ທ່ານປະທານສະພາແຫ່ງຊາດ ຫວຽດນາມ ເວືອງດິ່ງເຫວ້ ກ່າວຄຳເຫັນທີ່ເວທີປາໄສ (ພາບ: TTXVN)

ກ່າວຄຳເຫັນທີ່ເວທີປາໄສ, ທ່ານປະທານສະພາແຫ່ງຊາດ ຫວຽດນາມ ເວືອງດິ່ງເຫວ້ ໃຫ້ຮູ້ວ່າ ປີ 2020, ພື້ນຖານເສດຖະກິດ ຫວຽດນາມ ບັນລຸລະດັບການເຕີບໂຕ 2,91%, ເຊິ່ງນອນໃນກຸ່ມພື້ນຖານເສດຖະກິດມີການເຕີບໂຕສູງສຸດໃນໂລກ. ຫວຽດນາມ ກາຍເປັນພື້ນຖານເສດຖະກິດໃຫຍ່ອັນດັບທີ 3 ໃນພາກພື້ນ ອາຊີຕາເວັນອອກສ່ຽງໃຕ້ ດ້ວຍ GDP ກວ່າ 350 ຕື້ USD. ກອງທຶນເງິນຕາສາກົນ (IMF) ໄດ້ຄາດຄະເນວ່າ ລະດັບການເຕີບໂຄເສດຖະກິດ ຫວຽດນາມ ຈະບັນລຸ 6,5% ໃນປີ 2021, ສູງກວ່າລະດັບການເຕີບໂຕ 6% ໃນທົ່ວໂລກ. ທ່ານປະທານສະພາແຫ່ງຊາດ ຫວຽດນາມ ເວືອງດິ່ງເຫວ້ ຢັ້ງຢືນວ່າ:

          “ກ່ຽວກັບການລົງທຶນຕ່າງປະເທດ, ຫວຽດນາມ ມີແຜນນະໂຍບາຍດຶງດູດ ແລະ ຮ່ວມມືລົງທຶນຕ່າງປະເທດ ໂດຍມີການຄັດເລືອກ ບົນພື້ນຖານຖືຄຸນນະພາບ, ປະສິດທິຜົນ, ເຕັກໂນໂລຢີ ແລະ ການປົກປັກຮັກສາສິ່ງແວດລ້ອມ ແມ່ນມາດຕະຖານຕົ້ນຕໍເພື່ອຕີລາຄາ. ພ້ອມກັນນັ້ນ, ໃຫ້ບຸລິມະສິດດຶງດູດບັນດາໂຄງການຂຶ້ນກັບຂົງເຂດເຕັກໂນໂລຢີສູງ, ປ່ຽນແປງໃໝ່ປະດິດຄິດສ້າງ, ຄົ້ນຄວ້າພັດທະນາ; ມີການແຜ່ກະຈາຍ, ເຊື່ອມຕໍ່ຮ່ວມມື ແລະ ສ້າງເງື່ອນໄຂສະດວກໃຫ້ແກ່ວິສາຫະກິດ ຫວຽດນາມ ເຂົ້າຮ່ວມລະບົບມູນຄ່າ; ຊຸກຍູ້ເສດຖະກິດດີຈີຕອນ ແລະ ປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ - ສັງຄົມ ແບບຍືນຍົງຂອງ ຫວຽດນາມ”.

          ທ່ານປະທານສະພາແຫ່ງຊາດ ເວືອງດິ່ງເຫວ້ ເນັ້ນໜັກວ່າ ເພື່ອເພີ່ມທະວີການພົວພັນດ້ານເສດຖະກິດ, ການຄ້າ, ການລົງທຶນລະຫວ່າງ ຫວຽດນາມ ແລະ ໂອຕາລິດ ໃນໄລຍະຈະມາເຖິງໃຫ້ຫຼາຍກວ່າອີກ, ສອງປະເທດຕ້ອງສົ່ງເສີມ ແລະ ຊຸກຍູ້ການລົງທຶນ ແລະ ການຄ້າສອງສົ້ນ, ບົນພື້ນຖານຕ່າງຝ່າຍຕ່າງມີຜົນປະໂຫຍດ; ເພີ່ມທະວີການແລກປ່ຽນລະຫວ່າງວິສາຫະກິດນຳກັນ. ໂອຕາລິດ ອາດຈະກາຍເປັນຂົວຕໍ່ຊ່ວຍ ຫວຽດນາມ ແຊກຊຶມເຂົ້າກັບຕະຫຼາດສະຫະພາບເອີຣົບ (ອີຢູ) ແລະ ຫວຽດນາມ ຈະກາຍເປັນຂົວຕໍ່ ຊ່ວຍ ໂອຕາລິດ ແຊກຊຶມເຂົ້າຄກັບຕະຫຼາດທີ່ກວ້າງໃຫຍ່ ດ້ວຍປະຊາກອນກວ່າ 600 ລ້ານຄົນ ຄື ອາຊຽນ ແລະ ກວ່າ 800 ລ້ານຄົນຂະນະທີ່ ສົນທິສັນຍາຄູ່ຮ່ວມມືຮອບດ້ານ ແລະ ກ້າວໜ້າຂ້າມປາຊີຟິກ ເຊິ່ງ ຫວຽດນາມເປັນ ສະມາຊິກໄດ້ມີຜົນສັກສິດ. ທ່ານປະທານສະພາແຫ່ງຊາດ ເວືອງດິ່ງເຫວ້ ກໍປາດຖະໜາວ່າ ວິສາຫະກິດ ໂອຕາລິດ ໃຫ້ຄວາມສະໜັບສະໜູນເພື່ອໃຫ້ ລັດຖະບານ ໂອຕາລິດ ໜູນຊ່ວຍການສະໜອງວັກຊິນກັນພະຍາດໂຄວິດ - 19, ອຸປະກອນການແພດ, ຊ່ວຍ ຫວຽດນາມ ປ້ອງກັນ ແລະ ຕ້ານໂລກລະບາດ.

          ໃນວັນດຽວກັນ, ທ່ານປະທານສະພາແຫ່ງຊາດ ຫວຽດນາມ ເວືອງດິ່ງເຫວ້ ໄດ້ມີການພົບປະກັບທ່ານປະທານສະຫະພັນ ລັດຖະສະພາສາກົນ (IPU) Duarta Pacheco. ທີ່ການພົບປະ, ສອງຝ່າຍພ້ອມດ້ວຍບັນດາສະມາຊິກ ໄດ້ເຫັນດີນຳກັນວ່າ ຕ້ອງຕັ້ງໜ້າສະເໜີ ແລະ ຊຸກຍູ້ບັນດາຂໍ້ລິເລີ່ມ ເພື່ອແນໃສ່ປ່ຽນແປງໃໝ່ການເຄື່ອນໄຫວຂອງ IPU, ໂດຍສະເພາະແມ່ນພັດທະນາການພົວພັນຄູ່ຮ່ວມມືລະຫວ່າງ IPU ກັບ ສປຊ.