(vovworld) - ວັນທີ 21/5, ບັນດາ ສສຊ ເຂົ້າຮ່ວມກອງປະຊຸມສະໄໝສາມັນເທື່ອທີ 7 ປຶກສາຫາລື ບົດລາຍງານຂອງລັດຖະບານກ່ຽວກັບສະພາບການຢູ່ທະເລຕາເວັນອອກ, ເລື່ອງ ຈີນ ຕັ້ງຮ້ານເຈາະນ້ຳມັນ ໄຮຢາງ 981 ໃນເຂດໄຫຼ່ທະວີບ ແລະ ເຂດເສດຖະກິດຜູກຂາດຂອງ ຫວຽດນາມ ຢ່າງຜິດກົດໝາຍ. ບັນດາ ສສຊ ຢືນຢັນວ່າເລື່ອງ ຈີນ ຕັ້ງຮ້ານເຈາະນ້ຳມັນໃນເຂດໄຫຼ່ທະວີບ ແລະ ເຂດເສດຖະກິດຈຳເພາະຂອງ ຫວຽດນາມ ແມ່ນການລ່ວງລ້ຳອະທິປະໄຕ, ສິດອະທິປະໄຕ, ສິດອຳນາດສານຂອງ ຫວຽດນາມ ຢ່າງເຄັ່ງຮ້ອນ; ລະເມີດກົດໝາຍສາກົນ, ພິເສດແມ່ນສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລປີ 1982; ລະເມີດຖະແຫຼງການການປະພຶດຂອງບັນດາຝ່າຍຢູ່ທະເລຕາເວັນອອກ(DOC); ຝືນກັບຂໍ້ລົງລອຍຂັ້ນສູງລະຫວ່າງສອງພັກ, ລັດ ຫວຽດນາມ - ຈີນ. ສະພາແຫ່ງຊາດເຊື່ອໝັ້ນ ແລະ ເຫັນດີເປັນເອກະສັນກັນກັບແຜນນະໂຍບາຍເດັດດ່ຽວຕໍ່ສູ້ເພື່ອປົກປັກຮັກສາອະທິປະໄຕ, ຜືນແຜ່ນດິນບົນພື້ນຖານກົດໝາຍສາກົນ. ສະພາແຫ່ງຊາດສະເໜີໃຫ້ລັດຖະບານ, ຂະແໜງການ, ຂັ້ນຕ່າງໆພ້ອມກັບປະຊາຊົນໃນທົ່ວປະເທດຈົ່ງສາມັກຄີກັນ, ເອກະພາບ ແລະ ພິເສດແມ່ນເອົາໃຈໃສ່ເຖີງການຮັກສາຄວາມໝັ້ນຄົງດ້ານການເມືອງ, ຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍ, ຄວາມປອດໄພທາງສັງຄົມ, ສ້າງສະພາບແວດລ້ອມທີ່ສະດວກສະບາຍເພື່ອປະຕິບັດໜ້າທີ່ພັດທະນາເສດຖະກິດ - ສັງຄົມ, ປ້ອງກັນຊາດ - ປ້ອງກັນຄວາມສະຫງົບ, ການພົວພັນຕ່າງປະເທດຢ່າງສຳເລັດຜົນ.