ທ່ານປະທານປະເທດ ຫງວຽນຊວັນຟຸກ ກ່າວຄຳເຫັນທີ່ການເຮັດວຽກ

ໂດຍສຶບຕໍ່ການໄປປະຕິບັດງານຢູ່ ບັນດາແຂວງທາງພາກໃຕ້ ຫວຽດນາມ, ຕອນບ່າຍວັນທີ 30 ກໍລະກົດ, ທ່ານປະທານປະເທດ ຫວຽດນາມ ຫງວຽນຊວັນຟຸກ ໄດ້ລົງຢ້ຽມຢາມ ແລະ ເຮັດວຽກຢູ່ແຂວງ ບິ່ງເຢືອງ ກ່ຽວກັບວຽກງານປ້ອງກັນຕ້ານໂລກລະບາດໂຄວິດ - 19.

ທີ່ການເຮັດວຽກ, ທ່ານປະທານປະເທດ ຫງວຽນຊວັນຟຸກ ໄດ້ເນັ້ນວ່າ ແຂວງ ບິ່ງເຢືອງ ແມ່ນແຂວງມີພົນລະເມືອງຫຼາຍ, ມີຫຼາຍວິສາຫະກິດ, ໂຮງຈັກ, ໂຮງງານ ແມ່ນສະຖານທີ່ພົວພັນຄ້າຂາຍຂອງເຂດທາງທິດຕາເວັນອອກພາກໃຕ້ ແລະ ນະຄອນໂຮ່ຈີມິນ, ດັ່ງນັ້ນ, ການປ້ອງກັນ, ຕ້ານໂລກລະບາດໂຄວິດ - 19 ປະສົບກັບຄວາມຫຍຸ້ງຍາກຫຼາຍພໍສົມຄວນ. ສະພາບຕົວຈິງໄດ້ຮຽກຮ້ອງທາງແຂວງຕ້ອງມີບັນດາມາດຕະການຢ່າງມີປະສິດທິຜົນ, ເໜືອກ່ວາສິ່ງໃດໝົດ ແມ່ນການປົກປ້ອງສຸຂະພາບຂອງປະຊາຊົນ, ຈຳກັດອັດຕາຕິດເຊື້ອ ແລະ ຈຳນວນຜູ້ເສຍຊີວິດ. ທ່ານກໍ່ສະແດງຄວາມຊົມເຊີຍ ເມື່ອແຂວງໄດ້ປະຕິບັດການລອກດາວຢ່າງມີປະສິດທິຜົນ, ທ່ານປະທານປະເທດເນັ້ນວ່າ ເມື່ອປະຕິບັດການລອກດາວ ແລະ ແຍກຫ່າງໃນສັງຄົມ, ທາງແຂວງບໍ່ປະໃຫ້ປະຊາຊົນອຶດຫິວ, ເຈັບປວຍ, ລະດົມບັນດາແຫຼ່ງກຳລັງຈາກລັດທ້ອງຖິ່ນຢ່າງສູງສຸດ ແລະ ບັນດາຜູ້ມີໃຈບຸນໃຈກຸສົນ ເພື່ອຮ່ວມແຮງຮ່ວມໃຈໜູນຊ່ວຍບັນດາເຂດປະສົບເຄາະຮ້າຍ.

ກ່ອນໜ້ານັ້ນ, ໃນຕອນເຊົ້າຂອງວັນທີ 30 ກໍລະກົດ, ທ່ານປະທານປະເທດ ຫງວຽນຊວັນຟຸກ ໄດ້ລົງຢ້ຽມຢາມ ແລະ ເຮັດວຽກຢູ່ນະຄອນ ທ້ວນອານ, ແຂວງບິ່ງເຢືອງ, ຢ້ຽມຢາມໂຮງໝໍກາງສະໜາມແຂວງ ບິ່ງເຢືອງ - ເຂດປິ່ນປົວຜູ້ຕິດເຊື້ອພະຍາດໂຄວິດ - 19 ທ້ວນຮ່ວາ, ລະດົມກຳລັງໃຈບັນດາແພດໝໍພວມປິ່ນປົວໃຫ້ຜູ້ຕິດເຊື້ອພະຍາດໂຄວິດ - 19.