(vovworld) – ວັນທີ 06/06, ຢູ່ສຳນັກງານສະຫະປະຊາຊາດ (ສປຊ) ທີ່ນະຄອນນິວຢອກ, ປະເທດອາເມລິກາ, ທ່ານເອກອັກຄະລັດຖະທູດຫວຽດນາມ ເລຮ່ວາຍຈູງ, ຫົວໜ້າຄະນະຜູ້ຕາງໜ້າຫວຽດນາມ ປະຈຳສປຊ, ສືບຕໍ່ສົ່ງຈົດໝາຍທາງການຕໍ່ທ່ານເລຂາທິການໃຫຍ່ ສປຊ Ban Ki moon.
ໃນຈົດໝາຍທາງການ, ກະຊວງການຕ່າງປະເທດຫວຽດນາມ ສືບຕໍ່ຢືນຢັນເລື່ອງຈີນ ຕັ້ງຮ້ານເຈາະນ້ຳມັນ ໄຮຢາງ 981 ແລະ ບັນດາກຳປັນປ້ອງກັນເຄື່ອນໄຫວຢ່າງຜິດກົດໝາຍໃນເຂດໄຫຼ່ທະວີບ, ເຂດເສດຖະກິດຈຳເພາະຂອງຫວຽດນາມ, ຈີນໄດ້ລ່ວງລ້ຳອະທິປະໄຕ ແລະ ສິດອຳນາດສານຂອງຫວຽດນາມ ຕາມຂໍ້ກຳນົດຂອງສົນທິສັນຍາສປຊ ກ່ຽວກັບກົດໝາຍວ່າດ້ວຍທະເລປີ 1982 ຢ່າງຮ້າຍແຮງ, ໃນນັ້ນຫວຽດນາມ ແລະ ຈີນ ລ້ວນແຕ່ເປັນສະມາຊິກ.
ຈົດໝາຍທາງການຢືນຢັນວ່າ ຫວຽດນາມ ໄດ້ມານະພະຍາຍາມແລກປ່ຽນ, ເຈລະຈາກັບຈີນ ແຕ່ຝ່າຍຈີນ ບໍ່ພຽງແຕ່ບໍ່ຕອບສະນອງບັນດາຂໍ້ສະເໜີໂດຍເຈດຕະນາດີນັ້ນ ຫາກຍັງເຄື່ອນຮ້ານເຈາະນ້ຳມັນ ແລະ ບັນດາກຳປັ່ນປ້ອງກັນໄປຍັງຈຸດອື່ນ ແຕ່ຍັງນອນໃນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ ອີກດ້ວຍ.
ຈົດໝາຍທາງການໄດ້ຢ້ຳຄືນຄວາມຮຽກຮ້ອງເປັນທຳຂອງຫວຽດນາມ ແມ່ນຕັດສິນໃຈຮຽກຮ້ອງຈີນ ເຄົາລົບກົດໝາຍສາກົນ, ຢຸດຕິບັນດາການກະທຳລ່ວງລ້ຳອະທິປະໄຕ ແລະ ສິດອຳນາດສານຂອງຫວຽດນາມ ສຳລັບເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ, ຖອນຮ້ານເຈາະນ້ຳມັນໄຮຢາງ 981 ພ້ອມກັບບັນດາກຳປັ່ນປ້ອງກັນອອກຈາກເຂດນ່ານທະເລຂອງຫວຽດນາມ ແລະ ບໍ່ປະໃຫ້ເກີດບັນດາການກະທຳຄ້າຍຄືກັນອີກ.