(vovworld) - ຕອນບ່າຍວັນທີ 13/9, ຢູ່ສຳນັກງານປະທານປະເທດ, ທ່ານປະທານປະເທດຫວຽດນາມ Truong Tan Sang ໄດ້ໃຫ້ການຕ້ອນຮັບທ່ານລັດຖະມົນຕີກະຊວງປ້ອງກັນປະເທດ ອູແກຼນ Salamatin Dmitry Albertovich, ເນື່ອງໃນໂອກາດມາຢ້ຽມຢາມ ແລະ ເຮັດວຽກຢູ່ຫວຽດນາມ. ທີ່ການຕ້ອນຮັບ, ທ່ານປະທານປະເທດ Truong Tan Sang ໄດ້ຢືນຢັນວ່າ ໃນແນວທາງການຕ່າງປະເທດຫວຽດນາມ ຍາມໃດກໍປາດຖະໜາຍາກເພີ່ມທະວີ ແລະ ເປີດກວ້າງການພົວພັນຮ່ວມມືກັບເພື່ອນມິດທີ່ເປັນມູນເຊື້ອ, ໃນນັ້ນມີ ອູແກຼນ. ທ່ານປະທານປະເທດຂອບອົກຂອບໃຈ ອູແກຼນ ທີ່ໄດ້ຊ່ວຍເຫຼືອຫວຽດນາມ ໃນພາລະກິດຕໍ່ສູ້ຍາດເອົາເອກະລາດໃນເມື່ອກ່ອນ ກໍຄືໃນພາລະກິດສ້າງສາປະເທດຊາດໃນປະຈຸບັນ. ທ່ານປະທານປະເທດໄດ້ຕີລາຄາສູງການພັດທະນາຢ່າງໝັ້ນຄົງຂອງ ອູແກຼນ ໃນຊຸມປີມໍ່ໆມານີ້ ແລະ ສະແດງຄວາມພາກພູມໃຈເມື່ອເຫັນວ່າ ການພົວພັນຮ່ວມມືລະຫວ່າງສອງປະເທດນັບມື້ນັບໄດ້ຮັບການພັດທະນາໃນທຸກຂົງເຂດການເມືອງ, ເສດຖະກິດການຄ້າ ແລະ ການລົງທຶນ. ທ່ານປະທານປະເທດ ຫວັງວ່າ ບົນພື້ນຖານການພົວພັນອັນດີງາມນັ້ນ ສອງຝ່າຍຈະນຳການພົວພັນຮ່ວມມືໃຫ້ນັບມື້ນັບແທດຈິງ ແລະ ມີປະສິດທິຜົນ ໃນນັ້ນມີຂົງເຂດຮ່ວມມືປ້ອງກັນຊາດປ້ອງກັນຄວາມສະຫງົບ. ທ່ານລັດຖະມົນຕີ ອູແກຼນ Salamatin Dmitry Albertovich ໄດ້ເນັ້ນນັກເຖິງສາຍພົວພັນຮ່ວມມືມິດຕະພາບທີ່ເປັນມູນເຊື້ອລະຫວ່າງສອງປະເທດ ແລະ ຢືນຢັນວ່າ ສອງຝ່າຍມີກາລະໂອກາດຫຼາຍຢ່າງເພື່ອຮ່ວມມື. ທ່ານລັດຖະມົນຕີ ອູແກຼນ ໄດ້ແຈ້ງໂດຍຍໍ້ກ່ຽວກັບການແລກປ່ຽນລະຫວ່າງລັດຖະມົນຕີກະຊວງປ້ອງກັນປະເທດຫວຽດນາມ ແລະ ອູແກຼນ ໃນຕອນເຊົ້າວັນທີ 13/9 ແລະ ເນັ້ນໜັກວ່າ ການຮ່ວມມືກ່ຽວກັບການສຶກສາບຳລຸງສ້າງ, ເຕັກນິກການທະຫານລະຫວ່າງສອງປະເທດ ຈະໄດ້ຮັບການສະແດງອອກຜ່ານການເວລາ. ນີ້ແມ່ນພື້ນຖານອັນສຳຄັນເພື່ອສືບຕໍ່ຍູ້ແຮງການຮ່ວມມືໃນໄລຍະຈະມາເຖິງ. ທ່ານລັດຖະມົນຕີ ອູແກຼນ ຫວັງວ່າ ສອງຝ່າຍຈະມີບັນດາການຢ້ຽມຢາມຂັ້ນສູງລະຫວ່າງກະຊວງປ້ອງກັນປະເທດ ເພື່ອແບ່ງປັນບົດຮຽນຮ່ວມມື, ກໍຄືການນຳຂອງສອງປະເທດ ເພື່ອແນໃສ່ເພີ່ມທະວີສາຍພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືໃນທຸກຂົງເຂດລະຫວ່າງຫວຽດນາມ ແລະ ອູແກຼນ ກວ່າອີກ.