ປະທານາທິບໍດີ ລັດເຊຍ V.Putin
|
(vovworld)- ບັນດາມາດຕະການລົງໂທດທີ່ບໍ່ເຄີຍມີມາກອ່ນ ຊື່ງອາເມລິກາ ແລະ ຝ່າຍຕາເວັນຕົກແນໃສ່ ລັດເຊຍ ກ່ຽວຂ້ອງເຖິງວິກິດການ ຢູແກຼນ ແມ່ນການກະທຳທົບຕີຕົນເອງ ສຳລັບ ອາເມລິກາ ແລະ ຈະພາໄປເຖິງການເພີ່ມລາຄາພະລັງງານຢູ່ ເອີລົບ. ວັນທີ 30/7, ກະຊວງການຕ່າງປະເທດ ລັດເຊຍ ຍົກອອກຄຳກ່າວເຕືອນດັ່ງກ່າວ ພາຍຫລັງ ສະຫະພາບເອີລົບ (ອີຢູ) ແລະ ອາເມລິກາ ປະກາດບັນດາມາດຕະການປັບໄຫມລົງໂທດທີ່ແຂງກະດ້າງທີ່ສຸດ ສຳລັບມົດສະກູ ນັບແຕ່ເມື່ອສົງຄາມເຢັນເກີດຂຶ້ນ. ກະຊວງການຕ່າງປະເທດ ລັດເຊຍ ຖືວ່າ: ອາເມລິກາ ພວມຍິງໃສ່ຕົນເອງ ເມື່ອ ລົງໂທດລັດເຊຍ ຍ້ອນບັນດານະໂຍບາຍເອກະລາດຂອງ ວັງ Kremlin ຊື່ງວໍຊິງຕັນ ຮູ້ສຶກບໍ່ພຶງພໍໃຈ. ລັດເຊຍ ຢືນຢັນວ່າ: ບັນດາມາດຕະການລົງໂທດຂອງ ອາເມລິກາ ຈະບໍ່ນຳມາເຊິ່ງຜົນປະໂຫຍດໃດ ນອກຈາກເຮັດໃຫ້ການພົວພັນສອງຝ່າຍສັບສົນຂຶ້ນຕື່ມ ແລະ ສ້າງເປັນພື້ນຖານທີ່ໄຮ້ຜົນປະໂຫຍດໃນບັນດາບັນຫາສາກົນ. ກະຊວງການຕ່າງປະເທດ ລັດເຊຍ ກໍຕຳໜິຕິຕຽນ ອີຢູ ບໍ່ສະແດງໃຫ້ເຫັນບົດບາດເອກະລາດໃນບັນດາບັນຫາສາກົນ ພ້ອມທັງໃຫ້ຮູ້ວ່າ ຜູ້ອຸປະໂພກບໍລິໂພກ ເອີລົບ ຈະຖືກຜົນຮ້າຍຢ້ອນຫລັງຈາກບັນດາມາດຕະການລົງໂທດທີ່ເລັ່ງໃສ່ບັນດາເຂດຕົ້ນຕໍໃນພື້ນຖານເສດຖະກິດລັດເຊຍ ຄື: ພະລັງງານ, ອາວຸດ ແລະ ການເງິນ.