ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽດນາມ ຟ້າມບີງມີງ ແລະ ທ່ານຮອງນາຍົກລັດຖະມົນຕີ ລັດຖະມົນຕີກະຊວງພາຍໃນ ກຳປູເຈຍ  Sar Kheng ເປັນປະທານກອງປະຊຸມ

ກ່າວຄຳເຫັນທີ່ກອງປະຊຸມ, ທ່ານຮອງນາຍົກລັດຖະມົນຕີ ຟ້າມບີງມີງ ໃຫ້ຮູ້ວ່າ: ກອງປະຊຸມໄດ້ດຳເນີນໃນສະພາບການພົວພັນລະຫວ່າງສອງປະເທດນັບມື້ນັບພັດທະນາເຂົ້າສູ່ລວງເລິກ, ແທດຈິງ ແລະ ມີປະສິດທິຜົນ. ການພົວພັນດ້ານການເມືອງລະຫວ່າງສອງປະເທດນັບມື້ນັບໄດ້ຮັບການປັບປຸງ ແລະ ເພີ່ມທະວີ. ກ່ຽວກັບເສດຖະກິດ, ປີ 2018 ວົງເງິນການຄ້າສອງສົ້ນບັນລຸໄດ້ກວ່າ 4,6 ຕື້ USD ແລະ ຄາດວ່າຈະບັນລຸ 5 ຕື້ USD ກ່ອນປີ 2020. ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຟ້າມບີງມີງ ໃຫ້ຮູ້ວ່າ:

“ການແລກປ່ຽນດ້ານການຄ້າຊາຍແດນລະຫວ່າງສອງປະເທດນັບມື້ນັບພັດທະນາຢ່າງຟົດຟື້ນ, ສອງຝ່າຍໄດ້ສຳເລັດການເຈລະຈາ ແລະ ກ້າວໄປເຖິງການລົງນາມໃນສັນຍາການຄ້າຊາຍແດນ, ຕະຫລາດຊາຍແດນແບບຢ່າງ ຫວຽດນາມ - ກຳປູເຈຍ ໄດ້ປະຕິບັດສຳເລັດ 90% ວຽກງານກໍ່ສ້າງ ແລະ ຈະນຳເຂົ້າເຄື່ອນໄຫວໃນຕົ້ນປີ 2019. ພ້ອມກັນນັ້ນ ບັນດາຄູ່ດ່ານຊາຍແດນຈະໄດ້ຮັບການຍົກລະດັບ, ປັບປຸງລະບຽບການບໍລິຫານເທື່ອລະກ້າວ, ຫລຸດຜ່ອນເວລາເຮັດລະບຽບການພາສີ.”

ທ່ານຮອງນາຍົກລັດຖະມົນຕີ, ລັດຖະມົນຕີກະຊວງພາຍໃນ ກຳປູເຈຍ Sar Kheng ຕີລາຄາສູງຄວາມມານະພະຍາຍາມຂອງອຳນາດການປົກຄອງ, ພະນັກງານປະຕິບັດຫນ້າທີ່ຢູ່ບັນດາແຂວງຕິດກັບຊາຍແດນສອງປະເທດ ໄດ້ສົມທົບກັນຢ່າງແຫນ້ນແຟ້ນໃນການປະຕິບັດແຜນການຮ່ວມມືຊື່ງກອງປະຊຸມຄັ້ງທີ 9 ໃນປີ 2017 ໄດ້ເປັນເອກະພາບ. ບັນດາແຂວງຊາຍແດນລະຫວ່າງສອງປະເທດ ໄດ້ປັບປຸງ, ເສີມຂະຫຍາຍການພົວພັນຮ່ວມມືທີ່ດີ, ຮັກສາຕ/ຄວາມເປັນລະບຽບຮຽບຮ້ອຍເຂດຊາຍແດນ, ເພີ່ມທະວີການແລກປ່ຽນດ້ານການຄ້າ, ການເຂົ້າອອກເມືອງ, ເອົາໃຈໃສ່ລົງທຶນຮ່ວມມືໃນບັນດາຂົງເຂດການສຶກສາ, ໄຟຟ້າ, ຄົມມະນາຄົມຂົນສົ່ງ, ຂີດຂັ້ນປັກຫລັກໝາຍຊາຍແດນ.