(vovworld) – ຕອນບ່າຍວັນທີ 27/1, ສະຫະສະມາຄົມພັດທະນາເຄື່ອງໝາຍການຄ້າ ຫວຽດນາມ ປະຈຳ ຍີ່ປຸ່ນ ໄດ້ຈັດຕັ້ງພິທີສະເໜີຕົວຢູ່ນະຄອນ Kisarazu ຂຶ້ນກັບແຂວງ Chiba, ເພື່ອແນໃສ່ລະດົມພຸມປັນຍາ, ກຳລັງເຫື່ອແຮງຂອງບັນດາສະມາຊິກ ເພື່ອຊອກຫາວິທີຍົກສູງຄຸນນະພາບສິນຄ້າ ຫວຽດນາມ, ຊອກຫາຕະຫຼາດ ຍີ່ປຸ່ນ ຢ່າງລະອຽດ, ເພື່ອນັບມື້ນັບມີສິນຄ້າ ຫວຽດນາມ ຫຼາຍປະເພດໄດ້ຮັບການຈຳໜ່າຍຢູ່ຕະຫຼາດໃຫຍ່ນີ້. ກ່າວຄຳເຫັນນະພິທີ, ທ່ານນາງອັກຄະລັດຖະທູດ ຫງວຽນເຟືອງຮົ່ງ ສະແດງຄວາມປິຕິຊົມຊື່ນເມື່ອໄດ້ເປັນສັກຂີພິຍານການສ້າງຕັ້ງອົງການສົ່ງເສີມການຄ້າຂອງຊາວ ຫວຽດນາມ ໃນເຂດດິນແດນ ຍີ່ປຸ່ນ ປະກອບສ່ວນຊຸກຍູ້ການພົວພັນດ້ານການຄ້າລະຫວ່າງ 2 ປະເທດ. ຕາມທ່ານນາງອັກຄະລັດຖະທູດ ແລ້ວ, 2 ປະເທດຍັງມີຄວາມສາມາດບົ່ມຊ້ອນຫຼາຍຢ່າງທີ່ອາດຈະຂຸດຄົ້ນ ເພື່ອເພີ່ມທະວີການຮ່ວມມື, ພິເສດແມ່ນໃນການຮ່ວມມືດ້ານເສດຖະກິດ, ການຄ້າ ແລະ ການລົງທຶນ. ທ່ານນາງ ຫງວຽນເຟືອງຮົ່ງ ກໍ່ເນັ້ນໜັກວ່າ: ທາງສະຖານທູດຈະຮ່ວມມື ແລະ ໜູນຊ່ວຍໃນລະດັບສູງສຸດໃນການເຄື່ອນໄຫວຂອງສະຫະສະມາຄົມ ແລະ ຫວັງວ່າ ອຳນາດການປົກຄອງທ້ອງຖິ່ນແຂວງ Chiba, ບັນດາອົງການວິສາຫະກິດ, ອົງການບໍ່ຂຶ້ນກັບ ລັດຖະບານ ແລະ ສະມາຄົມມິດຕະພາບ ຍີ່ປຸ່ນ - ຫວຽດນາມ ໃນການໜູນຊ່ວຍສະຫະສະມາຄົມເຄື່ອນໄຫວຢ່າງມີປະສິດທິຜົນ.