(vovworld) – ກອງປະຊຸມວົງແຄບລັດຖະມົນຕີການຕ່າງປະເທດ ອາຊຽນ ສິ້ນສຸດລົງໃນຕອນບ່າຍວັນທີ 14/8, ຢູ່ແຂວງ ຫົວຫີນ ປະເທດໄທ ພາຍຫຼັງໂຮມປະຊຸມມາເປັນເວລາ 2 ວັນ. ກ່ຽວກັບການກຳນົດທິດໃນອະນາຄົດຂອງ ອາຊຽນ ໄລຍະຫຼັງປີ 2015, ບັນດາລັດຖະມົນຕີເຫັນດີເປັນເອກະສັນຍູ້ໄວບັນດາຈຸດໝາຍກໍ່ສ້າງປະຊາຄົມໃນປີ 2015, ພ້ອມທັງເລີ່ມຕົ້ນການແລກປ່ຽນ ແລະ ສ້າງວິໄສທັດເພື່ອໃຫ້ ອາຊຽນ ສືບຕໍ່ພັດທະນາໝັ້ນຄົງເຂັ້ມແຂງ ແລະ ຜັນຂະຫຍາຍບົດບາດຂອງບັນດາບັນຫາທົ່ວໂລກໃນທົດສະວັດຕໍ່ໄປ. ບັນດາລັດຖະມົນຕີລ້ວນແຕ່ເຫັນດີເປັນເອກະສັນຖືວ່າ: ແຕ່ນີ້ຮອດວັນທີ 31/12/2015 ຄວນວາງອອກວິວັດທະນາການເພື່ອສ້າງວິໄສທັດຂອງ ອາຊຽນ ຫຼັງປີ 2015. ບັນດາປະເທດສະມາຊິກຄວນເພີ່ມທະວີບັນດາຄວາມມານະພະຍາຍາມລະດົມແຫຼ່ງຊັບພະຍາກອນມະນຸດກ່ວາອີກ, ປະຕິບັດບັນດາໂຄງການຮ່ວມມືສຳຄັນຂອງ ອາຊຽນ ເພື່ອແນໃສ່ຮັດແຄບຊ່ອງຫວ່າງພັດທະນາ.
ກ່ຽວກັບບັນດາບາດກ້າວກະກຽມໃຫ້ແກ່ກອງປະຊຸມລັດຖະມົນຕີການຕ່າງປະເທດ ອາຊຽນ - ຈີນ ສະເຫຼີມສະຫຼອງ 10 ປີແຫ່ງວັນສ້າງຕັ້ງການພົວພັນຄູ່ຮ່ວມມືຍຸດທະສາດລະຫວ່າງ 2 ຝ່າຍ, ທ່ານລັດຖະມົນຕີຊ່ວຍວ່າການກະຊວງການຕ່າງປະເທດ ຫວຽດນາມ ຟ້າມກວາງວີງ ໃຫ້ຮູ້ວ່າ:
“ບັນດາລັດຖະມົນຕີ ອາຊຽນ ໄດ້ຢືນຢັນວ່າ: ຕ້ອງເຮັດແນວໃດເພື່ອເພີ່ມທະວີການພົວພັນຄູ່ຮ່ວມມືຍຸດທະສາດລະຫວ່າງ ອາຊຽນ - ຈີນ. ການພົວພັນລະຫວ່າງ 2 ຝ່າຍໄດ້ພັດທະນາອັນດີງາມໃນທຸກໆດ້ານ ແຕ່ຕ້ອງແກ້ໄຂບັນດາສິ່ງຄົງຄ້າງທີ່ຈຳເປັນຕ້ອງແກ້ໄຂ, ພ້ອມກັນມານະພະຍາຍາມຮັບປະກັນສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມປອດໄພໃນການເດີນທະເລຕາເວັນອອກ”
ກ່ຽວກັບບັນຫາທະເລຕາເວັນອອກ, ບັນດາລັດຖະມົນຕີເນັ້ນໜັກວ່າ: 2 ຝ່າຍຕ້ອງເອົາໃຈໃສ່ ແລະ ຍູ້ແຮງການເຈລະຈາ ແລະ ບັນລຸໄດ້ກົດລະບຽນການປະພຶດຢູ່ທະເລຕາເວັນອອກ (COC) ໂດຍໄວ.