ຫວຽດນາມສົ່ງສານການທູດຄັດຄ້ານຈີນເຖິງເລຂາທິການໃຫຍ່ສປຊ
ທ່ານເລຂາທິການໃຫຍ່ ສປຊ Bankimoon
|
(vovworld)- ແຕ່ວັນທີ 28/5, ຄະນະຜູ້ຕາງຫນ້າຫວຽດນາມປະຈຳ ສປຊ ໄດ້ສົ່ງຈົດໝາຍໃຫ້ແກ່ທ່ານເລຂາທິການໃຫຍ່ ສປຊ Bankimoon ສະເຫນີປະກາດສານການທູດຂອງກະຊວງການຕ່າງປະເທດຫວຽດນາມສົ່ງເຖິງກະຊວງການຕ່າງປະເທດຈີນ, ຄັດຄ້ານເລື່ອງຈີນ ບໍ່ຍອມຮັບຢຸດຕິບັນດາການກະທຳລະເມີດອະທິປະໄຕ ແລະ ອຳນາດສານຂອງຫວຽດນາມ ສຳລັບເຂດເສດຖະກິດຈຳເພາະຂອງຫວຽດນາມ ຕາມກຳນົດຂອງສົນທິສັນຍາ ສປຊ ກ່ຽວກັບກົດໝາຍທະເລປີ 1982 ຊື່ງທັງຝ່າຍຫວຽດນາມ ແລະ ຈີນ ລ້ວນແຕ່ເປັນສະມາຊິກ. ໃນສານການທູດ, ຫວຽດນາມ ເດັດດຽ່ວປະຕິເສດຂໍ້ອ້າງແກ້ຄວາມຂອງຝ່າຍຈີນ ໂດຍຖືວ່າ: ບ່ອນທີ່ຈີນຕັ້ງຮ້ານເຈາະນ້ຳມັນໄຮ່ຢາງ 981 ແມ່ນຂຶ້ນກັບເຂດທະເລຂອງອັນທີ່ເອີ້ນວ່າ“ໝູ່ເກາະໄຕຊາ”. ຫວຽດນາມຢືນຢັນອີກຄັ້ງຫນຶ່ງວ່າ“ໝູ່ເກາະໄຕຊາ ຊື່ງຝ່າຍຈີນເວົ້າເຖິງນັ້ນແມ່ນ ໝູ່ເກາະຮ່ວາງຊາຂອງຫວຽດນາມ ຊື່ງຈີນໄດ້ຢືດຄອງຢ່າງຜິດກົດໝາຍດ້ວຍກຳລັງອາວຸດເມື່ອປີ 1974. ຫວຽດນາມ ຮຽກຮ້ອງຈີນ ຖອນຮ້ານເຈາະນ້ຳມັນ ພ້ອມກັບກຳປ່ັນຄຸ້ມຊູທັງໝົດອອກຈາກເຂດເສດຖະກິດຈຳເພາະ ແລະ ເຂດໄຫລ່ທະວີບຂອງຫວຽດນາມ, ຢຸດຕິທຸກການເຄື່ອນໄຫວສົ່ງຜົນສະທ້ອນເຖິງຄວາມໝັ້ນຄົງ ຄວາມປອດໄພການເດີນທະເລກໍຄືສັນຕິພາບ ແລະ ສະຖຽນລະພາບຢູ່ພາກພື້ນ. ຫວຽດນາມ ຢືນຢັນວ່າ: ພາຍຫລັງຈີນຖອນຮ້ານເຈາະນ້ຳມັນອອກຈາກເຂດເສດຖະກິດຈຳເພາະຂອງຫວຽດນາມ, 2 ຝ່າຍ ຈະປືກສາຫາລືບັນດາມາດຕະການກວດກາສະພາບການ ແລະ ບັນດາບັນຫາບົນທະເລລະຫວ່າງສອງປະເທດເປັນປົກກະຕິ. ຄະນະຜູ້ຕາງຫນ້າຫວຽດນາມ ປະຈຳ ສປຊ ສະເຫນີທ່ານເລຂາທິການໃຫຍ່ ສປຊ ຈົ່ງປະກາດສານການທູດສະບັບດັ່ງກ່າວຄືດັ່ງເອກະສານຕົ້ນຕໍຂອງກອງປະຊຸມສະມັດຊາໃຫຍ່ ສປຊ ຊຸດທີ 68.