ສະຖານທູດ ລາວ ປະຈຳ ຫວຽດນາມ ຈັດຕັ້ງບຸນປີໃໝ່ຢູ່ ຮ່າໂນ້ຍ
(vovworld) - ຕອນຄຳ່ວັນທີ 07/04 ຢູ່ ຮ່າໂນ້ຍ ສະຖານທູດ ລາວ ປະຈຳ ຫວຽດນາມ ໄດ້ຈັດຕັ້ງງານລ້ຽງຂ່ຳນັບຮັບຕ້ອນບຸນປີໃໝ່ (ພສ 2560) ປີລະກາ 2017. ກ່າວຄຳເຫັນທີ່ພິທີ, ທ່ານ ທອງສະຫວັນ ພົມວິຫານ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ.ລາວ ປະຈຳ ຫວຽດນາມ ໄດ້ຊີ້ແຈ້ງບາງຜົນງານ ເຊິ່ງປະຊາຊົນບັນດາເຜົ່າ ລາວ ອ້າຍນ້ອງບັນລຸໄດ້ໃນປີຜ່ານມາ ແລະ ຢືນຢັນວ່າ ບັນດາຜົນງານນັ້ນ ສ່ວນໜຶ່ງແມ່ນຍ້ອນມີການຊ່ວຍເຫຼືອຂອງພັກ, ລັດ ແລະ ປະຊາຊົນ ຫວຽດນາມ.
ທ່ານ ທອງສະຫວັນ ພົມວິຫານ ເອກອັກຄະລັດຖະທູດ
ວິສາມັນຜູ້ມີອຳນາດເຕັມແຫ່ງ ສປປ.ລາວ ປະຈຳ ຫວຽດນາມ
ທ່ານ ຟ້າມບີງມິງ ຮອງນາຍົກລັດຖະມົນຕີ,
ລັດຖະມົນຕີກະຊວງການຕ່າງປະເທດ ຫວຽດນາມ
ຕາງໜ້າພັກ, ລັດ ແລະ ປະຊາຊົນ ຫວຽດນາມ, ທ່ານ ຟ້າມບີງມິງ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ຫວຽດນາມ ໄດ້ສົ່ງຄຳອວຍພອນປີໃໝ່ເຖິງການນຳພັກ, ລັດ ແລະ ປະຊາຊົນ ລາວ. ທ່ານຮອງນາຍົກລັດຖະມົນຕີ ຟ້າມບີງມິງ ຢືນຢັນວ່າ: ຫວຽດນາມ ໝັ້ນໝາຍຈະພ້ອມກັບປະເທດ ລາວ ອ້າຍນ້ອງຮັກສາ ແລະ ເສີມຂະຫຍາຍມູນເຊື້ອສາມັກຄີມິດຕະພາບແບບພິເສດ, ຍູ້ແຮງການພົວພັນຮ່ວມມືຮອບດ້ານລະຫວ່າງ 2 ປະເທດໃຫ້ຂຶ້ນສູ່ລະດັບສູງໃໝ່ຢ່າງບໍ່ຢຸດຢັ້ງ. ທ່ານຮອງນາຍົກລັດຖະມົນຕີ ຟ້າມບີງມິງ ກ່າວວ່າ:
“ໃນປີຜ່ານມາ, ເຖິງວ່າສະພາບການໂລກ ແລະ ພາກພື້ນມີການຜັນແປສັບສົນຫລາຍຢ່າງ ແຕ່ລະປະເທດມີຄວາມຫຍຸ້ງຍາກສະເພາະກໍ່ຕາມ, ແຕ່ດ້ວຍຄວາມຕັດສິນໃຈ ແລະ ຄວາມມານະພະຍາຍາມຂອງທັງ 2 ຝ່າຍ, ການພົວພັນຮ່ວມມື ຫວຽດນາມ - ລາວ ບັນລຸໄດ້ຮັບຜົນງານສຳຄັນຫລາຍຢ່າງ. ການພົວພັນດ້ານການເມືອງໄດ້ຮັບການຮັດແໜ້ນ ແລະ ນັບມື້ນັບສະໜິດຕິດພັນ ໄວ້ເນື້ອເຊື່ອໃຈກ່ວາ. 2 ຝ່າຍແລກປ່ຽນການຢ້ຽມຢາມ ແລະ ການພົບປະຂັ້ນສູງເປັນຫລາຍຄັ້ງ, ດຳເນີນບັນດາກອງປະຊຸມສຳມະນາ, ແລກປ່ຽນບົດຮຽນຢ່າງມີປະສິດທິຜົນ ແລະ ແທດຈິງ… ”
ແຂກຜູ້ມີກຽດຮັບປະທານອາຫານຫລາຍເຍື່ອງທີ່ເປັນມູນເຊື້ອຂອງ ລາວ
ທີ່ພິທີ, ແຂກຜູ້ມີກຽດຍັງເຂົ້າຮ່ວມພິທີບາສີສູ່ຂວັນ, ພ້ອມກັນຟ້ອມລຳວົງ ແລະ ຮັບປະທານອາຫານຫລາຍເຍື່ອງທີ່ເປັນມູນເຊື້ອຂອງ ລາວ ອີກດ້ວຍ.