(vovworld) – ຕອນບ່າຍວັນທີ 27/11, ຢູ່ຮ່າໂນ້ຍ, ພົນເອກຟຸ່ງກວາງແທງ, ລັດຖະມົນຕີວ່າການກະຊວງປ້ອງກັນປະເທດ ໄດ້ໃຫ້ການຕ້ອນຮັບທ່ານ Chon De Chu, ເອກອັກຄະລັດຖະທູດສ.ເກົາຫຼີ ປະຈຳຫວຽດນາມ. ທີ່ການຕ້ອນຮັບ, ພົນເອກຟຸ່ງກວາງແທງ ເນັ້ນໜັກວ່າ, ໃນໄລຍະຜ່ານມາ ການພົວພັນຮ່ວມມືຍຸດທະສາດລະຫວ່າງ 2 ປະເທດໄດ້ຮັບການຍູ້ແຮງເທື່ອລະກ້າວ; ການພົວພັນດ້ານເສດຖະກິດ, ການເມືອງ, ການທູດ, ການພົບປະແລກປ່ຽນປະຊາຊົນໄດ້ຮັບການພັດທະນາຢ່າງບໍ່ຢຸດຢັ້ງ, ບັນລຸປະສິດທິຜົນ; 2 ຝ່າຍໄດ້ລົງນາມ ແລະ ໃນເບື້ອງຕົ້ນໄດ້ຜັນຂະຫຍາຍການຮ່ວມມືປ້ອງກັນຊາດ 2 ຝ່າຍຢ່າງມີປະສິດທິຜົນ. ໃນໄລຍະຈະມາເຖິງ, ກະຊວງປ້ອງກັນປະເທດຫວຽດນາມ ຈະຄົ້ນຄວ້າ, ຜັນຂະຫຍາຍການຮ່ວມມືກັບສ.ເກົາຫຼີ ໃນບາງຂົງເຂດອຸດສາຫະກຳປ້ອງກັນຊາດ.
ທ່ານ Chon De Chu ໃຫ້ຮູ້ວ່າ ຍາມໃດສ.ເກົາຫຼີ ກໍ່ຖືການພົວພັນຮ່ວມມືຍຸດທະສາດກັບຫວຽດນາມ ເປັນສຳຄັນ, ໃນນັ້ນການຮ່ວມມືດ້ານປ້ອງກັນຊາດ ແມ່ນການພົວພັນຮ່ວມມືສຳຄັນອັນດັບໜຶ່ງ. ໃນອາຍຸການປະຕິບັດງານຢູ່ຫວຽດນາມ, ທ່ານຈະເຮັດຈົນສຸດຄວາມສາມາດຂອງຕົນ ເພື່ອຊຸກຍູ້ການພົວພັນດັ່ງກ່າວໃຫ້ພັດທະນາ, ເໝາະສົມກັບຄວາມສາມາດບົ່ມຊ້ອນ ແລະ ທ່າແຮງຂອງແຕ່ລະຝ່າຍ.