(VOVWORLD) - ຕອນເຊົ້າວັນທີ 9 ພະຈິກ, ຢູ່ຮ່າໂນ້ຍ, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ໄດ້ເປັນປະທານກອງປະຊຸມລັດຖະບານປະຈຳເດືອນ ຕຸລາ. ໃນກອງປະຊຸມນີ້, ບັນດາຜູ້ແທນໄດ້ຕີລາຄາຄືນສະພາບການເສດຖະກິດ - ສັງຄົມ ໄລຍະ 10 ເດືອນ ແລະ ເດືອນ ຕຸລາ, ກໍຄືວາງອອກທິດທາງ, ໜ້າທີ່, ມາດຕະການໃນເດືອນພະຈິກ ແລະ ນັບແຕ່ນີ້ຮອດທ້າຍປີ.
 ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ກ່າວຄຳເຫັນທີ່ກອງປະຊຸມ (ພາບ: TTXVN) |
ກ່າວຄຳເຫັນທີ່ກອງປະຊຸມ, ທ່ານນາຍົກລັດຖະມົນຕີ ສະເໜີໃຫ້ບັນດາຜູ້ແທນສຸມໃສ່ປຶກສາຫາລື, ເຮັດແຈ້ງບັນດາໝາກຜົນທີ່ບັນລຸໄດ້, ບັນດາຂໍ້ຈຳກັດ, ຄວາມຫຍຸ້ງຍາກ, ສິ່ງທ້າທາຍ, ວິເຄາະບັນດາສາຍເຫດ ແລະ ຖອດຖອນບົດຮຽນປະສົບການໃນການຊີ້ນຳ, ບໍລິຫານ; ຄາດຄະເນ, ໃຫ້ຂໍ້ສັງເກດຕໍ່ສະພາບການໃນໄລຍະຈະມາເຖິງ, ໃນນັ້ນ ມີການຄາດຄະເນຜົນກະທົບຈາກຜົນການເລືອກຕັ້ງປະທານາທິບໍດີ ອາເມລິກາ. ທ່ານນາຍົກລັດຖະມົນຕີ ກໍຮຽກຮ້ອງໃຫ້ບັນດາກະຊວງ, ຂະແໜງການ, ທ້ອງຖິ່ນຕ່າງໆຍາມໃດກໍເປັນເຈົ້າການ, ວາງອອກນະໂຍບາຍຢ່າງທັນການ ແລະ ມີແຜນການບໍລິຫານຕໍ່ທຸກກໍລະນີ.
ທ່ານນາຍົກລັດຖະມົນຕີ ກໍໄດ້ເນັ້ນໜັກເຖິງບັນດາໜ້າທີ່, ມາດຕະການເພື່ອປະຕິບັດສຳເລັດບັນດາເປົ້າໝາຍຂອງປີ 2024, ພິເສດແມ່ນເປົ້າໝາຍເຕີບໂຕ GDP.