ທ່ານພົນຈັດຕະວາ ຫງວຽນວັນລອງ, ຮອງລັດຖະມົນຕີກະຊວງຕຳຫຼວດ ຫວຽດນາມ ກ່າວຄຳເຫັນທີ່ກອງປະຊຸມ

ໃນລະຫວ່າງວັນທີ 29 – 31 ສິງຫາ, ຢູ່ບາງກອກ, ໄທ, ໄດ້ດຳເນີນກອງປະຊຸມປະຕິບັດກົດໝາຍໃນຂົງເຂດກ່ຽວກັບການປ້ອງກັນ, ຕ້ານການສໍ້ລາດບັງຫຼວງໂດຍຫ້ອງການອົງການປ້ອງກັນ, ຕ້ານອາດຊະຍາກຳຂອງ ສປຊ (UNODC) ພາກພື້ນອາຊີຕາເວັນອອກສ່ຽງໃຕ້ - ປາຊີຟິກ, ຄະນະກຳມະການປ້ອງກັນ, ຕ້ານການສໍ້ລາດບັງຫຼວງແຫ່ງຊາດ ໄທ ແລະ ກະຊວງຍຸຕິທຳ ສ.ເກົາຫຼີ ຮ່ວມຈັດຕັ້ງ. ກອງປະຊຸມມີການເຂົ້າຮ່ວມຂອງຜູ້ແທນກ່ວາ 200 ທ່ານທີ່ມາຈາກ 17 ປະເທດຢູ່ພາກພື້ນອາຊີ - ປາຊີຟິກ. ຄະນະຜູ້ແທນກະຊວງຕຳຫຼວດ ຫວຽດນາມ ໂດຍທ່ານພົນຈັດຕະວາ ຫງວຽນວັນລອງ, ຮອງລັດຖະມົນຕີກະຊວງຕຳຫຼວດ ຫວຽດນາມ, ນຳໜ້າເຂົ້າຮ່ວມ ແລະ ກ່າວຄຳເຫັນທີ່ວາລະປຶກສາຫາລື.

ເຂົ້າຮ່ວມການປຶກສາຫາລືຄັ້ງທີ 1 ດ້ວຍຫົວຂໍ້ “ສິ່ງທ້າທາຍ ແລະ ວຽກງານປ້ອງກັນ, ຕ້ານການສໍ້ລາດບັງຫຼວງຢູ່ພາກພື້ນ ອາຊີຕາເວັນອອກສ່ຽງໃຕ້”, ທ່ານຮອງລັດຖະມົນຕີ ຫງວຽນວັນລອງ ໄດ້ມີບົດກ່າວປາໄສແບ່ງປັນບັນດາໝາກຜົນທີ່ບັນລຸໄດ້ ແລະ ບົດຮຽນປະສົບການໃນວຽກງານປ້ອງກັນ, ຕ້ານການສໍ້ລາດບັງຫຼວງຢູ່ ຫວຽດນາມ. ທ່ານ ຫງວຽນວັນລອງ ຢັ້ງຢືນວ່າ ການເຂົ້າຮ່ວມສົນທິສັນຍາ ສປຊ ກ່ຽວກັບການຕ້ານການສໍ້ລາດບັງຫຼວງ ໂດຍໄວທີ່ສຸດ (19/8/2009) ໄດ້ຢັ້ງຢືນຄວາມຕັດສິນໃຈຢ່າງສູງຂອງລັດຖະບານ ຫວຽດນາມ ໃນວຽກງານປ້ອງກັນ, ຕ້ານການສໍ້ລາດບັງຫຼວງ.

ຢູ່ກອງປະຊຸມ, ຄະນະຜູ້ແທນ ຫວຽດນາມ ກໍ່ໄດ້ຍົກອອກຂໍ້ສະເໜີແນະທີ່ຈຳເປັນເພື່ອປະຕິບັດສົນທິສັນຍາດັ່ງກ່າວຢ່າງມີປະສິດທິຜົນ. ຫວຽດນາມ ໃຫ້ຄຳໝັ້ນສັນຍາ ສົມທົບກັບບັນດາປະເທດ, ອົງການຈັດຕັ້ງຂອງ ສປຊ ກ່ຽວກັບການປ້ອງກັນ, ຕ້ານການສໍ້ລາດບັງຫຼວງຢ່າງແໜ້ນແຟ້ນ. ດ້ວຍບົດບາດເປັນສະມາຊິກ ອາຊຽນ, ຫວຽດນາມ ໃຫ້ຄຳໝັ້ນສັນຍາ ເຂົ້າຮ່ວມຢ່າງຕັ້ງໜ້າ ແລະ ມີຄວາມຮັບຜິດຊອບໃນຂອບເຂດການຮ່ວມມືຂອງ ອາຊຽນເວົາລວມ ແລະ ຂົງເຂດປ້ອງກັນ, ຕ້ານການສໍ້ລາດບັງຫຼວງເວົ້າສະເພາະ.