(vovworld) - ວັນທີ 28 ສິງຫາ, ບັນດາວິສາຫະກິດອັນດັບໜຶ່ງໃນຂົງເຂດປຸງແຕ່ງສະບຽງອາຫານຂອງຫວຽດນາມ ແລະ ອີນໂດເນເຊຍ ໄດ້ມີການພົບປະຢູ່ນະຄອນຫຼວງ ຢາກາຕາ. ເຫດການນີ້ໂດຍສະມາຄົມວິສາຫະກິດສິນຄ້າຫວຽດນາມ ທີ່ມີຄຸນນະພາບສູງ ແລະ ສະຖານທູດຫວຽດນາມ ປະຈຳອີນໂດເນເຊຍ ສົມທົບກັນຈັດຕັ້ງ, ເພື່ອແນໃສ່ສ້າງເງື່ອນໄຂສະດວກເພື່ອໃຫ້ວິສາຫະກິດ 2 ປະເທດແລກປ່ຽນໂອກາດຮ່ວມມື, ລົງທຶນ, ຂຸດຄົ້ນຄວາມສາມາດບົ່ມຊ້ອນຂອງຕະຫຼາດທີ່ໃຫຍ່ຫຼວງຂອງແຕ່ລະຝ່າຍ. ເຂົ້າຮ່ວມເຫດການນີ້ ມີ 15 ວິສາຫະກິດຫວຽດນາມ ແລະ ກວ່າ 20 ວິສາຫະກິດອີນໂດເນເຊຍ, ຜູ້ຕາງໜ້າຫ້ອງການການຄ້າ ແລະ ອຸດສາຫະກຳອີນໂດເນເຊຍ ແລະ ສະຫະສະມາຄົມວົງການເຈົ້າຂອງອີນໂດເນເຊຍ. ກ່າວຄຳເຫັນທີ່ງານພົບປະ, ທ່ານເອກອັກຄະລັດຖະທູດຫວຽດນາມ ປະຈຳ ອີນໂດເນເຊຍ ຫງວຽນຊວນຖຸຍ ຢືນຢັນວ່າ ສະຖານທູດຫວຽດນາມ ປະຈຳອີນໂດເນເຊຍ ພ້ອມແລ້ວທີ່ຈະໜູນຊ່ວຍ ແລະ ສ້າງເງື່ອນໄຂສະດວກເພື່ອໃຫ່ວິສາຫະກິດ 2 ປະເທດສ້າງຕັ້ງບັນດາການພົວພັນ ແລະ ຮ່ວມມືນຳກັນ. ສ່ວນທ່ານປະທານຫ້ອງການການຄ້າ ແລະ ອຸດສາຫະກຳອີນໂດເນເຊຍ Juan Gondokusumo ໄດ້ຕີລາຄາວ່າ ອີນໂດເນເຊຍ ແລະ ຫວຽດນາມ ມີຄວາມສາມາດບົ່ມຊ້ອນຮ່ວມມືຫຼາຍຢ່າງ ເພາະວ່າ ນີ້ແມ່ນ 2 ປະເທດທີ່ມີພົນລະເມືອງຫຼາຍອັນດັບໜຶ່ງໃນພາກພື້ນອາຊີຕາເວັນອອກສ່ຽງໃຕ້. ທ່ານ Juan Gondokusumo ຖືວ່າ ດ້ວຍຄວາມມານະພະຍາຍາມຂອງ 2 ຝ່າຍ, ວົງເງິນການຄ້າ 2 ຝ່າຍໃນປະຈຸບັນ ບັນລຸໄດ້ລະດັບເກືອນ 5 ຕື້ USD ແລະ ສາມາດປະຕິບັດສຳເລັດຈຸດໝາຍຍົກຕົວເລັກນີ້ຂຶ້ນເຖິງ 10 ຕື້ USD ໃນປີ 2018 ໂດຍໄວ.