(vovworld) - ຕອນບ່າຍວັນທີ 21/05, ຢູ່ສຳນັກງານລັດຖະບານ, ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ ໄດ້ໃຫ້ການຕ້ອນຮັບທ່ານອະດີດນາຍົກລັດຖະມົນຕີຝລັ່ງ Dominique de Villepin ທີ່ພ້ວມຢູ່ຢ້ຽມຢາມຫວຽດນາມ. ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ສະແດງຄວາມປິຕິຊົມຊື່ນຕໍ່ສາຍພົວພັນທີ່ເປັນມູນເຊື້ອ ແລະ ການຮ່ວມມືຫຼາຍດ້ານລະຫວ່າງຫວຽດນາມ ແລະ ຝລັ່ງ ທີ່ພັດທະນາອັນດີງາມໃນທຸກຂົງເຂດ, ນຳມາເຊິ່ງປະສິດທິຜົນອັນແທ້ຈິງໃຫ້ທັງ 2 ຝ່າຍ. ທ່ານນາຍົກລັດຖະມົນຕີ ຫງວຽນເຕີນຢຸງ ເນັ້ນໜັກວ່າ, ຫວຽດນາມ ຖືການພົວພັນກັບຝລັ່ງເປັນສຳຄັນ, ເປັນຄູ່ຮ່ວມມືທີ່ສຳຄັນຂອງຫວຽດນາມ ຢູ່ເອີລົບ ແລະ ໃນໂລກ, ພິເສດໃນປີ 2013, ແມ່ນຈຸດເວລາທີ່ສຳຄັນເມື່ອ 2 ປະເທດມຸ້ງໄປເຖິງການຍົກສູງລະດັບການພົວພັນຂຶ້ນສູ່ລະດັບຄູ່ຮ່ວມມືຍຸດທະສາດ ເນື່ອງໃນໂອກາດສະເຫຼີມສະຫຼອງ 40 ປີແຫ່ງວັນສ້າງຕັ້ງສາຍພົວພັນທາງການທູດ. ທ່ານນາຍົກລັດຖະມົນຕີສະເໜີໃຫ້ຝ່າຍຝລັ່ງ ສືບຕໍ່ຊຸກຍູ້ການຜັນຂະຫຍາຍໂຄງການມະຫາວິທະຍາໄລເຕັກໂນໂລຊີຮ່າໂນ້ຍ ຢ່າງມີປະສິດທິຜົນ, ສະໜັບສະໜູນຫວຽດນາມ ສິ້ນສຸດການເຈລະຈາ FTA ກັບ ເອີລົບ ໂດຍໄວ.