ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູ້ງ
(ພາບປະກອບ)
|
(vovworld) – ຕອນບ່າຍວັນທີ 23/6, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູ້ງ ພ້ອມກັບຄະນະຜູ້ແທນ ຫວຽດນາມ ເດີນທາງອອກຈາກ Yangon ກັບເມືອ ຮ່າໂນ້ຍ, ສິ້ນສຸດການເຂົ້າຮ່ວມບັນດາກອງປະຊຸມຂັ້ນສູງຢູ່ ມຽນມາ ຢ່າງຈົບງາມ.
ກ່ອນໜ້ານັ້ນ, ທ່ານນາຍົກລັດຖະມົນຕີ ຫງວຽນເຕີນຢູ້ງ ພ້ອມກັບຄະນະຜູ້ແທນ ຫວຽດນາມ ໄດ້ໄປຍັງນະຄອນ Yangon ເຂົ້າຮ່ວມການເຄື່ອນໄຫວບາງຢ່າງຂອງສະຫະສະມາຄົມບັນດານັກລົງທຶນ ຫວຽດນາມ ຢູ່ ມຽນມາ. ທ່ານນາຍົກລັດຖະມົນຕີ ຫງວຽນເຕີນຢູ້ງເຂົ້າຮ່ວມພິທີກວດຢັ້ງຢືນໄລຍະ 1 ເຂດປະສົມ ຮ່ວາງແອງຢາລາຍ ຢູ່ນະຄອນ Yangon, ພິທີເປີດສະຫຼອງການເຄື່ອນໄຫວຂອງບໍລິສັດການເງິນທະນາຄານຫຸ້ນສ່ວນລົງທຶນ ແລະ ພັດທະນາ ຫວຽດນາມ (BIDV) ແລະ ຫ້ອງການບໍລິສັດໃຫຍ່ປະກັນໄພ BIDV ຢູ່ ມຽນມາ, ເປັນສັກຂີພິຍານພິທີລົງນາມໃນບັນດາເອກະສານຮ່ວມມືລະຫວ່າງ BIDV ກັບບັນດາທະນາຄານ ມຽນມາ. ນະທີ່ນີ້, ທ່ານນາຍົກລັດຖະມົນຕີ ຫງວຽນເຕີນຢູ້ງ ໄດ້ຍ້ອງຍໍຊົມເຊີຍບັນດານັກລົງທຶນ ຫວຽດນາມໄປ ມຽນມາ ແລະ ບັນດາວິສາຫະກິດ ຫວຽດນາມ ພວມມານະພະຍາຍາມຊຸກຍູ້ການພົວພັນເສດຖະກິດ, ການຄ້າ, ການລົງທຶນຢູ່ຕະຫຼາດ ມຽນມາ, ປະກອບສ່ວນນຳວົງເງິນການຄ້າ 2 ຝ່າຍຂຶ້ນກ່ວາ 480 ລ້ານ USD, ນີ້ແມ່ນປະຖົມປັດໄຈສຳຄັນເພື່ອສູ້ຊົນບັນລຸຈຸດໝາຍ 500 ລ້ານ USD ໃນປີນີ້ ແລະ ຫວຽດນາມ ໄດ້ກາຍເປັນປະເທດລົງທຶນໃຫຍ່ອັນດັບທີ 8 ຢູ່ ມຽນມາ, ດ້ວຍ 23 ໂຄງການທີ່ມີມູນຄ່າ 580 ລ້ານ USD, ປະກອບສ່ວນຮັດແໜ້ນການພົວພັນມິດຕະພາບ ແລະ ຍູ້ແຮງການຮ່ວມມື 2 ຝ່າຍລະຫວ່າງ ຫວຽດນາມ ແລະ ມຽນມາ.