(vovworld) – ຕອນຄຳ່ວັນທີ 02/7, ທ່ານນາຍົກລັດຖະມົນຕີຫວຽດນາມ ຫງວຽນເຕິນຢຸ້ງ ພ້ອມກັບຄະນະຜູ້ແທນຂັ້ນສູງຫວຽດນາມ ໄດ້ໄປຮອດໂຕກຽວ, ປະເທດຍີ່ປຸ່ນ ເພື່ອເຂົ້າຮ່ວມກອງປະຊຸມສຸດຍອດແມ່ນ້ຳຂອງ-ຍີ່ປຸ່ນ ຄັ້ງທີ 7 ຕາມຄຳເຊີນຂອງທ່ານນາຍົກລັດຖະມົນຕີຍີ່ປຸ່ນ Shinzo Abe.
ໃນລະຫວ່າງວັນທີ 3-4/7, ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸ້ງ ພ້ອມກັບບັນດາການນຳປະເທດອະນຸພາກພື້ນແມ່ນ້ຳຂອງ ແລະ ຍີ່ປຸ່ນ ເຂົ້າຮ່ວມວາລະປະຊຸມສຸດຍອດແມ່ນ້ຳຂອງ-ຍີ່ປຸ່ນ ຄັ້ງທີ 7 ພ້ອມກັບຫຼາຍເຫດການສຳຄັນອື່ນໆຄື: ເວທີປາໄສ 5 ພື້ນຖານເສດຖະກິດແມ່ນ້ຳຂອງ ໂດຍອົງການສົ່ງເສີມການຄ້າຍີ່ປຸ່ນ (Jetro) ຈັດຕັ້ງ; ພົບປະເຈລະຈາກັບພະເຈົ້າຈັກກະພັດ ແລະ ພົບປະກັບທ່ານປະທານສະພາຕຳ່ ແລະ ສະພາສູງຍີ່ປຸ່ນ…
ພ້ອມກັບບັນດາການເຄື່ອນໄຫວໃນຂອບເຂດກອງປະຊຸມສຸດຍອດແມ່ນ້ຳຂອງ-ຍີ່ປຸ່ນ ຄັ້ງທີ 7 ຢູ່ໂຕກຽວ, ທ່ານນາຍົກລັດຖະມົນຕີຫວຽດນາມ ຫງວຽນເຕິນຢຸ້ງ ຈະມີການເຈລະຈາກັບທ່ານນາຍົກລັດຖະມົນຕີຍີ່ປຸ່ນ Shinzo Abe ເພື່ອແລກປ່ຽນ ແລະ ເຫັນດີເປັນເອກະສັນບັນດາມາດຕະການຊຸກຍູ້ການພົວພັນຄູ່ຮ່ວມມືຍຸດທະສາດ ຫວຽດນາມ-ຍີ່ປຸ່ນ ໃຫ້ນັບມື້ນັບເລິກເຊິ່ງ, ກ້ວາງຂວາງ, ຮອບດ້ານ, ແທດຈິງ ແລະ ມີປະສິດທິຜົນ. ທ່ານນາຍົກລັດຖະມົນຕີຫວຽດນາມ ຫງວຽນເຕິນຢຸ້ງ ກໍຈະຕ້ອນຮັບການນຳບາງອົງການຂອງ ຍີ່ປຸ່ນຄື: ພັນທະມິດສະມາຊິກສະພາແຫ່ງຊາດມິດຕະພາບ ຍີ່ປຸ່ນ-ຫວຽດນາມ, ອົງການຮ່ວມມືສາກົນຍີ່ປຸ່ນ (JICA), ອົງການສົ່ງເສີມການຄ້າຍີ່ປຸ່ນ (JETRO) ແລະ ບາງກຸ່ມບໍລິສັດເສດຖະກິດແຖວໜ້າຂອງຍີ່ປຸ່ນ.