ວັນທີ 9/1 ທ່ານເລຂາທິການໃຫຍ່, ປະທານປະເທດລາວ ຈູມມາລີ ໄຊຍະສອນ ໄດ້ໃຫ້ການຕ້ອນຮັບທ່ານ ຫງວຽນຊວັນຟູກ ຮອງນາຍົກລັດຖະມົນຕີຫວຽດນາມ ເນື່ອງໃນໂອກາດການນຳຂັ້ນສູງຂອງຫວຽດນາມ ໄປຢ້ຽມຢາມ ແລະ ເຮັດວຽກຢູ່ລາວ. ທ່ານຮອງນາຍົກລັດຖະມົນຕີ ຫງວຽນຊວັນຟູກ ລາຍງານໃຫ້ທ່ານເລຂາທິການໃຫຍ່, ປະທານປະເທດລາວ ຈູມມາລີ ໄຊຍະສອນ ຮັບຊາບ ກ່ຽວກັບໝາກຜົນກອງປະຊຸມຄັ້ງທີ 34 ຂອງ ຄະນະກຳມະການຮ່ວມມື ຫວຽດນາມ ລາວ ໃນໄລຍະຜ່ານມາ ແລະ ແຜນການຮ່ວມມືລະຫວ່າງສອງຄະນະກຳມະການໃນປີ 2012.
ທ່ານເລຂາທິການໃຫຍ່, ປະທານປະເທດລາວ ຈູມມາລີ ໄຊຍະສອນ ໄດ້ຕີລາຄາສູງໝາກຜົນການຮ່ວມມືລະຫວ່າງສອງປະເທດໃນປີ 2011 ໃນບັນດາຂົງເຂດປ້ອງກັນຊາດ, ປ້ອງກັນຄວາມສະຫງົບ, ວັດທະນະທຳ, ການສຶກສາ, ສາທາລະນະສຸກ, ພິເສດ ການຮ່ວມມືເສດຖະກິດລະຫວ່າງສອງປະເທດ ໄດ້ມີບັນດາບາດກ້າວພັດທະນາກ້າວກະໂດດ ແລະ ມີປະສິດທິຜົນກວ່າເມື່ອທຽບໃສ່ຊຸມປີກ່ອນ. ທ່ານເລຂາທິການໃຫຍ່ ປະທານປະເທດລາວ ຈູມມາລີ ໄຊຍະສອນ ຖືວ່າປີ 2012 ແມ່ນປີແຫ່ງສາມັກຄີມິດຕະພາບຫວຽດນາມ ລາວ, ສອງຝ່າຍຄວນສືບຕໍ່ບັນດາການເຄື່ອນໄຫວພົບປະແລກປ່ຽນ, ຮຳ່ຮຽນ, ແລກປ່ຽນບົດຮຽນເພື່ອການຮ່ວມມືລະຫວ່າງສອງປະເທດນັບມື້ນັບເຂົ້າສູ່ລວງເລີກ, ນຳມາຊຶ່ງປະສິດທິຜົນໃຫ້ແກ່ສອງພັກ, ສອງລັດ ແລະ ປະຊາຊົນສອງຊາດ.