ທ່ານປະທານປະເທດເຈືອງເຕີນຊາງພົບປະສອງຝ່າຍຢູ່ນອກກອງປະຊຸມAPEC
ທ່ານປະທານປະເທດ ເຈືອງເຕີນຊາງ ພົບປະກັບ
ປະທານາທິບໍດີ ເປຣູ, Ollanta Humala
ພາບ:baomoi.com
|
(vovworld)- ວັນທີ 18/11, ເນື່ອງໃນໂອກາດເຂົ້າຮ່ວມກອງປະຊຸມຂັ້ນສູງເວທີປາໄສການຮ່ວມມືເສດຖະກິດ ອາຊີ - ປາຊີຟີກ ຢູ່ ມານີລາ ປະເທດ ຟິລີບປີນ, ທ່ານປະທານປະເທດ ເຈືອງເຕີນຊາງ ໄດ້ມີການພົບປະສອງຝ່າຍກັບປະທານາທິບໍດີ ເປຣູ, ນາຍົກລັດຖະມົນຕີ ມາເລເຊຍ ແລະ ຕ້ອນຮັບປະທານເຂດປົກຄອງພິເສດ ຮົ່ງກົງ ປະເທດຈີນ.
ທີ່ການພົບປະກັບປະທານາທິບໍດີ ເປຣູ, Ollanta Humala, ການນຳສອງທ່ານ ໄດ້ສະແດງຄວາມປິຕິຊົມຊື່ນຕໍ່ບັນດາບາດກ້າວພັດທະນາອັນດີງາມໃນການພົວພັນມິດຕະພາບ ການຮ່ວມມືລະຫວ່າງຫວຽດນາມ ແລະ ເປຣູ. ທ່ານປະທານປະເທດ ເຈືອງເຕີນຊາງ ສະເຫນີ ສອງຝ່າຍນຳຄະນະກຳມະການລະຫວ່າງ ລັດຖະບານກ່ຽວກັບບັນຫາເສດຖະກິດ ແລະ ການຮ່ວມມືເຕັກນິກ ເຂົ້າເຄື່ອນໄຫວໂດຍໄວ ແລະ ເຈລະຈາເພື່ອລົງນາມໃນສັນຍາແມ່ກ່ຽວກັບດ້ານການຄ້າ ແລະ ການລົງທຶນ. ການນຳສອງທ່ານ ຢືນຢັນ ຈະສະຫນັບສະຫນູນເຊິ່ງກັນ ແລະ ກັນ ແລະ ສົມທົບກັນຢ່າງແຫນ້ນແຟ້ນ ເພື່ອຈັດຕັ້ງປີ Apec 2016 ແລະ Apec 2017 ຊື່ງ ຫວຽດນາມ ແລະ ເປຣູ ປະເທດເຈົ້າພາບ. ທີ່ການພົບປະກັບນາຍົກລັດຖະມົນຕີ ມາເລເຊຍ, Najib Rajak, ທ່ານປະທານປະເທດ ເຈືອງເຕີນຊາງ ເນັ້ນຫນັກວ່າ: ປີ 2015 ເປັນຂີດໝາຍສຳຄັນເມື່ອສອງປະເທດສ້າງຕັ້ງການພົວພັນຄູ່ຮ່ວມມືຍຸດທະສາດຢ່າງເປັນທາງການ. ສອງຝ່າຍເຫັນດີນຳກັນວ່າ: ຈະຜັນຂະຫຍາຍ ແລະ ເຮັດໃຫ້ບັນດາເນື້ອແທ້ຄູ່ຮ່ວມມືຍຸດທະສາດໃຫ້ປະກົດຜົນເປັນຈິງ, ຈັດຕັ້ງວາລະປະຊຸມຄັ້ງທີ 5 ຄະນະກຳມະການປະສົມກ່ຽວກັບເສດຖະກິດ, ວິທະຍາສາດ, ເຕັກນິກ ໂດຍໄວ, ຊຸກຍູ້ການສຳຫລວດກວດກາບັນດາລະບຽບການພາຍໃນໃຫ້ສຳເລັດເພື່ອລົງນາມ ແລະ ໃຫ້ສັດຕະຍາບັນສັນຍາ TPP ໂດຍໄວ, ເພີ່ມທະວີການແລກປ່ຽນບົດຮຽນກ່ຽວກັບການຍົກສູງກຳລັງຄວາມສາມາດປະຕິບັດສັນຍານີ້.
ເມື່ອພົບປະກັບປະທານເຂດປົກຄອງພິເສດ ຮົ່ງກົງ ປະເທດຈີນ, ທ່ານປະທານປະເທດເຈືອງເຕີນຊາງ ເນັ້ນຫນັກວ່າ: ຄວາມສາມາດບົ່ມຊ້ອນການຮ່ວມມືຍຸດທະສາດຮອບດ້ານ ຫວຽດນາມ - ຈີນ ຍັງໃຫຍ່ຫລວງຢູ່, ສົ່ງເສີມບັນດາວິສາຫະກິດຮົ່ງກົງ ເປີດກວ້າງການລົງທຶນ, ດຳເນີນທຸລະກິດ ກັບຫວຽດນາມ. ທ່ານແລ່ງເຈີນອີງ ເນັ້ນຫນັກວ່າ: ຮົ່ງກົງ ພວມລົງທຶນພັດທະນາພື້ນຖານໂຄງລ່າງຢ່າງແຮງ ເພື່ອເພີ່ມທະວີການເຊື່ອມຕໍ່ເສດຖະກິດກັບພາກພື້ນ ອາຊີຕາເວັນອອກສ່ຽງໃຕ້, ໃນນັ້ນ ມີຫວຽດນາມ ແລະ ຢືນຢັນ ຈະສ້າງເງື່ອນໄຂສະດວກເພື່ອອອກວິຊາໃຫ້ພົນລະເມືອງຫວຽດນາມ ໄປທ່ອງທ່ຽວ, ເຮັດວຽກຢູ່ ຮົ່ງກົງ, ສົ່ງເສີມບັນດາມະຫາວິທະຍາໄລ ຮົ່ງກົງ ຕ້ອນຮັບນັກສຶກສາຫວຽດນາມ ມາຮ່ຳຮຽນ.