ການນຳບັນດາປະເທດເຂົ້າຮ່ວມກອງປະຊຸມ
ສຸດຍອດຄວາມໝັ້ນຄົງ, ປອດໄພນິວເຄຼຍຄັ້ງທີ 3
(ພາບ: VGP/Nhật Bắc)
(vovworld)- ຕອນເຊົ້າວັນທີ 30/3, ທ່ານນາຍົກລັດຖະມົນຕີຫວຽດນາມ ຫງວຽນເຕີນຢູງ ນຳໜ້າຄະນະຜູ້ແທນຫວຽດນາມ ໄດ້ເດີນທາງກັບເມືອຮອດຮ່າໂນ້ຍ ສິ້ນສຸດການເຂົ້າຮ່ວມກອງປະຊຸມສຸດຍອດຄວາມໝັ້ນຄົງ, ປອດໄພນິວເຄຼຍຄັ້ງທີ 3 ຢູ່ລາໄຮ ປະເທດໂຮນລັງ, ການຢ້ຽມຢາມປະເທດ ສ.ກູບາ ແລະ ສ.ໄຮຕີ ແຕ່ວັນທີ 23-29/3 ຢ່າງຈົບງາມ. ເນື່ອງໃນໂອກາດນີ້, ທ່ານຮ່າກິມງອກ, ຮອງລັດຖະມົນຕີການຕ່າງປະເທດຫວຽດນາມ ໄດ້ຕອບສຳພາດຕໍ່ນັກຂ່າວກ່ຽວກັບໝາກຜົນການໄປປະຕິ ບັດງານຂອງທ່ານນາຍົກລັດຖະມົນຕີຫວຽດນາມ ຫງວຽນເຕີນຢູງ.
ທ່ານຮອງລັດຖະມົນຕີການຕ່າງປະເທດຫວຽດນາມ ຮ່າກິມງອກ ໃຫ້ຮູ້ວ່າ: ການຢ້ຽມຢາມໂຮນລັງ ແລະ ເຂົ້າຮ່ວມກອງປະຊຸມສຸດຍອດ ຄວາມໝັ້ນຄົງ, ປອດໄພ ນິວເຄຼຍຄັ້ງທີ 3 ຂອງທ່ານນາຍົກລັດຖະມົນຕີຫວຽດນາມ ຫງວຽນເຕີນຢູງ ບັນລຸໄດ້ຜົນງານພົ້ນເດັ່ນ 3 ຢ່າງ. ນັ້ນແມ່ນຫວຽດນາມ ໄດ້ຕັ້ງໜ້າ ແລະ ເປັນເຈົ້າການປະກອບສ່ວນເຂົ້າໃນຄວາມມານະພະຍາຍາມລວມຂອງປະຊາໂຄມໂລກ, ຮັກສາສັນຕິພາບ, ຄວາມສະຫງົບປອດໄພດ້ານນິວເຄຼຍໃນທົ່ວໂລກ ຜ່ານການເພີ່ມທະວີການປົດອາວຸດນິວເຄຼຍ, ບໍ່ແຜ່ຂະຫຍາຍອາວຸດນິວເຄຼຍ, ປະກອບສ່ວນຊຸກຍູ້ການນຳໃຊ້ພະລັງງານນິວເຄຼຍດ້ວຍຈຸດປະສົງສັນຕິພາບ. ບັນດາການເຄື່ອນໄຫວຂອງ ທ່ານນາຍົກລັດຖະມົນຕີ ແລະ ຄະນະຜູ້ແທນຫວຽດນາມ ໄດ້ສ້າງຄວາມປະທັບໃຈອັນດີງາມໃຫ້ແກ່ເພື່ອນມິດສາກົນ ແລະ ປະເທດເຈົ້າພາບໂຮນລັງ ກ່ຽວກັບປະເທດຫວຽດນາມ ມີຄວາມຮັບຜິດຊອບ, ຂະຫຍັນຂັນເຄື່ອນ, ຕັ້ງໜ້າ, ມີຄວາມເຊື່ອໝັ້ນຕົນເອງ.
ປະທານາທິບໍດີແລະນາຍົກລັດຖະມົນຕີໄຮຕີຕ້ອນຮັບທ່ານຫງວຽນເຕີນຢູງ
(ພາບ:vov)
ການຢ້ຽມມຢາມສອງປະເທດເພື່ອນມິດທີ່ເປັນມູນເຊື້ອຢູ່ອາເມລິກາລາຕິນຄືກູບາ ແລະ ໄຮຕີ ຢ່າງເປັນທາງການຂອງທ່ານນາຍົກລັດຖະມົນຕີຫວຽດນາມ ໄດ້ສ້າງບາດກ້າວບຸກທະລຸໃໝ່, ນຳຫຼາຍເນື້ອໃນຮ່ວມມືເຂົ້າສູ່ລວງເລິກ, ມີປະສິດທິຜົນ, ແທດຈິງ. ຕາມທ່ານຮອງລັດຖະມົນຕີການຕ່າງປະເທດຫວຽດນາມ ຮ່າກິມງອກ ແລ້ວ, ການຢ້ຽມຢາມກູບາ ຂອງທ່ານນາຍົກລັດຖະມົນຕີຫວຽດນາມ ໄດ້ປະກອບສ່ວນຍົກການພົວພັນຮ່ວມມືລະຫວ່າງສອງປະເທດຂຶ້ນສູ່ລະດັບສູງໃໝ່. ສ່ວນການຢ້ຽມຢາມໄຮຕີ ເປັນຄັ້ງທຳອິດຂອງທ່ານນາຍົກລັດຖະມົນຕີຫວຽດນາມ ຖືກຖືວ່າ ແມ່ນການຢ້ຽມຢາມເປີດແງ່ຫວັງແຫ່ງການຮ່ວມມືທີ່ເລິກເຊິ່ງກ້ວາງຂວາງກ່ວາອີກໃນຫຼາຍຂົງເຂດຄື: ການຜະລິດໄຟຟ້າ, ນ້ຳມັນອາຍແກັດ, ຕ່ຳແຜ່ນຕັດຫຍີບ, ຂຸດຄົ້ນແຮ່ທາດ, ສາທາລະນະສຸກ, ກໍ່ສ້າງ, ການທ່ອງທ່ຽວ, ສິນໃນນ້ຳ…./.