ປະທານາທິບໍດີ ລັດເຊຍ Vladimir Putin ແລະ ປະທານ ປະເທດ ຈີນ ຮູ່ຈີນເທົ່າ
ພາບ:xaluan.com
|
(vovworld) - ວັນທີ 5/6, ໃນຂອບເຂດການຢ້ຽມຢາມ ສປ ຈີນ ຢ່າງເປັນທາງການ, ປະທານາທິບໍດີ ລັດເຊຍ Vladimir Putin ໄດ້ມີການເຈລະຈາກັບທ່ານປະທານປະເທດ ຈີນ ຮູ່ຈີນເທົ່າ ຢູ່ ນະຄອນຫລວງ ປັກກີ່ງ, ໃນນັ້ນ ສອງຝ່າຍໄດ້ໃຫ້ຄຳໝັ້ນສັນຍາຮັດແຫນ້ນສາຍພົວພັນຮ່ວມມືລະຫວ່າງສອງປະເທດ ແລະ ເຫັນດີ ສືບຕໍ່ຖືການພັດທະນາການພົວພັນສອງຝ່າຍແມ່ນຫນຶ່ງໃນບັນດາທິດທາງບຸລິມະສິດຕົ້ນຕໍໃນຂົງເຂດການທູດຂອງແຕ່ລະປະເທດ. ກ່າວຄຳເຫັນທີ່ການເຈລະຈາ, ທ່ານປະທານປະເທດຈີນ ຮູ່ຈີນເທົ່າ ໄດ້ຕີລາຄາສູງການພົວພັນລະຫວ່າງ ລັດເຊຍ ແລະ ຈີນ ເຊິ່ງຮັກສາໄດ້ທ່າພັດທະນາເປັນປົກກະຕິ, ປອດໄສ ແລະ ຕັ້ງຫນ້າໃນຊຸມປີຜ່ານມາ ຍ້ອນມີຄວາມມານະພະຍາຍາມຂອງສອງຝ່າຍ. ສ່ວນທ່ານປະທານາທິບໍດີ ລັດເຊຍ Putin ຖືວ່າ: ຜົນປະໂຫຍດຂອງສອງປະເທດ ລັດເຊຍ ແລະ ຈີນ ແມ່ນສະເໝີກັນໃນຫລາຍຂົງເຂດ. ທ່ານປະທານາທິບໍດີ ລັດເຊຍ Putin ເນັ້ນຫນັກວ່າ: ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດຖືກຍົກຂຶ້ນສູ່ລະດັບສູງໃຫມ່ ແລະ ລັດເຊຍຈະສືບຕໍ່ມານະພະຍາຍາມເພີ່ມພູນຄູນສ້າງ ສາຍພົວພັນຮ່ວມມືນີ້ໃຫ້ນັບມື້ນັບເລິກເຊິ່ງກວ່າ. ໃນວັນດຽວກັນ, ລັດເຊຍ ແລະ ຈີນ ໄດ້ລົງນາມໃນຂໍ້ຕົກລົງ 12 ສະບັບກ່ຽວກັບການທູດ ແລະ ເສດຖະກິດ ເພື່ອຊຸກຍູ້ການຄ້າສອງຝ່າຍ ແລະ ລົງນາມໃນຂໍ້ຕົກລົງສ້າງຕັ້ງກອງທຶນຮ່ວມລວມມູນຄ່າ 4 ຕື້ USD.