(vovworld) - ຕອນບ່າຍວັນທີ 4/12, ທ່ານຮອງນາຍົກລັດຖະມົນຕີຫວຽດນາມ ຫງວຽນຊວນຟຸ໋ກ ໄດ້ໃຫ້ການຕ້ອນຮັບທ່ານ Yury Fedotov, ຮອງເລຂາທິການໃຫຍ່ສະຫະປະຊາຊາດ, ຜູ້ອຳນວຍການໃຫຍ່ອົງການສະຫະປະຊາຊາດປະຈຳ ວຽນ (ໂອຕຣິດ), ຜູ້ອຳນວຍການບໍລິຫານອົງການປ້ອງກັນ, ຕ້ານຢາເສບຕິດ ແລະ ອາດຊະຍາກຳຂອງສະຫະປະຊາຊາດ (UNODC), ທີ່ພວມຢູ່ຢ້ຽມຢາມຫວຽດນາມ. ນະທີ່ນີ້, ທ່ານຮອງນາຍົກລັດຖະມົນຕີ ຫງວຽນຊວນຟຸ໋ກ ໃຫ້ຮູ້ວ່າ; ຫວຽດນາມ ໄດ້ປັບປຸງສຳເລັດລະບົບພື້ນຖານດ້ານກົດໝາຍ, ສ້າງບັນດາຍຸດທະສາດ, ໂຄງການໄລຍະຍາວ, ສ້າງຕັ້ງລະບົບອົງການປ້ອງກັນ, ຕ້ານຢາເສບຕິດ ແລະ ອາດຊະຍາກຳແຕ່ຂັ້ນສູນກາງລົງຮອດທ້ອງຖິ່ນ, ເພີມທະວີ ແລະ ຍົກສູງຄວາມສາມາດໃນການປະຕິບັດກົດໝາຍ. ທ່ານຮອງນາຍົກລັດຖະມົນຕີ ໄດ້ສະເໜີໃຫ້ບັນດາອົງການຂອງສະຫະປະຊາຊາດ ສືບຕໍ່ສົມທົບກັບລັດຖະບານ, ບັນດາກະຊວງ, ຂະແໜງການຂອງຫວຽດນາມ ຜັນຂະຫຍາຍການປະຕິບັດແຜນການລວມໄລຍະ 2012 – 2016 ແລະ ບັນດາໂຄງການແຫ່ງຊາດໃນແຕ່ລະຂົງເຂດຮ່ວມມືໃຫ້ສຳເລັດຜົນ.
ທ່ານ Yury Fedotov, ຮອງເລຂາທິການໃຫຍ່ສະຫະປະຊາຊາດ ເນັ້ນໜັກວ່າ; ລັດຖະບານຫວຽດນາມ ໄດ້ມີການປະກອບສ່ວນຫຼາຍຢ່າງເຂົ້າໃນໜ້າທີ່ປ້ອງກັນ, ຕ້ານອາດຊະຍາກຳດ້ວຍບັນດາມາດຕະຖານທີ່ຕັ້ງໜ້າ, ພ້ອມທັງໃຫ້ຄຳໝັ້ນສັນຍາສືບຕໍ່ໜູນຊ່ວຍ ແລະ ຮ່ວມມືກັບຫວຽດນາມ ໃນພາລະກິດປ້ອງກັນ, ຕ້ານອາດຊະຍາກຳ ແລະ ຢາເສບຕິດ.