(vovworld) – ຕອນບ່າຍວັນທີ 23/05, ມີຊາວຫວຽດນາມ ພວມຮໍ່າຮຽນ ແລະ ດຳລົງຊີວິດຢູ່ແບນຊິກ ນັບຮ້ອຍຄົນ ໄດ້ເຕົ້າໂຮມກັນຢູ່ຕໍ່ໜ້າສະພາເອີລົບ ຢູ່ນະຄອນຫຼວງ ບຣຸກແຊນ, ປະເທດແບນຊິກ ເພື່ອຄັດຄ້ານການກະທຳຂອງຈີນ ທີ່ຕັ້ງຮ້ານເຈາະນ້ຳມັນໄຮຢາງ 981 ໃນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ ຢ່າງຜິດກົດໝາຍ. ຜູ້ແຫ່ຂະບວນປະທ້ວງໄດ້ຍົກປ້າຍຄຳຂວັນ ແລະ ຮ້ອງໂຮຄຳຂວັນດ້ວຍພາສາຫວຽດນາມ, ອັງກິດ, ຝລັ່ງ, ໂຮນລັງ ຮຽກຮ້ອງຈີນ ຖອນຮ້ານເຈາະນ້ຳມັນອອກຈາກເຂດເສດຖະກິດຈຳເພາະຂອງຫວຽດນາມ, ກ່າວປະນາມຈີນ ລະເມີດກົດໝາຍ ແລະ ສົນທິສັນຍາສະຫະປະຊາຊາດກ່ຽວກັບກົດໝາຍທະເລປີ 1982 (UNCLOS 1982), ຢືນຢັນຊາວຫວຽດນາມ ຮັກຫອມສັນຕິພາບ ແລະ ບໍ່ຢາກມີສົງຄາມ.
ຕາງໜ້າປະຊາຄົມຊາວຫວຽດນາມ ອາໄສຢູ່ແບນຊິກ, ສາດສະດາຈານ ຫງວຽນດັງຮືງ, ອາຈານສອນຢູ່ມະຫາວິທະຍາໄລ Liege, ເຊິ່ງແມ່ນຊາວຫວຽດນາມ ອາໄສຢູ່ແບນຊິກ ເປັນເວລາກວ່າ 50 ປີ ແລ້ວໄດ້ອ່ານຈົດໝາຍຮຽກຮ້ອງຊາວຫວຽດນາມ ແລະ ປະຊາຊົນທຸກຊັ້ນຄົນທີ່ຮັກຫ້ອມສັນຕິພາບໃນໂລກຕໍ່ສູ້, ຄັດຄ້ານການກະທຳຂອງຈີນ. ສາດສະດາຈານ ຫງວຽນດັງຮືງ ເນັ້ນໜັກວ່າ ການກະທຳຂອງຈີນ ໄດ້ລະເມີດ UNCLOS 1982, ໄປຝືນກັບຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ປີ 2002 ກໍ່ຄືຄຳໝັ້ນສັນຍາ 2 ຝ່າຍລະຫວ່າງ 2 ປະເທດຫວ່າງແລ້ວນີ້. ເນື່ອງໃນໂອກາດນີ້, ສະມາຄົມໃຫຍ່ຊາວຫວຽດນາມ ອາໄສຢູ່ແບນຊິກ ໄດ້ຝາກຈົດໝາຍ ເຖິງຄະນະກຳມະການເອີລົບ ກ່າວປະນາມເລື່ອງຈີນ ລະເມີດເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ.