(vovworld) - ຕອນຄຳ່ວັນທີ 6/4 ພິທີມອບລາງວັນໃຫ້ການເສັງແຕ່ງບົດກະວີ Haiku ໃຫ້ເດັກນ້ອຍໂລກປີ 2016 ຢູ່ຫວຽດນາມ ໄດ້ຈັດຂຶ້ນຢູ່ສະຖານທູດ ຍີ່ປຸ່ນປະຈຳ ຫວຽດນາມ ທີ່ ຮ່າໂນ້ຍ. ການເສັງໂດຍບໍລິສັດການບິນ ຍີ່ປຸ່ນ, ສາຂາຢູ່ ຫວຽດນາມ, ກອງທຶນ JAL ຈັດຕັ້ງ, ດ້ວຍການໜູນຊ່ວຍຂອງສະຖານທູດ ຍີ່ປຸ່ນປະຈຳ ຫວຽດນາມ, ສະໂມສອນກະວີ Haiku ຫວຽດນາມ. ຄະນະຈັດຕັ້ງໄດ້ມອບ 10 ລາງວັນໃຫ້ບັນດາບົດກະວີດີເດັ່ນທີ່ສຸດ. ບົດກະວີຂອງນ້ອງ ນິງກວີ່ນຍື, ນັກຮຽນມັດທະຍົມຕອນຕົ້ນ ໂງສີລຽນ ໄດ້ຮັບລາງວັນພິເສດ.
ການເສັງປີນີ້ມີຫົວຂໍ້ວ່າ “ຕອນເຊົ້າ“. ຄະນະຈັດຕັ້ງໄດ້ຮັບບົດກະວີເຂົ້າຮ່ວມການເສັງ 1.163 ບົດ. ກ່າວຄວາມເຫັນທີ່ພິທີມອບລາງວັນ, ທ່ານ Hiroshi Fukuda, ເອກອັກຄະລັດຖະທູດ ຍີ່ປຸ່ນປະຈຳ ຫວຽດນາມ ແບ່່ງປັນວ່າ:
“ຜ່ານການເສັງ, ພວກຂ້າພະເຈົ້າຫວັງວ່າຊາວຫວຽດນາມ, ພິເສດແມ່ນພວກນ້ອງເດັກນ້ອຍຈະມີຄວາມເຂົ້າໃຈກວ່າກ່ຽວກັບປະເທດຊາດ ແລະ ຊາວ ຍີ່ປຸ່ນ. ບໍ່ພຽງແຕ່ຜ່ານການເສັງ Haiku ເທົ່ານັ້ນ, ຫາກຍັງຜ່ານການເຄື່ອນໄຫວວັດທະນະທຳ, ສິລະປະອື່ນໆຫຼາຍຢ່າງອີກດ້ວຍ. ນີ້ແມ່ນວິທີເພື່ອໃຫ້ປະຊາຊົນສອງປະເທດຊອກຫາໄດ້ສິ່ງທີ່ຄ້າຍຄືກັນ, ເພີ່ມທະວີຄວາມເຂົ້າອົກເຂົ້າໃຈ ແລະ ນ້ຳໃຈມິດຕະພາບລະຫວ່າງສອງປະເທດ“.
ການເສັງເພື່ອແນໃສ່ຊຸກຍູ້ຄວາມຮັກໃນການແຕ່ງບົດກະວີ Haiku ແລະ ບຳລຸງລ້ຽງນ້ຳໃຈມະນຸດສະທຳຂອງເດັກນ້ອຍໃນທົ່ວໂລກ. ນີ້ກໍ່ແມ່ນການເຄື່ອນໄຫວເພື່ອແນໃສ່ຊຸກຍູ້ການແລກປ່ຽນກັບສາກົນ, ໂດຍຜ່ານຄວາມເຂົ້າໃຈກ່ຽວກັບປະເທດ ຍີ່ປຸ່ນ ໃນປະຈຸບັນ, ກໍ່ຄືພື້ນຖານວັດທະນະທຳ ຍີ່ປຸ່ນ, ເຊິ່ງແມ່ນບ່ອນກຳເນີດກະວີປະເພດພິເສດນີ້