ວັນທີ 10 ຕຸລາ, ທ່ານ Ushakov ຜູ້ຊ່ວຍວຽກປະທານາທິບໍດີ ລັດເຊຍ ໃຫ້ຮູ້ວ່າ ມີຫຼາຍກ່ວາ 30 ປະເທດ ໄດ້ຢັ້ງຢືນຈະເຂົ້າຮ່ວມກອງປະຊຸມສຸດຍອດ BRICS ຢູ່ ກາຊານ, ສະຫະພັນ ລັດເຊຍ ໃນລະຫວ່າງວັນທີ 22 – 24 ຕຸລາ. ໃນນັ້ນ, ມີ 24 ປະເທດເຂົ້າຮ່ວມຢູ່ລະດັບ ປະມຸກລັດ ແລະ ທ່ານເລຂາທິການໃຫຍ່ ສປຊ Antonio Guterres ກໍ່ຢັ້ງຢືນຈະເຂົ້າຮ່ວມກອງປະຊຸມ. 

ດ້ວຍບົດບາດເປັນປະທານ BRICS ປີ 2024, ສະຫະພັນ ລັດເຊຍ ໄດ້ຈັດຕັ້ງກ່ວາ 200 ເຫດການດ້ານການເມືອງ, ເສດຖະກິດ ແລະ ສັງຄົມ ໃນນັ້ນເຫດການຫຼັກແມ່ນ ກອງປະຊຸມສຸດຍອດ BRICS ດ້ວຍການເຂົ້າຮ່ວມຂອງບັນດາ ປະມຸກລັດ. ຢູ່ນອກກອງປະຊຸມສຸດຍອດ BRICS, ທ່ານປະທານາທິບໍດີ ລັດເຊຍ Vladimir Putin ຄາດວ່າຈະຈັດຕັ້ງການພົບປະສອງຝ່າຍ ກ່ວາ 20 ຄັ້ງກັບການນຳບັນດາປະເທດທີ່ເຂົ້າຮ່ວມກອງປະຊຸມ.

ກອງປະຊຸມສຸດຍອດ BRICS ຢູ່ກາຊານ ຄາດວ່າຈະປຶກສາຫາລືກ່ຽວກັບບັນດາບັນຫາຄວາມໝັ້ນຄົງດ້ານພະລັງງານ ແລະ ສະບຽງອາຫານ, ການນຳໃຊ້ເງິນຕາຂອງບັນດາປະເທດ ໃນການແລກປ່ຽນຄ້າຂາຍສອງຝ່າຍ ແລະ ຫຼາຍຝ່າຍ, ການເປີດກວ້າງສະມາຊິກ BRICS ແລະ ບັນດາຮູບແບບຮ່ວມມືໃໝ່, ການຮ່ວມມືຄົ້ນຄ້ວາວິທະຍາສາດ, ປ່ຽນແປງໃໝ່ເຕັກໂນໂລຢີ ແລະ ປົກປັກຮັກສາສິ່ງແວດລ້ອມ ເພື່ອແນໃສ່ສ້າງເງື່ອນໄຂໃຫ້ແກ່ການພັດທະນາແບບຍືນຍົງ, ການຮ່ວມມືດ້ານວັດທະນະທຳ, ການພົບປະແລກປ່ຽນປະຊາຊົນ…