(vovworld) – ວັນ​ທີ 3/3, ທີ່​ຮ່າ​ໂນ້ຍ, ທ່ານ​ພົນ​ເອກ ​ເຈິ​ນດ້າຍ​ກວາງ ​ໄດ້​ໃຫ້ການ​ຕ້ອນຮັບທ່ານ​ຜູ້ອຳ​ນວຍການ​ໃຫຍ່​ກະຊວງ​ປ້ອງ​ກັນ​ປະ​ເທດ Israel Dan Herel ພ້ອມ​ກັບ​ບັນດາ​ສະມາຊິກ​ໃນຄະນະ​ຜູ້​ແທນ​ກະຊວງ​ປ້ອງ​ກັນ​ປະ​ເທດ Israel  ມາ​ຢ້ຽມຢາມ ​ແລະ ​ເຮ​ັດວຽກ​ກັບ​ກະຊວງ​ຕຳຫຼວດ ​ຫວຽດນາມ. ທີ່​ການ​ຕ້ອນຮັບ, ທ່ານ​ພົນ​ເອກ ​ເຈິ​ນ ດ້າຍ​ກວາງ ຖື​ວ່າ: ນີ້​ແມ່ນ​ຂີດ​ໝາຍ​​ສຳຄັນ​ໃນ​ການ​ປັບປຸງ, ພັດທະນາ​ການ​ພົວພັນ​ຮ່ວມ​ມື ລະຫວ່າງ 2 ປະ​ເທດ​ໃນ​ຂົງ​ເຂດ​ປ້ອງ​ກັນຊາ​ດ ປ້ອງ​ກັນ​ຄວາມ​ສະຫງົບ, ປະກອບສ່ວນ​ເຮັດ​ໃຫ້ການ​ພົວພັນ​ຮ່ວມ​ມື​ມິດຕະພາບ​ອັນ​ດີງາມ ລະຫວ່າງ 2 ປະ​ເທດ ຫວຽດນາມ- Israel ​ເລິກ​ເຊິ່ງກ່ວາ​ອີກ. ທ່ານ​ລັດຖະມົນຕີ​ ​ເຈິ​ນດ້າຍ​ກວາງ ​​ສະ​ແດງ​ຄວາມ​ພາກພູມ​ໃຈ​ເມື່ອ​ເຫັນ​ວ່າ ​ໃນ​ໄລຍະ​ຜ່ານມາ​ການ​ພົວພັນ​ຮ່ວມ​ມື ລະຫວ່າງ 2 ປະ​ເທດ ຫວຽດນາມ- Israel ​ໄດ້​ຮັບ​ການພັດທະນາ​ຢ່າງ​ບໍ່​ຢຸດ​ຢັ້ງ ​ແລະ ​ເປີດ​ກ້ວາງ​ໃນ​ທຸກ​ດ້ານ, ບັນລຸ​ຜົນງານທີ່​ຕັ້ງໜ້າ​ຫຼາຍ​ຢ່າງ​ໃນ​ບັນດາ​ຂົງ​ເຂດ​​ຮ່ວມ​ມື​ປ້ອງ​ກັນຊາ​ດ ປ້ອງ​ກັນ​ຄວາມ​ສະຫງົບ, ພິ​ເສດ​ແມ່ນ​ຈາກ​ການ​ຢ້ຽມຢາມ ​ແລະ ​ເຮ​ັດວຽກ​ຂອງ​ຄະນະ​ຜູ້​ແທນ​ກະຊວງ​ຕຳຫຼວດ ​ຫວຽດນາມ ຢູ່ Israel ​ໂດຍ​ທ່ານ​ລັດຖະມົນຕີ ​ເຈິ​ນດ້າຍ​ກວາງ ນຳ​ໜ້າ​ໃນ​ປີ 2014. ທ່ານ​ລັດຖະມົນຕີວ່າການ ​ເຈິ​ນດ້າຍກວາງ ປາດ​ຖະໜາ​ວ່າ ​ໃນ​ໄລຍະ​ຈະ​ມາ​ເຖິງ​ການ​ພົວພັນ​ຮ່ວມ​ມື​ການ​ປ້ອງ​ກັນຊາ​ດ ປ້ອງ​ກັນ​ຄວາມສະຫງົບ ລະຫວ່າງ 2 ປະ​ເທດ ຈະ​ສືບ​ຕໍ່​ບັນລຸ​ໄດ້​ບັນດາ​ຜົນງານ​ໃໝ່, ປະກອບສ່ວນ​ຢ່າງ​ຕັ້ງໜ້າ​ເຂົ້າ​ໃນ​ການ​ຊຸກຍູ້​ການ​ພົວພັນ​ຮ່ວມ​ມື ລະຫວ່າງ 2 ລັດຖະບານ ​ແລະ ປະຊາຊົນ 2 ປະ​ເທດ, ​ເພື່ອ​ຜົນ​ປະ​ໂຫຍ​ດ, ສັນຕິພາບ ​ແລະ ຄວາມ​ໝັ້ນຄົງ​ໃນ​ພາກ​ພື້ນ ​ແລະ ​ໃນ​ໂລກ.