ທ່ານ  ດັ້ງດິ່ງກຸ໊ຍ ເອກອັກຄະລັດຖະທູດ,  ຫົວໜ້າຄະນະຜູ້ຕາງໜ້າ ຫວຽດນາມ ປະຈຳ ສປຊ (ພາບ: TTXVN)

ໃນວັນທີ 27 ສິງຫາ, ຄະນະຜູ້ຕາງໜ້າ ຫວຽດນາມ ປະຈຳສະຫະປະຊາຊາດ ໄດ້ຈັດການໂອ້ລົມສົນທະນາຜ່ານທາງອອນລາຍກ່ຽວກັບວຽກງານການຕ່າງປະເທດຂອງ ຫວຽດນາມ ເນື່ອງໃນໂອກາດສະເຫຼີມສະຫຼອງ 75 ປີ ແຫ່ງວັນສ້າງຕັ້ງຂະແໜງການທູດ ຫວຽດນາມ ໂດຍພາຍໃຕ້ການເປັນປະທານຂອງ ທ່ານ  ດັ້ງດິ່ງກຸ໊ຍ ເອກອັກຄະລັດຖະທູດ,  ຫົວໜ້າຄະນະຜູ້ຕາງໜ້າ ຫວຽດນາມ ແລະ ມີການເຂົ້າຮ່ວມຂອງຜູ້ຕາງໜ້າວົງການນັກຮຽນຮູ້, ພະນັກງານຂອງບັນດາອົງການຕາງໜ້າ ຫວຽດນາມ ທີ່ພວມເຮັດວຽກຢູ່ບັນດາລັດຂອງ ອາເມລິກາ.

ກ່າວຄຳເຫັນທີ່ການໂອ້ລົມສົນທະນາ, ທ່ານ ຮ່າກິມງອັກ ເອກອັກຄະລັດຖະທູດ ຫວຽດນາມ ປະຈຳ ອາເມລິກາ ໄດ້ຢັ້ງຢືນວ່າ ບັນດາອົງການທຸຕານຸທູດຂອງ ຫວຽດນາມ ປະຈຳ ອາເມລິກາໄດ້ມີຄວາມມານະພະຍາຍາມຫຼາຍໃນການຊຸກຍູ້ການພົວພັນກັບ 2 ຄູ່ຮ່ວມມືທີ່ສຳຄັນທີ່ສຸດແມ່ນ ສະຫະປະຊາຊາດ ແລະ ອາເມລິກາ, ໃນສະພາບການທີ່ ຫວຽດນາມ ເປັນກຳມະການບໍ່ປະຈຳການສະພາຄວາມໝັ້ນຄົງສະຫະປະຊາຊາດ, ພ້ອມທັງປະຕິບັດວຽກງານປົກປ້ອງພົນລະເມືອງໄດ້ເປັນຢ່າງດີໃນສະພາບການໂລກລະບາດໂຄວິດ-19 ຍັງສືບຕໍ່ຄຸກຄາມ.

ທ່ານ ດັ້ງດິ່ງກຸ໊ຍ ແບ່ງປັນວ່າ ພາຍຫຼັງ 2 ປີ ທີ່ແບກຫາບພາລະໜ້າທີ່ເປັນຫົວໜ້າຄະນະຜູ້ຕາງໜ້າ ຫວຽດນາມ ປະຈຳສະຫະປະຊາຊາດ, ທ່ານໄດ້ມີກາລະໂອກາດເຮັດວຽກ ແລະ ພົບປະກັບການນຳ ແລະ ບັນດາຜູ້ຕາງໜ້າທາງການທູດຂອງ 193 ປະເທດ ໃນທົ່ວໂລກ, ທ່ານ ເຫັນວ່າ ຫວຽດນາມ ໄດ້ຮັບຄວາມເຄົາລົບອັນໃຫຍ່ຫຼວງທີ່ສຸດຈາກປະຊາຄົມສາກົນ. ບັນດາຄວາມມານະພະຍາຍາມຂອງ ຫວຽດນາມ ແມ່ນແນໃສ່ປະຕິບັດບັນດາເປົ້າໝາຍສະຫັດສະວັດໂດຍ ສະຫະປະຊາຊາດເປັນຜູ້ລິເລີ່ມຄືເປົ້າໝາຍຄວາມສະເໝີພາບລະຫວ່າງຍິງ-ຊາຍ, ເພື່ອສິດທິມະນຸດ. ຫວຽດນາມ ໄດ້ເປັນເຈົ້າການເຊື່ອມໂຍງ ແລະ ຍາມໃດກໍ່ມານະພະຍາຍາມເຄົາລົບກົດໝາຍສາກົນ.