(vovworld) - ດັ່ງທີ່ພວກເຮົາໃຫ້ຂ່າວໄປແລ້ວ, ໂດຍໄດ້ຮັບຄຳເຊີນຂອງທ່ານປະທານປະເທດແຫ່ງສາທາລະນະລັດປະຊາຊົນຈີນ ສື່ຈີນພິງ, ທ່ານປະທານປະເທດຫວຽດນາມ ເຈືອງເຕີນຊາງ ຈະໄປຢ້ຽມຢາມທາງລັດຖະກິດ ສາທາລະນະລັດປະຊາຊົນຈີນ ໃນລະຫວ່າງວັນທີ 19 – 21/06/2013. ວັນທີ 14/06, ຕອບສຳພາດຕໍ່ນັກຂ່າວວິທະຍຸກະຈາຍສຽງຫວຽດນາມ ປະຈຳ ປັກກິງ, ໂຄສົກກະຊວງການຕ່າງປະເທດຈີນ ທ່ານນາງ ຄວາຈວນຢິງ ໃຫ້ຮູ້ວ່າ, ຈີນຫວັງວ່າ ການຢ້ຽມຢາມຈີນ ຂອງທ່ານປະທານປະເທດຫວຽດນາມ ເຈືອງເຕີນຊາງ ຈະປະກອບສ່ວນຊຸກຍູ້ການພົວພັນຮ່ວມມື, ຄູ່ຮ່ວມມືຍຸດທະສາດຮອບດ້ານລະຫວ່າງຫວຽດນາມ - ຈີນ ໃຫ້ບັນລຸບາດກ້າວພັດທະນາໃໝ່.
ທ່ານນາງ ຄວາຈວນຢິງ ໃຫ້ຮູ້ວ່າ, ໃນໄລຍະຢູ່ຢ້ຽມຢາມຈີນ, ທ່ານປະທານປະເທດຈີນ ສື່ຈີນພິງ ແລະ ບັນດາການນຳອື່ນໆຂອງຈີນ ຈະດຳເນີນການພົບປະເຈລະຈາກັບທ່ານປະທານປະເທດ ເຈືອງເຕີນຊາງ. 2 ຝ່າຍຈະປຶກສາຫາລືກ່ຽວກັບການພົວພັນ 2 ຝ່າຍຢ່າງເລິກເຊິ່ງ, ກໍຄືບັນດາບັນຫາສາກົນ ແລະ ພາກພື້ນ ທີ່ຕ່າງຝ່າຍຕ່າງມີຄວາມສົນໃຈ.
ຕີລາຄາກ່ຽວກັບການພົວພັນລະຫວ່າງ 2 ປະເທດໃນໄລຍະຜ່ານມາ, ທ່ານນາງ ຄວາຈວນຢິງ ຖືວ່າ, ການພົວພັນລະຫວ່າງຫວຽດນາມ - ຈີນ ພວມຮັກສາທ່າພັດທະນາເປັນປົກກະຕິ. ທ່ານນາງ ຄວາຈວນຢິງ ກ່າວວ່າ.
“ຈີນ ຖືວ່າ, ຈີນ ແລະ ຫວຽດນາມ ລ້ວນແຕ່ແມ່ນປະເທດຖານບ້ານໃກ້ເຮືອນຄຽງ ແລະ ຄູ່ຮ່ວມມືສຳຄັນຂອງກັນ. ປະຈຸບັນ 2 ປະເທດລ້ວນແຕ່ຢູ່ໃນໄລຍະສຳຄັນຂອງການປະຕິຮູບ ແລະ ພັດທະນາ. ການພົວພັນລະຫວ່າງຫວຽດນາມ - ຈີນ ໄດ້ຮັບການຮັກສາໃຫ້ພັດທະນາເປັນປົກກະຕິ, ສົດໃສ, ສອດຄ່ອງກັບຜົນປະໂຫຍດລວມຂອງ 2 ປະເທດ. ຈີນ ຫວັງວ່າ, ຜ່ານການຢ້ຽມຢາມຈີນ ຂອງທ່ານປະທານປະເທດ ເຈືອງເຕີນຊາງ ຄັ້ງນີ້ ຈະເພີ່ມທະວີຄວາມເຊື່ອໝັ້ນດ້ານການເມືອງລະຫວ່າງ 2 ປະເທດ, ຊຸກຍູ້ການພົວພັນຮ່ວມມືໃນບັນດາຂົງເຂດຢ່າງແທດຈິງ, ເພີ່ມທະວີການສົມທົບກັນໃນບັນດາບັນຫາຫຼາຍຝ່າຍ, ຊຸກຍູ້ການພົວພັນຮ່ວມມື, ຄູ່ຮ່ວມມືຍຸດທະສາດຮອບດ້ານລະຫວ່າງຫວຽດນາມ - ຈີນ ໃຫ້ບັນລຸບັນດາບາດກ້າວພັດທະນາໃໝ່”.
ທ່ານນາງ ຄວາຈວນຢິງ ກໍໃຫ້ຮູ້ວ່າ, ປະຈຸບັນ ບັນດາອົງການມີໜ້າທີ່ຂອງ 2 ຝ່າຍ ພວມດຳເນີນການເຈລະຈາ ເພື່ອແນໃສ່ມຸ່ງໄປເຖິງການລົງນາມໃນບັນດາເອກະສານຮ່ວມມືໃນຂົງເຂດຕ່າງໆຄື: ການເມືອງ, ປ້ອງກັນຊາດ, ເສດຖະກິດ, ການຄ້າ.