( vovworld ) - ຕອນຄໍ່າວັນທີ 5/7, ຢູ່ສຳນັກງານລັດຖະບານ, ທ່ານປະທານປະເທດຫວຽດນາມ Truong Tan Sang ໄດ້ໃຫ້ການຕ້ອນຮັບບັນດາຫົວໜ້າຄະນະຜູ້ແທນຂອງບັນດາປະເທດອາເມລິກາລາຕີນ ທີ່ພວມເຂົ້າຮ່ວມເວທີປາໄສຫວຽດນາມ - ອາເມລິກາລາຕີນ ກ່ຽວກັບດ້ານການຄ້າ ແລະ ການລົງທຶນ ເຊິ່ງໄດ້ຈັດຂຶ້ນຢູ່ຫວຽດນາມ ເປັນຄັ້ງທຳອິດ. ທີ່ການຕ້ອນຮັບ, ທ່ານປະທານປະເທດ Truong Tan Sang ໄດ້ຢືນຢັນວ່າ, ຫວຽດນາມ ແລະ ບັນດາປະເທດອາເມລິກາລາຕີນ ມີສາຍພົວພັນທີ່ເປັນມູນເຊື້ອອັນດີງາມມາແຕ່ດົນນານ. ການພົວພັນດ້ານການເມືອງທີ່ດີງາມ ແລະ ຄວາມສະໜິດຕິດພັນດ້ານວັດທະນະທຳຈິດໃຈເຊິ່ງແມ່ນພື້ນຖານທີ່ໝັ້ນຄົງເພື່ອພັດທະນາການພົວພັນຮ່ວມມືຫຼາຍດ້ານລະຫວ່າງຫວຽດນາມ ແລະ ບັນດາປະເທດອາເມລິກາລາຕີນ, ພິເສດແມ່ນດ້ານເສດຖະກິດ, ການຄ້າ ແລະ ການລົງທຶນໃນໄລຍະປະຈຸບັນ.
ທ່ານປະທານປະເທດ Truong Tan Sang ໄດ້ເນັ້ນໜັກວ່າ, ຫວຽດນາມ ຈະສ້າງທຸກເງື່ອນໄຂສະດວກໃຫ້ແກ່ບັນດາວິສາຫະກິດອາເມລິກາລາຕີນ, ລົງທຶນດຳເນີນທຸລະກິດຢ່າງໝັ້ງຄົງ, ມີປະສິດທິຜົນຢູ່ຫວຽດນາມ ແລະ ປາດຖະໜາວ່າ ລັດຖະບານພ້ອມກັບບັນດາວິສາຫະກິດອາເມລິກາລາຕີນ ຈະສ້າງເງື່ອນໄຂສະດວກໃຫ້ບັດນດາວິສາຫະກິດ ແລະ ນັກລົງທຶນຫວຽດນາມ ລົງທຶນຢູ່ອາເມລິກາລາຕີນ.
ກ່າວຄຳເຫັນທີ່ການຕ້ອນຮັບ, ບັນດາຫົວໜ້າຄະນະຜູ້ແທນບັນດາປະເທດອາເມລິກາລາຕີນໄດ້ເນັ້ນໜັກວ່າ ອາເມລິກາລາຕີນ ແມ່ນພາກພື້ນທີ່ມີຄວາມສາມາດບົມຊ້ອນດ້ານແຮງງານໜຸ່ມ, ມີຊັບພະຍາກອນທຳມະຊາດທີ່ອຸດົມສົມບຸນ, ມີພື້ນຖານດ້ານການເມືອງທີ່ໝັ້ນຄົງ ກຽມພ້ອມເປີດກວ້າງການຮ່ວມມືກັບທຸກໆປະເທດໃນໂລກ, ໃນນັ້ນມີຫວຽດນາມ. ບັນດາຫົວໜ້າຄະນະຜູ້ແທນບັນດາປະເທດອາເມລິກາລາຕີນ ປາດຖະໜາວ່າ ຜ່ານເວທີປາໄສການຄ້າຄັ້ງນີ້ ຈະເພີ່ມທະວີການຮ່ວມມືດ້ານການຄ້າ, ການລົງທຶນ ແລະ ການພົວພັນລະຫວ່າງບັນດາປະເທດໃນພາກພື້ນອາເມລິກາລາຕີນ ແລະ ຫວຽດນາມ ໃຫ້ຂຶ້ນສູ່ລະດັບສູງໃໝ່.