້ແກ່ເປົ້າໝາຍນະໂຍບາຍໃນແຂວງນິງບິ່ງເຊັ່ນດຽວກັນ.
ສ່ວນຢູ່ແຂວງດັກນົງ, ກໍໄດ້ຈັດການພົບປະກັບແມ່ຫວຽດນາມວິລະຊົນ, ພະນັກງານນັກປະຕິວັດຜູ້ອະວຸໂສ, ບັນດາທະຫານເສຍອົງຄະ ແລະ ເຈັບປ່ວຍ... ເກືອບ 200 ຄົນ. ກ່າວຄຳຫັນທີ່ການພົບປະ, ທ່ານ Bui Quoc Bao, ທະຫານເສຍອົງຄະ, ຢູ່ເມືອງ ດັກລອງ ໄດ້ເວົ້າວ່າ.
“ໂດຍໄດ້ຮັບຄວາມເອົາໃຈໃສ່ຈາກພັກ ແລະ ລັດ ເພາະສະນັ້ນບັນດາຄອບຄົວເປົ້າໝາຍນະໂຍບາຍລ້ວນແຕ່ໄດ້ຮັບການຕອບສະໜອງຢ່າງເຕັມສ່ວນ, ໂດຍສະເພາະແມ່ນຊີວິດທາງດ້ານວັດຖຸກໍຄືທາງດ້ານຈິດໃຈ. ແຕ່ລະປີປະທານເມືອງ, ເລຂາພັກເມືອງລ້ວນແຕ່ລົງພົບປະໂດຍກົງກັບບັນດາຄອບຄົວທີ່ມີນັກຮົບເສຍສະຫຼະຊີວິດເພື່ອຊາດ, ທະຫານເສຍອົງຄະ ແລະ ທະຫານເຈັບປ່ວຍ ເພື່ອຢື້ຢາມຖາມຂ່າວ, ມອບຂອງຂວັນ ແລະ ລະດົມກຳລັງໃຈ ນັ້ນແມ່ນສິ່ງທີ່ມີຄວາມໝາຍຢ່າງໃຫຍ່ຫຼວງ. ພວກຂ້າພະເຈົ້າກໍຈະຮັກສາ, ເສີມຂະຫຍາຍຈິດໃຈປະຕິວັດທີ່ມີຢູ່ແລ້ວຂອງຕົນ ເຊິ່ງໄດ້ອຸທິດສ່ວນໃຫ້ແກ່ປະເທດຊາດ, ແລະ ໃນການດຳລົງຊີວິດປະຈຸບັນພວກຂ້າພະເຈົ້າກໍຈະມານະພະຍາຍາມເພື່ອເປັນແບບຢ່າງໃຫ້ທຸກຄົນຮໍ່າຮຽນ ແລະ ປະຕິບັດຕາມ”.