(vovworld) - ບັນດາວິສາຫະກິດຫວຽດນາມ ຄວນເອົາໃຈໃສ່ຂຸດຄົ້ນນັບທັງຕະຫຼາດພາຍໃນປະເທດ ແລະ ສາກົນ, ຮ່ວມແຮງຮ່ວມໃຈແບ່ງປັນບົດຮຽນເພື່ອພັດທະນາ, ເພື່ອຜົນປະໂຫຍດຂອງປະຊາຄົມ ແລະ ຜົນປະໂຫຍດແຫ່ງຊາດ, ນັ້ນແມ່ນຄຳຊີ້ນຳຂອງທ່ານປະທານປະເທດຫວຽດນາມ ເຈືອງເຕີນຊາງ ພາຍຫຼັງພົບປະກັບບັນດາການນຳວິສາຫະກິດທີ່ໄດ້ຮັບລາງວັນ “ເຄື່ອງໝາຍການຄ້າແຫ່ງຊາດ 2012” ເມື່ອຕອນເຊົ້າວັນທີ 07/01 ຢູ່ຮ່າໂນ້ຍ. ທ່ານປະທານປະເທດ ເຈືອງເຕີນຊາງ ເນັ້ນໜັກວ່າ ບັນດາວິສາຫະກິດຄວນສືບຕໍ່ປະກອບສ່ວນເຂົ້າໃນວຽກງານໂຄສະນາພາບພົດຂອງປະເທດຊາດ ແລະ ຊາວຫວຽດນາມ ບົນເວທີສາກົນຢ່າງແທດຈິງ. ທ່ານກ່າວວ່າ.
“ຜ່ານສະຫະສະມາຄົມ ຂ້າພະເຈົ້າຍາກເນັ້ນໜັກເຖິງເລື່ອງແບ່ງປັນບົດຮຽນ, ສຳລັບການດຳເນີນທຸລະກິດ ນັກທຸລະກິດກໍມີຄວາມເຄັດລັບດ້ານວິຊາຊີບ ແຕ່ອັນໃດທີ່ອາດຈະແບ່ງປັນໄດ້ກໍ່ຄວນແບ່ງປັນໃຫ້ກັນ, ບັນດາບົດຮຽນທີ່ອາດຈະຖ່າຍທອດໄດ້ກໍ່ຕ້ອງຖ່າຍທອດໃຫ້ກັນ. ພິເສດບໍ່ຕຳໜິຕິຕຽນ, ໃສ່ຮ້າຍປາຍສີໃສ່ກັນ ຕ້ອງອາໄສກັນ, ແນະນຳໃຫ້ກັນ. ທີ່ໜຶ່ງແມ່ນເພື່ອຜົນປະໂຫຍດຂອງວິສາຫະກິດ, ທີ່ສອງແມ່ນເພື່ອຜົນປະໂຫຍດແຫ່ງຊາດອີກດ້ວຍ. ວິສາຫະກິດແຫ່ງດຽວບໍ່ສາມາດແກ່ດຶງທົ່ວປະເທດໃຫ້ພັດທະນາໄດ້ ຫາກຍັງຕ້ອງມີວິສາຫະກິດຫຼາຍແຫ່ງ ແລະ ຕ້ອງເສີມຂະຫຍາຍນ້ຳໃຈສາມັກຄີ”.
ທ່ານປະທານປະເທດ ເຈືອງເຕີນຊາງ ເນັ້ນໜັກວ່າ ປີ 2013 ເສດຖະກິດພາຍໃນປະເທດຍັງປະສົບກັບຄວາມຫຍຸ້ງຍາກ, ສິ່ງທ້າທາຍຫຼາຍຢ່າງ. ເພາະສະນັ້ນສະພາເຄື່ອງໝາຍການຄ້າແຫ່ງຊາດ ແລະ ກະຊວງອຸດສາຫະກຳການຄ້າ ຕ້ອງສືບຕໍ່ມີຫຼາຍຮູບແບບເພື່ອໜູນຊ່ວຍຢ່າງມີປະສິດທິຜົນ, ສ້າງເງື່ອນໄຂທາງດ້ານນະໂຍບາຍ ແລະ ແຫຼ່ງກຳລັງໃຫ້ແກ່ວິສາຫະກິດເວົ້າລວມ, ກໍຄືວິສາຫະກິດທີ່ມີເຄື່ອງໝາຍການຄ້າແຫ່ງຊາດເວົ້າສະເພາະ.