ທ່ານນາງ ປະທານສະພາແຫ່ງຊາດຫວຽດນາມ ຫງວຽນທິກິມເງິນ ແລະທ່ານ Wesley W.Simina ປະທານສະພາແຫ່ງຊາດສະຫະພັນ ໄມໂຄຼນິເຊຍ

ພາຍຫຼັງພິທີຕ້ອນຮັບ, 2 ຝ່າຍໄດ້ດຳເນີນການພົບປະເຈລະຈາ. ທີ່ການພົບປະເຈລະຈາ, ທ່ານນາງປະທານສະພາແຫ່ງຊາດ ຫງວຽນທິກິມເງິນ ຢັ້ງຢືນວ່າ ຫວຽດນາມ ຍາມໃດກໍຖືເປັນສຳຄັນການພັດທະນາການພົວພັນມິດຕະພາບ ແລະ ການຮ່ວມມືກັບ ໄມໂຄຼນິເຊຍ; ຂໍສະແດງຄວາມຂອບອົກຂອບໃຈ ໄມໂຄຼນິເຊຍ ຢ່າງຈິງໃຈ ທີ່ໄດ້ໃຫ້ການສະໜັບສະໜູນ ຫວຽດນາມ ກາຍເປັນສະມາຊິກບໍ່ປະຈຳການສະພາຄວາມໝັ້ນຄົງ ສປຊ ອາຍຸການ 2008 – 2009. ກ່ຽວກັບການຮ່ວມມືຢູ່ບັນດາເວທີປາໄສຫຼາຍຝ່າຍ, ທ່ານນາງປະທານສະພາແຫ່ງຊາດຫວຽດນາມ ສະເໜີ 2 ຝ່າຍ ຈົ່ງຕັ້ງໜ້າສົມທົບ ແລະ ສະໜັບສະໜູນເຊິ່ງກັນ ແລະກັນຢູ່ບັນດາເວທີປາໄສ, ບັນດາອົງການຈັດຕັ້ງໃນພາກພື້ນ ແລະ ຫຼາຍຝ່າຍ, ເປັນຕົ້ນແມ່ນຢູ່ ສປຊ. ທ່ານນາງປະທານສະພາແຫ່ງຊາດ ຫງວຽນທິກິມເງິນ ຖືວ່າ ບັນຫາທະເລຕາເວັນອອກແມ່ນຜົນປະໂຫຍດລວມຂອງບັນດາປະເທດທັງໝົດ; ພ້ອມທັງ ຢັ້ງຢືນເຈດຈຳນົງ, ແຜນນະໂຍບາຍສະເໝີຕົ້ນສະເໝີປາຍຂອງຫວຽດນາມ ແມ່ນຮັກສາການພົວພັນມິດຕະພາບກັບບັນດາປະເທດໃນພາກພື້ນ, ແກ້ໄຂບັນດາການຂັດແຍ່ງກັນຢູ່ທະເລຕາເວັນອອກ ໂດຍສັນຕິວິທີ, ບົນພື້ນຖານກົດໝາຍສາກົນ, ກົດບັດສະຫະປະຊາຊາດ ແລະສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລ 1982 ( UNCLOS 1982) ແລະ ບັນດາຄຳໝັ້ນສັນຍາໃນພາກພື້ນ.

        ກ່ຽວກັບການພົວພັນລະຫວ່າງ 2 ສະພາແຫ່ງຊາດ, ການນຳ 2 ທ່ານ ໄດ້ເຫັນດີເປັນເອກະພາບສົ່ງເສີມ ແລະ ສົມທົບນຳກັນ ຢູ່ບັນດາເວທີປາໄສລັດຖະສະພາຫຼາຍຝ່າຍຄື: ສະຫະພັນລັດຖະສະພາສາກົນ (IPU), ເວທີປາໄສລັດຖະສະພາ ອາຊີ - ປາຊີຟິກ (APPF), … ໃນໄລຍະຈະມາເຖິງ, 2 ຝ່າຍຈະແລກປ່ຽນຄະນະຜູ້ແທນຂັ້ນສູງ, ບັນດາຂັ້ນ ແລະ ການພົບປະແລກປ່ຽນຂອງປະຊາຊົນ. ສ້າງຕັ້ງບັນດາກົນໄກຮ່ວມມື ແລະ ເຈລະຈາ, ກ້າວໄປເຖິງການລົງນາມໃນບັນດາສັນຍາສົ່ງເສີມ ແລະ ອາລັກຂາການລົງທຶນ, ຫຼີກລ້ຽງການເກັບພາສີຊ້ອນ, ການຮ່ວມມືດ້ານເຕັກນິກ….