ມີຫຼາຍຄົນມາຊອກຮູ້ກ່ຽວກັບຜົນງານນີ້ ແລະ ຢາກໄດ້ປຶ້ມຂອງທ່ານອະດີດເລຂາທິການໃຫຍ່ ຫງວຽນຝູຈ້ອງ (ພາບ: TTXVN)

ງານບຸນ ManiFiesta (ສາມັກຄີ), ແມ່ນເຫດການປະຈຳປີ ໂດຍພັກແຮງງານ ແບນຊິກ (PTB) ຈັດຂຶ້ນ, ໄດ້ກາຍເປັນຈຸດນັບພົບທີ່ສຳຄັນຂອງຜູ້ອອກແຮງງານ ແລະ ຊົນຊັ້ນກຳມະກອນໃນທົ່ວປະເທດ ແບນຊິກ. ໂດຍໄດ້ດຳເນີນໃນລະຫວ່າງວັນທີ 7 - 8 ກັນຍາ, ຢູ່ນະຄອນທະເລ Ostende, ງານບຸນປີນີ້ ໄດ້ຕ້ອນຮັບແຂກມາຊົມຫຼາຍກວ່າ 15.000 ຄົນ, ດ້ວຍກິດຈະກຳຫຼາຍຢ່າງທີ່ອຸດົມສົມບູນ.

ຮ້ານວາງສະແດງຂອງສະຖານທູດ ຫວຽດນາມ ໄດ້ຮັບຄວາມສົນໃຈເປັນພິເສດຈາກເພື່ອນມິດສາກົນ. ທ່ານເອກອັກຄະລັດຖະທູດ ຫວຽດນາມ ປະຈຳ ແບນຊິກ, ຫງວຽນວັນຖາວ ໃຫ້ຮູ້ວ່າ ຫວຽດນາມ ແນະນຳເຖິງມະຫາຊົນ ແບນຊິກ ແລະ ເພື່ອນມິດສາກົນ ກ່ຽວກັບປະທານ ໂຮ່ຈີມິນ ຜ່ານບັນດາເອກະສານປະຫວັດສາດກ່ຽວກັບຊີວິດ, ພາລະກິດການເຄື່ອນໄຫວປະຕິວັດຂອງ ເພິ່ນ. ພ້ອມດຽວກັນນັ້ນ, ຫວຽດນາມ ກໍໄດ້ແນະນຳປຶ້ມຂອງທ່ານອະດີດເລຂາທິການໃຫຍ່ ຫງວຽນຝູຈ້ອງ ທີ່ໄດ້ແປເປັນພາສາ ຝລັ່ງ, ອັງກິດ, ໂຮນລັງ, ໂດຍສຸມໃສ່ບາງບັນຫາທິດສະດີ ແລະ ພຶດຕິກຳຕົວຈິງກ່ຽວກັບສັງຄົມນິຍົມ ແລະ ເສັ້ນທາງກ້າວຂຶ້ນສູ່ສັງຄົມນິຍົມ ຢູ່ ຫວຽດນາມ. ມີຫຼາຍຄົນມາຊອກຮູ້ກ່ຽວກັບຜົນງານນີ້ ແລະ ຢາກໄດ້ປຶ້ມເຫຼັ້ມນີ້.