ສະຫະສະມາຄົມຊາວໜຸ່ມຫວຽດນາມອອກຖະແຫຼງການຄັດຄ້ານຈີນ
ສະຫະພັນຊາວໜຸ່ມ ຫວຽດນາມ ຄັດຄ້ານການກະທຳຂອງ ຈີນ ຢ່າງແຮງ
(ພາບປະກອບ)
(vovworld) – ວັນທີ 26/5, ສະຫະພັນຊາວໜຸ່ມ ຫວຽດນາມ ໄດ້ອອກຖະແຫຼງການຄັດຄ້ານ ຈີນ ຕັ້ງຮ້ານເຈາະນ້ຳມັນໄຮຢາງ 981 ໃນເຂດເສດຖະກິດຈຳເພາະ ແລະ ເຂດໄຫຼ່ທະວີບຂອງ ຫວຽດນາມ. ຖະແຫຼງການຊີ້ແຈ້ງວ່າ: ສະຫະສະມາຄົມຊາວໜຸ່ມ ຫວຽດນາມ ຄັດຄ້ານບັນດາການກະທຳຜິດພາດຂອງ ຈີນ ແລະ ຮຽກຮ້ອງໃຫ້ ຈີນ ຖອນຮ້ານເຈາະນ້ຳມັນ ແລະ ບັນດາພາຫະນະປ້ອງກັນອອກຈາກເຂດເສດຖະກິດຈຳເພາະ ແລະ ເຂດໄຫຼ່ທະວີບຂອງ ຫວຽດນາມ ໃນທັນທີ, ຢຸດຕິບັນດາການເຄື່ອນໄຫວຄ້າຍຄືກັນໃນອະນາຄົດ, ປະຕິບັດກົດໝາຍສາກົນ, ພິເສດແມ່ນສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລປີ 1982 ຢ່າງເຂັ້ມງວດ. ສະຫະສະມາຄົມຊາວໜຸ່ມ ຫວຽດນາມ ຮຽກຮ້ອງໃຫ້ບັນດາອົງການຊາວໜຸ່ມ ແລະ ຊາວໜຸ່ມ ຫວຽດນາມ ມີການເຄື່ອນໄຫວແທດຈິງ, ເໝາະສົມ ແລະ ຖືກຕ້ອງຕາມກົດໝາຍສະໜັບສະໜູນບັນດາກຳລັງທີ່ມີຄວາມຮັບຜິດຊອບ ແລະ ຊາວປະມົງ ຫວຽດນາມ ເດັດດຽວຕິດພັນກັບທະເລ, ປົກປັກຮັກສາອະທິປະໄຕ ແລະ ບັນດາຜົນປະໂຫຍດຖືກຕ້ອງຕາມກົດໝາຍຢູ່ທະເລຕາເວັນອອກ.
ຖະແຫຼງການຍັງຢັ້ງຢືນວ່າ: ສະຫະສະມາຄົມຊາວໜຸ່ມ ຫວຽດນາມ ຍາມໃດກໍ່ປົກປັກຮັກສາ, ຊຸກຍູ້ການພົວພັນມິດຕະພາບ, ການຮ່ວມມືທີ່ເປັນມູນເຊື້ອລະຫວ່າງ ຊາວໜຸ່ມ, ປະຊາຊົນ 2 ປະເທດ ຫວຽດນາມ ແລະ ຈີນ. ສະຫະສະມາຄົມ ຊາວໜຸ່ມ ຫວຽດນາມ ຮຽກຮ້ອງໃຫ້ສະຫະສະມາຄົມ ຊາວໜຸ່ມທົ່ວປະເທດ ຈີນ, ຊາວໜຸ່ມ ແລະ ປະຊາຊົນ ຈີນ, ຊາວໜຸ່ມ ແລະ ປະຊາຊົນບັນດາປະເທດໃນໂລກອອກສຽງຮັກສາຄວາມຍຸຕິທຳ, ຮັກສາກົດໝາຍສາກົນ, ປະກອບສ່ວນຮັກສາສັນຕິພາບ ແລະ ສະຖຽນລະພາບໃນພາກພື້ນ ແລະ ຢູ່ໃນໂລກ.