(vovworld) – ທີ່ກອງປະຊຸມຄັ້ງທີ 24 ບັນດາປະເທດສະມາຊິກຂອງສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982 (UNCLOS) ເຊິ່ງດຳເນີນໄປແຕ່ວັນທີ 09 – 13/06, ຢູ່ສຳນັກງານສະຫະປະຊາຊາດ ທີ່ນິວຢອກ, ປະເທດອາເມລິກາ. ໃນບົດກ່າວປາໄສທີ່ກອງປະຊຸມຄົບຄະນະ, ທ່ານເອກອັກຄະລັດຖະທູດ ເລຮວ່າຍຈູງ, ຫົວໜ້າຄະນະຜູ້ຕາງໜ້າຫວຽດນາມ ປະຈຳສປຊ ຮຽກຮ້ອງໃຫ້ປະຊາຄົມໂລກ, ໃນນັ້ນມີບັນດາສະມາຊິກຂອງ UNCLOS ສືບຕໍ່ເອົາໃຈໃສ່ເຖິງສະພາບການຢູ່ທະເລຕາເວັນອອກ, ຄັດຄ້ານບັນດາການກະທຳພຽງລຳພັງຝ່າຍດ່ຽວທີ່ກໍ່ຄວາມເຄັ່ງຕຶງ, ພ້ອມທັງສະໜັບສະໜູນເລື່ອງບໍ່ນຳໃຊ້ອາວຸດ ຫຼື ນາບຂູ່ນຳໃຊ້ອາວຸດ ແລະ ແກ້ໄຂການຂັດແຍ້ງທີ່ເໝາະສົມກັບກົດໝາຍສາກົນ.
ທີ່ການປຶກສາຫາລື, ຄະນະຜູ້ແທນຫວຽດນາມ ໄດ້ຢືນຢັນອີກເທື່ອໜຶ່ງກ່ຽວກັບອະທິປະໄຕຂອງຫວຽດນາມ ທີ່ມີຕໍ່ໝູ່ເກາະຮ່ວາງຊາ ແລະ ເຈື່ອງຂາ, ສືບຕໍ່ຊີ້ໃຫ້ເຫັນລັກສະນະຜິດກົດໝາຍຂອງເລື່ອງຈີນ ຕັ້ງຮ້ານເຈາະນ້ຳມັນໄຮ່ຢາງ 981 ໃນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ; ພ້ອມທັງປະຕິເສດບັນດາທັດສະນະຜິດພາດ ແລະ ເສດສັນປັ້ນແຕງຂອງຈີນ ທີ່ໄດ້ລາຍງານຢູ່ກອງປະຊຸມ.
ທີ່ກອງປະຊຸມ, ມີຫຼາຍປະເທດ ໃນນັ້ນມີຍີ່ປຸ່ນ, ຟີລິບປີນ, ມາເລເຊຍ… ໄດ້ສະແດງຄວາມວິຕົກກັງວົນຕໍ່ບັນດາການຜັນແປທີ່ສັບສົນຢູ່ທະເລຕາເວັນອອກ. ບັນດາຜູ້ແທນໄດ້ຮຽກຮ້ອງໃຫ້ຝ່າຍຕ່າງໆຈົ່ງລະງັບໃຈ, ບໍ່ນາບຂູ່ ຫຼື ນຳໃຊ້ອາວຸດ, ແກ້ໄຂການຂັດແຍ້ງກັນຜ່ານບັນດາມາດຕະການສັນຕິພາບ, ເໝາະສົມກັບກົດໝາຍສາກົນ ແລະ UNCLOS, ພ້ອມທັງສະເໝີໃຫ້ຝ່າຍຕ່າງໆປະຕິບັດຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ແລະ ປະມວນຂໍ້ກຳນົດການປະພຶດຂອງຝ່າຍຕ່າງໆຢູ່ທະເລຕາເວັນອອກ (COC) ຢ່າງເຂັ້ມງວດ.