(vovworld) – ໃນຂອບເຂດການຢ້ຽມຢາມທາງລັດຖະກິດເຖິງຫວຽດນາມ, ຕອນເຊົ້າວັນທີ 06/11, ຢູ່ຮ່າໂນ້ຍ, ທ່ານເຂລາທິການໃຫຍ່, ປະທານປະເທດຈີນ ສີຈີ້ນຜິງ ແລະ ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟຸຈ້ອງ ໄດ້ເຂົ້າຮ່ວມ ແລະ ກ່າວຄຳເຫັນທີ່ການພົບປະມິດຕະພາບຊາວໜຸ່ມຫວຽດນາມ - ຈີນ ຄັ້ງທີ 16 ແລະ ຜູ້ຊົງຄຸນວຸດທິ 2 ປະເທດ. ກ່າວຄຳເຫັນທີ່ການພົບປະ, ທ່ານເລຂາທິການໃຫຍ່ ຫງວຽນຟຸຈ້ອງ ເນັ້ນໜັກວ່າ.
“ຫວຽດນາມ ແລະ ຈີນ ມີລະບອບການເມືອງທີ່ຄ້າຍຄືກັນ ແລະ ພວມຢູ່ໃນໄລຍະພັດທະນາສຳຄັນ. ກິດຈະການປ່ຽນໃໝ່, ການເຊື່ອມໂຍງ ແລະ ການປະຕິຮູບເປີດປະຕູຢູ່ແຕ່ລະປະເທດພວມໄດ້ຮັບໄຊຊະນະທີ່ຍິ່ງໃຫຍ່ຫຼາຍຢ່າງ, ມີຄວາມໝາຍປະຫວັດສາດ, ແຕ່ການເດີນທາງໃນພາຍພາກໜ້າຍັງມີສິ່ງທ້າທາຍຫຼາຍຢ່າງ ແລະ ໜ້າທີ່ ທີ່ໄດ້ວາງອອກກໍ່ໜັກໜ່ວງທີ່ສຸດ. ນັ້ນບໍ່ພຽງແຕ່ແມ່ນພາລະກິດເທົ່ານັ້ນ, ຫາກຍັງແມ່ນຄວາມຫວັງທີ່ສັກກະລະບູຊາຂອງ 2 ຊາດ. ໄວໜຸ່ມແມ່ນເຈົ້າຂ້ອງໃນອະນາຄົດຂອງແຕ່ລະປະເທດ, ຕ້ອງແມ່ນກຳລັງແກ່ນສານ, ຕົ້ນຕໍ, ເປັນເຈົ້າການຫັນຄວາມມຸ່ງຫວັງອັນໃຫຍ່ຫຼວງຂອງແຕ່ລະຊາດນັ້ນໃຫ້ປະກົດຜົນເປັນຈິງ”.
ສ່ວນທ່ານເຂລາທິການໃຫຍ່, ປະທານປະເທດຈີນ ສີຈີ້ນຜິງ ເນັ້ນໜັກວ່າ, ຈີນ ຈະແມ່ນຄູ່ຮ່ວມມືທີ່ໄວ້ເນື້ອເຊື່ອໃຈຕະຫຼອດໄປຂອງຫວຽດນາມ, ເປັນຄູ່ຮ່ວມມືທີ່ຈິງໃຈຂອງບັນດາປະເທດພວມພັດທະນາ. ເລື່ອງປະຕິບັດຄວາມໄຝ່ຝັນຂອງ 2 ປະເທດ ຮຽກຮ້ອງໃຫ້ປະຊາຊົນ, ພິເສດແມ່ນໄວໜຸ່ມ 2 ປະເທດຕ້ອງມານະພະຍາຍາມສູ້ຊົນຢ່າງບໍ່ຮູ້ອິດບໍ່ຮູ້ເມື່ອຍ ແລະ ໄວໜຸ່ມຈະແມ່ນຜູ້ສືບທອດ ແລະ ເຊື່ອມຕໍ່ນ້ຳໃຈມິດຕະພາບລະຫວ່າງ 2 ປະເທດ.