ທ່ານນາງ ໂຄສົກກະຊວງການຕ່າງປະເທດ ຫວຽດນາມ ຟ້າມທູຮັ່ງ (ພາບ: TTXVN)

ຕອນບ່າຍວັນທີ 19 ກັນຍາ, ໃນການຖະແຫຼງຂ່າວນັດສາມັນຂອງກະຊວງການຕ່າງປະເທດ ຫວຽດນາມ, ທ່ານນາງ ໂຄສົກກະຊວງການຕ່າງປະເທດ ຫວຽດນາມ ຟ້າມທູຮັ່ງ ຢັ້ງຢືນວ່າ ຫວຽດນາມ ຍາມໃດກໍເຄົາລົບຄວາມສາມັກຄີອັນລ້ຳຄ່າ, ການລະດົມກຳລັງໃຈ, ຄຳຢື້ຢາມຖາມຂ່າວ, ການຊ່ວຍເຫຼືອຢ່າງທັນການຂອງປະຊາຄົມສາກົນ ແລະ ປະຊາຄົມຊາວ ຫວຽດນາມ ຢູ່ຕ່າງປະເທດ ທີ່ມີຕໍ້ລັດຖະບານ ແລະ ປະຊາຊົນ ຫວຽດນາມ, ເພື່ອແນໃສ່ຮ່ວມແຮງຮ່ວມໃຈແກ້ໄຂຜົນຮ້າຍຢ້ອນຫຼັງຈາກໄພທຳມະຊາດ, ພາຍຸ, ນ້ຳຖ້ວມກໍ່ຂຶ້ນ. ຜ່ານນັ້ນ, ຊ່ວຍ ຫວຽດນາມ ກັບຄືນສູ່ສະພາບການເປັນປົກກະຕິໂດຍໄວ, ຟື້ນຟູການຜະລິດດຳເນີນທຸລະກິດ ແລະ ຊຸກຍູ້ການເຕີບໂຕ.  ທ່ານນາງ ຟ້າມທູຮັ່ງ ກໍເຜີຍໃຫ້ຮູ້ວ່າ: ໄລ່ຮອດປັດຈຸບັນ, ປະຊາຄົມຊາວ ຫວຽດນາມ ຢູ່ຕ່າງປະເທດ ໄດ້ແຜ່ບໍລິຈາກ, ໃຫ້ການຊ່ວຍເຫຼືອໂດຍກົງຈຳນວນເງິນເກືອບ 530.000 USD ແລະ ຈະສືບຕໍ່ແຜ່ບໍລິຈາກ ເພີ່ມເຕີມ ເພື່ອສະໜັບສະໜູນບັນດາທ້ອງຖິ່ນ, ປະຊາຊົນທີ່ຖືກຜົນເສຍຫາຍຈາກພາຍຸ.

        ໃນການຖະແຫຼງຂ່າວຄັ້ງນີ້ທ່ານນາງໂຄສົກກະຊວງການຕ່າງປະເທດ ຫວຽດນາມ ຟ້າມທູຮັ່ງ ກໍໄດ້ສະແດງທັດສະນະຂອງ ຫວຽດນາມ ຕໍ່ການຜັນແປຫຼ້າສຸດຢູ່ຕາເວັນອອກກາງ, ພາຍຫຼັງທີ່ມີໂທລະສັບ, laptop ລະເບີດເປັນຈຳນວນຫຼາຍຢູ່ ລີບັງ ເຮັດໃຫ້ຫຼາຍຄົນເສຍຊີວິດ ແລະ ບາດເຈັບ, ທ່ານນາງໃຫ້ຮູ້ວ່າ:

        “ຫວຽດນາມ ມີຄວາມສົນໃຈຕິດຕາມ ແລະ ມີຄວາມວິຕົກກັງວົນຢ່າງເລິກເຊິ່ງຕໍ່ບັນດາການຜັນແປທີ່ເກີດຂຶ້ນຫວ່າງມໍ່ໆມານີ້ຢູ່ພາກພື້ນຕາເວັນອອກກາງ. ຫວຽດນາມ ຮຽກຮ້ອງໃຫ້ບັນດາຝ່າຍຈົ່ງອົດກັ້ນ, ຢຸດຕິການປະທະກັນ, ເພີ່ມທະວີການເຈລະຈາ, ແກ້ໄຂບັນດາຂໍ້ຂັດແຍ້ງກັນໂດຍສັນຕິວິທີ, ປະຕິບັດກົດໝາຍສາກົນ ແລະ ກົດບັດ ສປຊ, ເພື່ອຜົນປະໂຫຍດຂອງປະຊາຊົນ ແລະ ສັນຕິພາບທີ່ມີສະຖຽນລະພາບຢູ່ພາກພື້ນ ແລະ ໃນໂລກ.”.