( vovworld ) - ກ່ອນທີ່ຈະເດີນທາງໄປເກຼັກ ເຂົ້າຮ່ວມກອງປະຊຸມສຸດຍອດແມ່ຍິງທົ່ວໂລກ, ທ່ານນາງຮອງປະທານປະເທດຫວຽດນາມ Nguyen Thi Doan ໄດ້ມີການຢ້ຽມຢາມ ແລະ ເຮັດວຽກຢູ່ສາທາລະນະລັດ ສະຫະພັນເຢຍລະມັນ ໃນລະຫວ່າງວັນທີ 26 – 29/5. ໃນຂອບເຂດການຢ້ຽມຢາມ, ທ່ານນາງຮອງປະທານປະເທດໄດ້ເຂົ້າຮ່ວມພິທີເປີດສະຫຼອງສາຂາແຫ່ງທີ 2 ຂອງທະນາຄານຫຸ້ນສ່ວນອຸດສາຫະກຳການຄ້າຫວຽດນາມ ( ຫຼື VietinBank ) ຢູ່ນະຄອນແບກແລງ, ປະເທດເຢຍລະມັນ. ທ່ານນາງຮອງປະທານປະເທດກໍພົບປະກັບພະນັກງານ, ພາລະກອນກົງສູນໃຫຍ່ສະຖານທູດຫວຽດນາມປະຈຳ Frankfurt ແລະ ສະຖານທູດຫວຽດນາມ ປະຈຳແບກແລງ ພ້ອມກັບຊາວຫວຽດນາມ ອາໄສຢູ່ເຢຍລະມັນ ທ່ານນາງໄດ້ເນັ້ນໜັກວ່າ ປະຊາຄົມຊາວຫວຽດນາມ ຢູ່ເຢຍລະມັນ ແມ່ນຂົວເຊື່ອມຕໍ່ສຳຄັນເພື່ອຊຸກຍູ້ສາຍພົວພັນລະຫວ່າງສອງປະເທດ.
ແລະກໍໃນຂອບເຂດຂອງການຢ້ຽມຢາມ, ທ່ານນາງຮອງປະທານປະເທດ Nguyen Thi Doan ໄດ້ເປັນປະທານການໂອ້ລົມສົນທະນາສຳພັດກັບແຫຼ່ງທຶນ ແລະ ກາລະໂອກາດຢູ່ເຢຍລະມັນ ໂດຍຫ້ອງການການຄ້າຫວຽດນາມ ແລະ VietinBank ພ້ອມກັນຈັດຕັ້ງຂຶ້ນຢູ່ແບກແລງ ແລະ ຢືນຢັນວ່າ ຫວຽດນາມ ມີພື້ນຖານການເມືອງທີ່ໝັ້ນຄົງ ມີສະພາບແວດລ້ອມທີ່ສະດວກສຳລັບບັນດານັກລົງທຶນ, ຫວຽດນາມ ພວມປ່ຽນໃໝ່ນະໂຍບາຍພັດທະນາເສດຖະກິດ, ໃນນັ້ນສຸມໃສ່ຍູ້ແຮງການປະຕິຮູບດ້ານການບໍລິຫານ, ສ້າງສະພາບແວດລ້ອມແຫ່ງການລົງທຶນຢ່າງປອດໃສໃຫ້ແກ່ບັນດານັກລົງທຶນຕ່າງປະເທດ. ເລື່ອງສ້າງຕັ້ງການພົວພັນຄູ່ຮ່ວມມືຍຸດທະສາດຢ່າງເປັນທາງການລະຫວ່າງຫວຽດນາມ - ເຢຍລະມັນ ແຕ່ທ້າຍປີ 2011 ໄດ້ສ້າງຂອບເຂດການຮ່ວມມືໃໝ່ທີ່ສຳຄັນຍິ່ງ ຊຸກຍູ້ການພົວພັນຮ່ວມມືລະຫວ່າງສອງປະເທດໃຫ້ນັບມື້ນັບເລິກເຊິ່ງ.