ທ່ານປະທານປະເທດ ເຈືອງເຕີນຊາງ ໄດ້ມອບນາມມະຍົດທ່ານໝໍປະຊາຊົນໃຫ້ພະນັກງານການແພດ 67 ຄົນ
(ພາບ: sggp.org.vn)
(vovworld) – ເພື່ອພັດທະນາພາລະກິດສາທາລະນະສຸດຢ່າງແຮງ, ຍົກສູງວຽກງານເບິ່ງແຍງດູແລສຸຂະພາບຂອງປະຊາຊົນ, ຂະແໜງສາທາລະນະສຸກໄດ້ຮັບຜິດຊອບໜ້າທີ່ຢ່າງໜັກໜ່ວງ ແຕ່ເປັນກຽດທີ່ສຸດ. ທ່ານປະທານປະເທດ ເຈືອງເຕີນຊາງ ໄດ້ຕັກເຕືອນຄືແນວນັ້ນເມື່ອເຂົ້າຮ່ວມງານພົບປະແລກປ່ຽນເນື່ອງໃນໂອກາດສະເຫຼີມສະຫຼອງ 59 ປີແຫ່ງວັນແພດໝໍຫວຽດນາມ (27/02/1955 – 27/02/2014), ທີ່ຈັດຂຶ້ນໃນຕອນຄຳ່ວັນທີ 27/2, ຢູ່ ຮ່າໂນ້ຍ.
ກ່າວຄຳເຫັນທີ່ພິທີ, ທ່ານປະທານປະເທດ ເຈືອງເຕີນຊາງ ເນັ້ນໜັກວ່າ: ເມື່ອກ້າວເຂົ້າສູ່ໄລຍະໃໝ່, ກອງປະຊຸມໃຫຍ່ພັກກອມມູນິດຫວຽດນາມ ຄັ້ງທີ 11 ໄດ້ວາງອອກໜ້າທີ່ພັດທະນາພາລະກິດສາທາລະນະສຸກ ຍົກສູງວຽກງານເບິ່ງແຍງດູແລສຸຂະພາບຂອງປະຊາຊົນຢ່າງແຮງ. ພ້ອມກັບທົ່ວພັກ, ທົ່ວປວງຊົນ, ຂະແໜງສາທາລະນະສຸກມີຄວາມຮັບຜິດຊອບໜ້າທີ່ຢ່າງໜັກໜ່ວງແຕ່ພັດເປັນກຽດສະຫງ່າທີ່ສຸດ:
“ໂດຍເສີມຂະຫຍາຍບັນດາຜົນງານທີ່ບັນລຸໄດ້ນັ້ນ, ຂະແໜງສາທາລະນະສຸກຄວນປັບປຸງເຄືອຂ່າຍຈາກຂັ້ນສູນກາງລົງຮອດຂັ້ນຮາກຖານ, ພ້ອມກັບເພີ່ມທະວີການລົງທຶນຂອງລັດ ກໍ່ຕ້ອງຍູ້ແຮງວຽກງານສັງຄົມ, ພັດທະນາບັນດາຮາກຖານສາທາລະນະສຸກພາກເອກະຊົນ. ເພີ່ມທະວີການຄຸ້ມຄອງການເຄື່ອນໄຫວກວດ, ປິ່ນປົວພະຍາດ, ຍົກສູງຄຸນສົມບັດ, ສະກັດກັ້ນໄພຫຍໍ້ທໍ້... ສ້າງພື້ນຖານການແພດ ຫວຽດນາມ ກ້າວໜ້າ, ທັນສະໄໝ ແລະ ສົມທົບກັນລະຫວ່າງການແພດພື້ນເມືອງ ແລະ ການແພດທັນສະໄໝ ເພື່ອໃຫ້ທັດທຽມກັບລະດັບການແພດທີ່ກ້າວໜ້າຂອງບັນດາປະເທດໃນພາກພື້ນ ແລະ ຢູ່ໃນໂລກ”
ເນື່ອງໃນໂອກາດນີ້, ທ່ານປະທານປະເທດ ເຈືອງເຕີນຊາງ ໄດ້ມອບນາມມະຍົດທ່ານໝໍປະຊາຊົນໃຫ້ພະນັກງານການແພດ 67 ຄົນ, ຮັບຮູ້ບັນດາການປະກອບສ່ວນຂອງຖັນແຖວແພດໝໍດ້ວຍພາລະກິດເບິ່ງແຍງດູແລ ແລະ ປົກປັກຮັກສາສຸຂະພາບຂອງປະຊາຊົນ.